វ៉ាទីកង់និងសាកលវិទ្យាល័យកូឡំបៀ រួមគ្នាបង្កើត គណៈកម្មការដើម្បីពិនិត្យបំណុលអធិបតេយ្យភាព

វ៉ាទីកង់ញូវបានរាយការណ៍ថា បណ្ឌិតសភាវិទ្យាសាស្រ្តសង្គមនៃសន្តអសនៈ បានសហការជាមួយនឹងសាកលវិទ្យាល័យកូឡំបៀដើម្បីរួមគ្នាបង្កើតគណៈកម្មាការចំពោះកិច្ចមួយមានគោលបំណងធ្វើ កំណែទម្រង់ និងស្វែងរកដំណោះស្រាយសម្រាប់កំណើនសេដ្ឋកិច្ច សង្គម និងបរិស្ថានប្រកបដោយនិរន្តរភាព ជាពិសេសគឺពាក់ព័ន្ធនឹងបំណុលអធិបតេយ្យ ។

ប្រភពដដែលបានបញ្ជាក់ថា នេះគឺជាការប្តេជ្ញាចិត្តនៃកម្មវិធីកំណែទម្រង់របស់សន្តអាសនៈជាពិសេសគឺដើម្បីដោះស្រាយបញ្ហាប្រឈមដែលកំពុងកើនឡើងនៃបំណុលអធិបតេយ្យភាព និងការអភិវឌ្ឍន៍ ដែលកាន់តែខ្លាំងឡើងប៉ះពាល់ដល់ប្រទេសនានាក្នុងចំណោមបណ្តាប្រទេសនៅក្នុងចរន្តនៃសេដ្ឋកិច្ចមិនសូវរីកចម្រើន  ។

ប្រភពដដែលបានឲ្យដឹងថា គណៈកម្មាការនេះនឹងដឹកនាំដោយសាស្រ្តាចារ្យ ចូសេព ស្ទីគ្លីត ហើយសមាជិកគឺ រួមមានអ្នកជំនាញមកពីសាកលដែលមានជំនាញលើបំណុលអធិបតេយ្យ មកពីបណ្ឌិតសភា សង្គមស៊ីវិល និងសហគមន៍សាសនានា។

គោលដៅរបស់គណកម្មការនេះគឺដើម្បីបង្កើត និងលើកកំពស់កម្មវិធីកំណែទម្រង់ដែលជួយដោះស្រាយស្ថានភាពបំណុលមិនស្ថិតស្ថេរ និងទប់ស្កាត់វិបត្តិនាពេលអនាគត ជំរុញការអភិវឌ្ឍន៍សេដ្ឋកិច្ច សង្គម និងបរិស្ថានប្រកបដោយនិរន្តរភាព។ លើសពីនេះ គណៈកម្មការនឹងស្នើផែនការកំណែទម្រង់សម្រាប់ប្រព័ន្ធហិរញ្ញវត្ថុអន្តរជាតិ សំដៅធ្វើឱ្យបន្ទុកបំណុលរបស់ប្រទេសក្រីក្រកាន់តែមាននិរន្តរភាព និងសម្រួលដល់ការវិនិយោគកាន់តែច្រើនក្នុងវិស័យថែទាំសុខភាព ការអប់រំ ថាមពលស្អាត និងការបន្សាំអាកាសធាតុ។