តំណាងសន្តអាសនៈប្រចាំនៅអង្គការសហប្រជាជាតិដែលមានទីស្នាក់ការនៅហ្សឺណែវ បានសំដែងការភ្ញាក់ផ្អើលដែលបានទទួលព័ត៌មានអំពីថវិកាដែលពិភពលោកបានចំណាយនៅលើសព្វាវុធកាលពីឆ្នាំ២០២៤។
តា មសេចក្តីរាយការណ៍របស់វ៉ាទីកង់ញូវបានឲ្យដឹងថា លោកអគ្គអភិបាល អេទ័រ បាឡេស្តេរ៉ូ (Ettore Balestrero) អ្នកសង្កេតការណ៍អចិន្ត្រៃយ៍របស់សន្តអាសនៈ បានមានប្រសាសន៍ថា ទឹកប្រាក់ដែលពិភពលោកចំណាយលើសព្វាវុធគឺច្រើនណាស់ ពោលគឺដល់ទៅជា ២,៧ ទ្រីលានដុល្លាកាលពីឆ្នាំ២០២៤។
លោកអគ្គអភិបាលបានមានប្រសាសន៍ថា នេះគឺជា ទំហំទឹកប្រាក់ដ៏មានអតុល្យភាពធ្ងន់ធ្ងរបំផុត ។
លោកអគ្គអភិបាលបានលើកឡើងពីភាពផ្ទុយគ្នានៃការចំណាយយោធាជាមួយនឹងធនធានដែលមានកម្រិតដែលឧទ្ទិសដល់ជំនួយសង្គម សន្តិសុខស្បៀង និងការលើកកម្ពស់ការអភិវឌ្ឍន៍មនុស្ស។
លោកបានមានប្រសាសន៍ថា “នេះបញ្ជាក់យ៉ាងច្បាស់ថា គ្មានសន្តិភាពណាមួយអាចកើតឡើងបានទេ បើគ្មានការរំសាយអាវុធពិតប្រាកដ” ហើយការតម្រូវដែលមនុស្សគ្រប់រូបផ្តល់សម្រាប់ការការពារខ្លួនមិនត្រូវប្រែក្លាយទៅជាការប្រជែងគ្នាក្នុងការផលិតអាវុធវិញឡើយ។
លោកអគ្គអភិបាល បានស្នើឲ្យប្រទេសនានា "ត្រឡប់ទៅរកហេតុផល និងការសន្ទនាវិញ" ដោយប្រើប្រាស់ឧបករណ៍ការទូតទាំងអស់ដើម្បីការពារការកើនឡើង និងអស្ថិរភាព និង ក៏ ដើម្បីលើកកម្ពស់វប្បធម៌នៃសន្តិភាព និងជីវិត និងដើម្បីរក្សាសុចរិតភាព ភាពបរិសុទ្ធនៃជីវិតមនុស្ស ក៏ដូចជាសេចក្តីថ្លៃថ្នូរដែលព្រះជាម្ចាស់បានប្រទានដល់មនុស្សជាតិទាំងអស់៕
Daily Program
