វ៉ាទីកង់ប្រកាសកម្មវិធីអធិដ្ឋានប្រចាំខែមីនា របស់សម្តេចប៉ាប

វ៉ាទីកង់ញូវបានរាយការណ៍ថា ទោះបីជាសម្តេចប៉ាបហ្រ្វង់ស៊ីស្កូមកដល់ថ្ងៃទី ០៥ ខែមីនា ឆ្នាំ២០២៥ ទ្រង់នៅមិនទាន់បានយាងចេញពីមន្ទីរពេទ្យក៏ដោយកម្មវិធីអធិដ្ឋានប្រចាំខែមីនា របស់ទ្រង់បានចេញហើយ ។

ប្រភពដដែលបានសង្កត់ធ្ងន់ថា គោលបំណងនៃកម្មវិធីអធិដ្ឋានប្រចាំខែមីនា របស់ទ្រង់គឺផ្តោតសំខាន់នៅលើគ្រួសារដែលមានវិបត្តិ ។​

សម្តេចប៉ាបទ្រង់មានបំណងលើកទឹកចិត្តឲ្យគ្រីស្តបរិស័ទទាំងអស់បើកចិត្តគំនិតរិះគិតរួមគ្នាអំពីគ្រួសារដែលមានវិបត្តិ ។​

សម្តេចប៉ាបបានលើកឡើងថា នៅលើពិភពលោកនេះ ទ្រង់ទទួលស្គាល់ថា គ្មានគ្រួសារណាល្អឥតខ្ចោះនោះទេ ។ នៅក្នុងគ្រួសារនីមួយៗវាតែងមានបញ្ហានេះបញ្ហានោះ ប៉ុន្តែនៅពេលដែលយើងអភ័យទោសដល់សមាជិកគ្រួសាររបស់យើង យើងអាចស្វែងរកសន្តិភាពនិងភាពស្ងប់ស្ងាត់នៅក្នុងគ្រួសារយើងឡើងវិញបាន។

ប្រភពដដែលបានបន្តថា រូបភាព និងសំឡេងនៅក្នុងវីដេអូដែលសម្តេចប៉ាបបញ្ចេញនូវសារនេះ គឺត្រូវបានរៀបចំមុនពេលដែលទ្រង់យាងចូលមន្ទីរពេទ្យ នៅថ្ងៃទី ១៤ ខែកុម្ភៈ ជាកន្លែងដែលទ្រង់នៅតែបន្តការព្យាបាលសួតនៅឡើយ​ ។

សម្តេចប៉ាបបានមានបន្ទូលដោយលើកឡើងនិងជំរុញទឹកចិត្តឲ្យគ្រិស្តបរិស័ទទទួល ស្គាល់ការលំបាកដ៏ធំដែលគ្រួសារនានាកំពុងតែប្រឈមមុខ។

សម្តេចប៉ាប ក៏បានបានទទួលស្គាល់ថា យើងទាំងអស់គ្នាតែងតែសុបិនចង់បានអំពីគ្រួសារដ៏ស្រស់ស្អាត និងល្អឥតខ្ចោះ ប៉ុន្តែកុំភ្លេចថា រឿងគ្រួសារមួយដែលល្អឥតខ្ចោះគឺកម្រមានណាស់ ។

សម្តេចប៉ាបបានលើកឡើងថា គ្រួសារនីមួយៗ "មានបញ្ហារៀងៗខ្លួន" " នោះហើយ ជាសេចក្តីរីករាយដ៏អស្ចារ្យរបស់វា" ។

សម្តេចប៉ាប បាន​សង្កត់​ធ្ងន់​ថា​ ​ថ្នាំ​ដ៏​ល្អ​បំផុត​ក្នុង​ការ​ព្យាបាល​ការ​ឈឺ​ចាប់​របស់​គ្រួសារ​ដែល​រង​របួស​គឺ​ការ​អភ័យទោស​ ដោយ​បន្ថែម​ថា​ការ​អភ័យទោស​តម្រូវ​ឱ្យ​ផ្តល់​ឱ្យ​សមាជិក​គ្រួសារ​របស់​យើង ។