សម្តេចប៉ាបទទួលប្រធានាធិបតី ម៉ាឡាវី នៅបុរីវ៉ាទីកង់

វ៉ាទីកង់ញូវបានរាយការណ៍ថា​ នៅថ្ងៃទី ១៩ ខែសីហា ឆ្នាំ២០២៤ សម្តេចប៉ាបហ្រ្វង់ស៊ីស្កូបានយាង ទទួលប្រធានាធិបតីម៉ាឡាវី លោក ឡាហ្សារូស ម៉ាកខាធី ចាកវីរ៉ា (Lazarus McCarthy Chakwera)។

យោងតាមសេចក្តីថ្លែងការណ៍របស់ការិយាល័យព័ត៌មានសន្តអាសនៈបានឲ្យដឹងថា​ កិច្ចពិភាក្សារវាងមេដឹកនាំទាំងពីរបានធ្វើឡើងនៅក្នុងបរិយាកាសដ៏ស្និទ្ធស្នាល។

នៅក្នុងជំនួបនោះ មេដឹកនាំទាំងពីរ បានគូសបញ្ជាក់ពី "ទំនាក់ទំនងល្អរវាង សន្តអាសនៈនិង ម៉ាឡាវី" រួមជាមួយនឹងទិដ្ឋភាពផ្សេងៗនៃស្ថានភាពនយោបាយ និងសេដ្ឋកិច្ចសង្គមនៃប្រទេសម៉ាឡាវី "ជាពិសេសកិច្ចសហប្រតិបត្តិការ ជាមួយព្រះសហគមន៍ កាតូលិកក្នុងវិស័យថែទាំសុខភាព ការអប់រំ និងការបណ្តុះបណ្តាលវិជ្ជាជីវៈជាដើម។

សេចក្តីថ្លែងការណ៍បានកត់សម្គាល់ថា "កិច្ចសន្ទនាបានបន្តជាមួយនឹងការផ្លាស់ប្តូរមតិលើបញ្ហាក្នុងតំបន់ និងអន្តរជាតិ ដោយសង្កត់ធ្ងន់លើសារៈសំខាន់នៃការលើកកម្ពស់ការសន្ទនា និងការផ្សះផ្សារវាងប្រជាជននិង ប្រជាជន"។

ប្រភពដដែលបានបន្តថា បន្ទាប់ពីចូលគាល់សម្តេចប៉ាប លោកប្រធានាធិបតី ក៏បានបន្តជួបសន្ទនាជាមួយនឹងលោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីនៃសន្តអាសនៈនិង លោក អគ្គអភិបាល ប៉ូល រីឆាត ហ្គាឡាហ្គ័រ រដ្ឋមន្រ្តីទទួលបន្ទុកទំនាក់​ទំនង​ជាមួយ​រដ្ឋ និង​អង្គការអន្តរជាតិ ហើយបន្ទាប់ពីជំនួបភាគីទាំងពីរ ក៏បានផ្លាស់ប្តូរវត្ថុអនុស្សាវរីយ នឹងគ្នាផងដែរ៕