សម្តេចតេជោ ហ៊ុន សែន៖ ​លី សាម៉េត មិនអាច​រួចខ្លួននោះឡើយ

នារសៀលថ្ងៃទី​៤ ខែវិច្ឆិកា ឆ្នាំ​២០២៤នេះ ប្រធានព្រឹទ្ធសភា សម្តេចតេជោ ហ៊ុន សែន បានសរសេរលើបណ្តាញសង្គម​របស់សម្តេចថា ទោះបីជា​លោកលី សាម៉េត ហៅគ្រូមា ដែលធ្លាប់ធ្វើជា​​​ទីប្រឹក្សា​របស់​សម្តេច​ និង​បាន​យក​ឈ្មោះសម្តេច​​ឆបោក​អ្នក​ដទៃ​មាន​ទឹកប្រាក់​​រាប់​លាន​ដុល្លារ សុំទោសសារភាពកំហុសក៏ដោយ ក៏មិនអាចរួចខ្លួននោះឡើយ។

សម្តេចតេជោ ហ៊ុន សែន បានសរសេរថា ៖ «ខ្ញុំសូមបញ្ជាក់ជូនថា មិនមែនដោយ​សារតែវីដេអូសារភាពកំហុស និងសូមទោស​មួយនេះ លី សាម៉េត ត្រូវបានរួចខ្លួននោះឡើយ។ ជំនួយការខ្ញុំម្នាក់ឈ្មោះ ដួង តារា ត្រូវបានឃាត់ខ្លួនរង់ចាំការកាត់ទោសដោយសារជាប់ពាក់ពន្ធ័ឆបោកជាមួយ លី សាម៉េត នេះ»។

សម្តេចក៏បានបញ្ជាឱ្យសមត្ថកិច្ចដែលជានគរបាល ឬកងរាជអាវុធហត្ថទៅនាំខ្លួន លី សាម៉េត បញ្ជូនទៅតុលាការដើម្បីកាត់ទោសតាមច្បាប់ ក្រោយពីរត់គេចខ្លួន​បាន​បង្ហាញខ្លួនចេញវីដេអូសុំទោស​ក៏ដោយ។

សម្តេចបញ្ជាក់ថា ៖ «លី សាម៉េត បានសុំពេលព្យាបាលខ្លួននៅផ្ទះមុនពេលចូលខ្លួនឱ្យតុលា​ការកាត់ទោស។ មិនអាចធ្វើបែបនេះបានឡើយ​នគរបាលយុត្តិធម៌ត្រូវ​តែនាំខ្លួន លី សាម៉េត បញ្ជូនទៅតុលា​ការតាមនីតិវិធី។ ខ្ញុំសង្ឃឹមថា សមត្ថកិច្ចមិនបន្តឱ្យ លី សាម៉េត បានស្ថិតនៅក្រៅ​សំណាញ់ច្បាប់ទៀតទេ»។

យោងតាមវីដេអូរបស់​លោក លី សាម៉េត លោក​បានសារភាពថា​លោកបាន​សាងកំហុស​ដ៏ធ្ងន់ធ្ងរបំផុត​ដែលធ្វើឱ្យប៉ះពាល់កិត្តិយស និង​សេចក្តីថ្លៃថ្នូររបស់​សម្តេចតេជោ ហ៊ុន សែន។

លោកថា ៖ «ខ្ញុំបានយកឈ្មោះសម្តេចទៅប្រើដើម្បីយកលុយ​ពីគេ នេះគឺជារឿងពិត​ ហើយក៏មិនមែនជាលើកទី១ដែរ ដោយបាន​កុហកថាថវិកាដែល​ខ្ញុំយកនោះគឺយកទៅជូនសម្តេចទៀត​។ នេះគឺសុទ្ធតែ​ជារឿង​ដែលខ្ញុំប្រឌិតទាំងអស់​ ខ្ញុំបានសាងកំហុសដ៏ធ្ងន់ធ្ងរដែលធ្វើឱ្យប៉ះពាល់ដល់កិត្តិយស​ និង​សេចក្តីថ្លៃថ្នូររបស់​សម្តេចដែលនាំឱ្យមហាជនយល់ច្រឡំ»។

លោក លី សាម៉េត បានបន្ថែមថា អ្វីដែល​លោកបាន​ធ្វើគឺ​សម្តេចតេជោមិនបានដឹងរឿងអ្វីទាំងអស់ តែលោកបាន​យកឈ្មោះ​របស់សម្តេចតេជោ ហ៊ុន សែនទៅប្រើដើម្បី​តែផលប្រយោជន៍របស់ខ្លួនឯង​។

លោកបញ្ជាក់ថា សម្តេចតេជោ ហ៊ុន សែន ធ្លាប់បានលើកលែងទោសឱ្យគាត់ចំនួន​២ដងមកហើយ ប៉ុន្តែលោកនៅតែមិនរាងចាល ដោយបន្តកសាងកំហុសធ្ងន់ធ្ងរដដែល​។

«សូមសាធារណជនទាំងអស់ កុំមានការយល់ច្រឡំ​ ហើយនេះជាកំហុសរបស់ខ្ញុំដែលបានប្រព្រឹត្តិខុសដែលយកកិត្តិយស និង​សេចក្តីថ្លៃថ្លូរបស់សម្តេចតេជោមកប្រើដើម្បីយកលុយគេ​»។ នេះបើតាមការបញ្ជាក់របស់លោក លី សាម៉េត។

លោក លី សាម៉េ ក៏បាន​ស្នើសុំ​ពេលវេលាក្នុង​ការព្យាបាលជំងឺរបស់​លោកផងដែរ មុននឹងលោក​ចេញមកសារភាព និងទទួលទោសតាមច្បាប់ ប៉ុន្តែ​សម្តេចតេជោហ៊ុន សែន មិនទទួល​យកការស្នើសុំនេះឡើយ ដោយសម្តេចបានបញ្ជាឱ្យសមត្ថកិច្ច​តាមចាប់ខ្លួន​លោក លី សាម៉េតមកផ្តន្ទាទោសតាមច្បាប់​ផងដែរ៕​