ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានបញ្ជាក់កាលពីថ្ងៃពុធ ថា លោក និយាយទៅកាន់សមាភាគីបារាំងរបស់លោក លោកអេម៉ានូអែល ម៉ាក្រុងម្តងក្នុងមួយថ្ងៃ ហើយប្រកាសថា លោកនឹងទៅបារាំងនៅសប្តាហ៍ក្រោយ។
នៅអំឡុងសន្និសីទកាសែត ប្រធានាធិបតីអ៊ុយក្រែន បាននិយាយថា លោកទើបតែនិយាយទៅកាន់ប្រធានាធិបតីបារាំងលោកម៉ាក្រុង។ យើងនិយាយគ្នាច្រើនជារឿយៗ ម្តងក្នុងមួយថ្ងៃ។ បន្ទាប់មកលោកវ៉ូឡូឌីមៀ ហ្សេឡេនស្គី បានបន្ថែមថា លោកនឹងទៅបារាំងនៅសប្តាហ៍ក្រោយ ហើយនិងមានការជួបប្រជុំជាច្រើន។
នៅលើតេឡេក្រាម ក្រសួងការពារជាតិរុស្ស៊ីបានប្រកាសថា រុស្ស៊ីបានវាយប្រហារដ្រូនអ៊ុយក្រែន ១៣២ គ្រឿង នៅលើដែនដីរបស់ខ្លួន កាលពីថ្ងៃព្រហស្បតិ៍។ ជាសរុប ដ្រូន ៥៤គ្រឿងត្រូវបានបាញ់ទម្លាក់នៅក្នុងតំបន់ សារ៉ាតូវ ប្រមាណ ៧០០ គីឡូម៉ែត្រ ភាគអាគ្នេយ៍ទីក្រុងមូស្គូ និង ៤០គ្រឿង នៅតំបន់វ៉ូរ៉ូណេ ជិតខាង។
អគ្គមេបញ្ជាការកងទ័ពនៃប្រទេសប្រមាណជាង ៣០នៅអឺរ៉ុប ដែលត្រៀមខ្លួនចូលរួមវិភាគទានសម្រាប់ការធានាសន្តិសុខសម្រាប់អ៊ុយក្រែន បានជួបប្រជុំគ្នាកាលពីថ្ងៃព្រហស្បតិ៍ ទី២០ មីនា ដើម្បីពិភាក្សាអំពីផែនការមួយដើម្បីការថែរក្សាសន្តិភាពក្នុងករណីមានការឈប់បាញ់ជាមួយរុស្ស៊ី។ នាយករដ្ឋមន្រ្តីអង់គ្លេស លោកខេ ស្តាកមើ ដែលប្រឹងប្រែងជាមួយប្រធានាធិបតីបារាំង លោកអេម៉ានូអែលម៉ាក្រុង ដើម្បីបង្កើតសម្ព័ន្ធមិត្តនៃប្រទេសស្ម័គ្រចិត្ត និងដែលត្រៀមខ្លួននឹងចូលរួមវិភាគទានតាមរបៀបណាមួយ បានថ្លែងសន្ទរកថាទៅកាន់មន្រ្តីយោធាអឺរ៉ុបទាំងនេះ។
កិច្ចប្រជុំគឺឧទ្ទិសសំដៅដល់ដំណាក់ប្រតិបត្តិ នៃផែនការថែរក្សាសន្តិភាពដែលគិតដោយលោកអេម៉ានូអេល ម៉ាក្រុង និងលោកខេ ស្តាកមើ។ កិច្ចប្រជុំនេះ រៀបចំឡើងនៅខណៈដែលប្រធានាធិបតីរុស្ស៊ី លោកវ្លាឌីមៀ ពូទីន ដាក់លក្ខខណ្ឌសម្រាប់បទឈប់បាញ់ គឺការបញ្ឈប់រាល់ជំនួយយោធាពីលោកខាងលិចសម្រាប់អ៊ុយក្រែន។ រុស្ស៊ីក៏បានបដិសេធគំនិតនៃវត្តមាននៃកងកម្លាំងបរទេសនៅអ៊ុយក្រែននៅក្នុងក្របខណ្ឌនៃកិច្ចព្រមព្រៀងបទឈប់បាញ់ផងដែរ។
នៅលើបណ្តាញសង្គាម Truth Social លោកដូណាល់ ត្រាំ បានសរសេរ កាលពីថ្ងៃពុធថា លោកទើបតែមានការហៅទូរសព្ទដ៏ល្អជាមួយប្រធានាធិបតីអ៊ុយក្រែន លោកហ្សេឡេនស្គី។ យើងស្ថិតនៅលើផ្លូវដ៏ល្អ។ ចំណែកប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានរំឭកជាមួយសមភាគីរបស់លោកអំពីការគ្រប់គ្រងដ៏មានសក្តានុពលរបស់អាម៉េរិក គឺមានតែនៅលើរោងចក្រនុយក្លេអ៊ែររបស់អ៊ុយក្រែន គឺរោងចក្រហ្ស៉ាប៉ូរីស្យា ដែលសព្វថ្ងៃនេះ ស្ថិតនៅក្រោមការគ្រប់គ្រងរបស់រុស្ស៊ី និងមិនមែនមានច្រើនដូចដែលបង្ហាញកន្លងមកដោយទីក្រុងវ៉ាស៊ីនតុននោះទេ។
ប្រធានាធិបតីអ៊ុយក្រែន នៅក្នុងដំណើរទស្សនកិច្ចទៅប្រទេសហ្វាងឡង់ បានបញ្ជាក់ថា យើងបាននិយាយតែលើរោងចក្រថាមពលមួយ ដែលស្ថិតនៅក្រោមការគ្រប់គ្រងរបស់រុស្ស៊ី គឺរោងចក្រហ្សាប៉ូរីស្យា។
រោងចក្រថាមពលហ្សាប៉ូរីស្យា គឺជារោងចក្រដែលធំបំផុតនៅអឺរ៉ុប ត្រូវបានគ្រប់គ្រងដោយរុស្ស៊ីចាប់តាំងពីសប្តាហ៍ទី១ នៃការឈ្លានពានចូលអ៊ុយក្រែន បីឆ្នាំមកហើយ និងសុវត្ថិភាពរបស់វាគឺផុយស្រួយណាស់ ដែលធ្វើឲ្យមានការភ័យខ្លាចអំពីមហន្តរាយដ៏មានសក្តានុពលមួយ។
បើតាមលោកវ៉ូឡូឌីមៀ ហ្សេឡេនស្គី ការដំណើរការឡើងវិញពេញលេញនៃរោងចក្រអាចនឹងចំណាយពេល ២ឆ្នាំ ឬ ២ឆ្នាំ កន្លះ នៅក្នុងលក្ខខណ្ឌដែលរុស្ស៊ីត្រូវប្រគល់មកវិញមិនគ្រាន់តែរោងចក្រ ប៉ុន្តែក៏ជាហេដ្ឋរចនាសម្ព័ន្ធនៅក្បែរទីតាំងចាំបាច់ដើម្បីឲ្យវាដំណើរការល្អ និងត្រូវដកអាវុធទាំងអស់ចេញពីតំបន់នេះ។
Daily Program
