វ៉ាទីកង់ញូវនៅដើមខែមេសា ឆ្នាំ២០២៥ បានប្រកាសចេញផ្សាយភាសាថ្មីជាភាសាទី ៥៦ នៅក្នុងកម្មវិធីផ្សព្វផ្សាយរបស់ខ្លួន។
ប្រព័ន្ធផ្សព្វផ្សាយដែលជាម៉ាស៊ីនប្រកាសដំណឹងល្អរបស់សន្តអាសនៈជាផ្លូវការនេះ បានប្រកាសចេញផ្សាយភាសាអាហ្សែបៃហ្សង់។
ប្រភពដដែលបានអះអាងថា ភាសាអាហ្សែបៃហ្សង់ចាប់ពីថ្ងៃទី២ ខែមេសា ឆ្នាំ២០២៥តទៅគឺអាចនឹងទទួលបាននៅលើបណ្តាញព័ត៌មានវ៉ាទីកង់។
ការផ្សព្វផ្សាយជាភាសាថ្មីនេះ គឺជាកម្មវិធីពង្រីកសេវាកម្មពហុភាសារបស់ក្រសួងសារគមនាគមន៍របស់សន្តអាសនៈនៅក្នុងគោលបំណងដើម្បីបង្កើនទំនាក់ទំនង ពង្រឹងជំនឿ និងជំរុញការសន្ទនាអន្តរសាសនា។
ការប្រកាសចេញនេះ គឺស្របពេលដែលសន្តអាសនៈបានប្រារព្ធខួបនៃការសោយទិវង្គតរបស់សម្តេចប៉ាបយូហានប៉ូលទី ២។
វ៉ាទីកង់ញូវបានពង្រីកកម្មវិធីផ្សាយរបស់ខ្លួនជាបន្តបន្ទាប់ចាប់តាំងពីចេញផ្សាយដំបូងជាមួយនឹងភាសាអ៊ីតាលី អេស្ប៉ាញ អង់គ្លេស និង បារាំង។
លោកអភិបាល វ្លាឌីមៀ ហ្វីកេត (Vladimír Fekete) នៃព្រះសហគមន៍ភូមិភាគអាហ្សែបៃហ្សង់ បានលើកឡើងថា នេះគឺជាឧបករណ៍ដ៏មានអានុភាពសម្រាប់ផ្សព្វផ្សាយសេចក្តីពិត ជំរុញក្តីសង្ឃឹម និងពង្រឹងជំនឿរបស់អ្នកជឿនៅក្នុងព្រះសហគមន៍ផ្ទាល់។
លោកបានបន្តថា នេះជា ឱកាសដែលគ្រីស្តបរិស័ទអាចអានបន្ទូលរបស់សម្តេចប៉ាប ហើយទទួលបានព័ត៌មានថ្មីៗនៅក្នុងព្រះសហគមន៍ជាភាសាអាហ្សែបៃហ្សង់ផ្ទាល់ ដែលគេដឹងថាមានប្រមាណជា៣០ លាននាក់៕
Daily Program
