វ៉ាទីកង់បន្តព្រួយបារ​ម្ភអំពីការគំរាមកំហែងដោយអាវុធនុយក្លេអ៊ែរ

លោកអគ្គអភិបាល ប៉ូល រីឆាត ហ្គាឡាហ្គ័រ (Paul Richard Gallagher) រដ្ឋមន្រ្តីទទួលបន្ទុកក្រសួង ទំនាក់ទំនងជាមួយរដ្ឋនិងអង្គការអន្តរជាតិបានបន្តសម្តែងនូវ "ការព្រួយបារម្ភយ៉ាងខ្លាំង" របស់ សន្តអាសនៈចំពោះការគំរាមកំហែងដែលមានស្រាប់ដោយអាវុធនុយក្លេអ៊ែរ ។

វ៉ាទីកង់ញូវបានរាយការណ៍ថា នៅក្នុងសុន្ទរកថារបស់លោកទៅកាន់កិច្ចប្រជុំកម្រិតខ្ពស់នៃសម័យប្រជុំនៃឆ្នាំ២០២៥ របស់អង្គការសហប្រជាជាតិស្តីពីការរំសាយអាវុធលោកអគ្គអភិបាលបានលើកឡើងថា "ការចំណាយយោធាដ៏ច្រើនសន្ធឹកសន្ធាប់ ដែលជារឿយៗហួសពីអ្វីដែលចាំបាច់ ដើម្បីធានាការការពារស្របច្បាប់ បង្កើតរង្វង់ដ៏កាចសាហាវនៃការប្រណាំងសព្វាវុធ ហើយកំពុងតែ បង្វែរធនធានសំខាន់ៗឱ្យឆ្ងាយពីការលុបបំបាត់ភាពក្រីក្រ យុត្តិធម៌ ការអប់រំ និងការថែទាំសុខភាព"។

នៅក្នុងកិច្ចប្រជុំដែលគេរៀបចំនៅទីក្រុងហ្សឺណែវ​ពីថ្ងៃទី ២៤ ដល់ ២៨ ខែកុម្ភៈ លោកអគ្គអភិបាលបានសង្កត់ធ្ងន់ "ថ្ងៃនេះយើងឈរនៅចំណុចរបត់មួយ"។

លោកអគ្គអភិបាលបានលើកទឹកចិត្តថា "រួមគ្នាក្នុងនាមក្រុមគ្រួសារនៃប្រជាជាតិមួយ យើងអាចចាត់វិធានការដោយយុត្តិធម៌ និងក្លាហានសម្រាប់ការរំសាយអាវុធជាទូទៅ មានតុល្យភាព និងពេញលេញក្រោមការគ្រប់គ្រងអន្តរជាតិប្រកបដោយប្រសិទ្ធភាព"។

បើមិនដូច្នេះទេ លោកបានព្រមានថា ជម្រើស "គឺការបន្តនូវជម្លោះ អំពើហិង្សា ការកើនឡើងនូវវិសមភាព និងការធ្វើឱ្យខូចបរិស្ថាន ដែលចុងក្រោយវាគ្មានផ្តល់ផលប្រយោជន៍ដល់នរណាម្នាក់ឡើយ "។