វ៉ាទីកង់ញូវបានរាយការណ៍ថា ពិធីថ្វាយអភិបូជាមួយត្រូវបានរៀបចំឡើងជាពិសេសជាមួយនឹងអស់លោកលោកស្រីជាអ្នកការទូតទាំងអស់ប្រចាំនៅសន្តអាសនៈ កាលពីថ្ងៃសុក្រកន្លងទៅថ្មីៗនេះ។
ពិធីនេះបានរៀបចំឡើងក្រោមការដឹកនាំដោយផ្ទាល់ដោយលោក កាឌីណាល់ព្យែត្រូ ផារ៉ូលីន នាយរដ្ឋមន្រ្តីសន្តអាសនៈ ហើយខ្លឹមសារសំខាន់គឺផ្តោតនៅលើស្ថានភាពសុខភាពសម្តេចប៉ាប និង នៅលើបញ្ហាសន្តិភាពនៅលើពិភពលោក។
នាឱកាសនោះ លោកកាឌីណាល់ បានប្រកាសថ្លែងអំណរគុណ ចំពោះអស់អ្នកដែលបានស្នើនិងបំផុតគំនិតអធិស្ឋានរួមគ្នាជាក្រុមនេះឡើងដើម្បីសម្តេចប៉ាបនិងដើម្បីសន្តិភាព។
លោកកាឌីណាល់បានមានប្រសាសន៍ថា «យើងប្រមូលផ្តុំគ្នាអធិស្ឋាននៅព្រឹកនេះ សម្រាប់សុខភាពរបស់សម្តេចប៉ាបដើម្បីឱ្យទ្រង់ឆាប់ជាសះស្បើយនិងអាចវិលត្រឡប់មកបំពេញភារកិច្ចវិញក្នុងពេលឆាប់ៗនេះ»។
លោកកាឌីណាល់បានឆ្លុះបញ្ចាំងពីខ្លឹមសារ និងគោលបំណងនៃការអធិស្ឋាន ដោយនិយាយថាសកម្មភាពនេះ ធ្វើដើម្បីបើកដួងចិត្តរបស់យើងចំពោះព្រះជាម្ចាស់ ត្បិតព្រះអង្គបានជ្រាបនូវអ្វីដែលយើងនឹងទូលសូមរួចស្រេចទៅហើយ និងបើកចិត្តរបស់យើងដើម្បីទទួលព្រះបន្ទូលរបស់ព្រះជាម្ចាស់។
បកស្រាយអំពីអត្ថន័យនៃព្រះបន្ទូលនៅថ្ងៃនោះ លោកកាឌីណាល់សង្កត់ធ្ងន់នៅលើបញ្ហាសង្គ្រាម និងសន្តិភាពពិភពលោក ដោយលើកឡើងអំពីឃ្លាគម្ពីរ «ត្រូវស្រឡាញ់ខ្មាំងសត្រូវរបស់ខ្លួន» ទោះបីយើងមិនចង់ក៏ដោយ។
លោកកា ឌីណាល់បាននិយាយថា ទោះបីជាការទូតព្យាយាមជៀសវាងការផ្ទុះសង្គ្រាម ក៏សន្តិភាពតម្រូវឱ្យយើងផ្តាច់ភាសានៃហិង្សារបស់យើង ហើយស្វែងរកឆន្ទៈរបស់ព្រះជាម្ចាស់នៅក្នុងទំនាក់ទំនងរបស់យើងជាមួយអ្នកដទៃ។
លោកកាឌីណាល់ បានរំលឹកអ្នកការទូតអំពីការអញ្ជើញរបស់ព្រះយេស៊ូ ដើម្បីស្វែងរកការផ្សះផ្សា សូមអភ័យទោស និងសូមអរគុណ៕
Daily Program
