លោកកាឌីណាល់ លូវីស ផ្ញើសារលើកទឹកចិត្តដល់យុវជនកម្ពុជាសម្រាប់សន្និបាតយុវជនអន្តរភូមិភាគ
លោកកាឌីណាល់ លូវីស អន់តូនីញ៉ូ តាគ្លេ ទទួលបន្ទុកក្រសួងប្រកាសដំណឹងល្អដល់ប្រជាជាតិទាំងឡាយ បានថ្លែងផ្ញើសារលើកទឹកចិត្តដល់យុវជនកម្ពុជាសម្រាប់សន្និបាតយុវជនអន្តរភូមិភាគ។
លោកកាឌីណាល់ បានលើកឡើងថា លោកបានទទួលដំណឹងថានៅប្រទេសកម្ពុជាមានសន្និបាតយុវជនអន្តរភូមិភាគ ដើម្បីចូលរួមក្នុងជីវិត និងបេសកកម្មរបស់ព្រះសហគមន៍នៅក្នុងប្រទេសកម្ពុជា ហើយក៏ក្នុងព្រះសហគមន៍សកលដែរ។
លោកបានមានប្រសាសន៍ថា ៖ «យើងសូមលើកទឹកចិត្តបងប្អូនថា ភាពជាយុវជនយុវនារី គឺជាព្រះអំណោយទានរបស់ព្រះជាម្ចាស់។ សូមព្យាយាមស្វែងរកព្រះអំណោយទានរបស់ព្រះវិញ្ញាណដែលបានប្រទានដល់បងប្អូនម្នាក់ៗក្នុងនាមជាយុវជន»។
«ទាំងគំនិតប្រាជ្ញា ទាំងកម្លាំង ទាំងសមត្ថភាពនិងក្តីស្រមៃ និងសរីរាង្គរបស់បងប្អូនសូមប្រើវាសម្រាប់បេសកកម្មរបស់ព្រះសហគមន៍។ សូមកុំប្រើទេសពកោសល្យនោះ ដោយឥតប្រយោជន៍ ឬក៏បំផ្លាញជីវិត ឬសង្គម»។
លោកកាឌីណាល់ លូវីស អន់តូនីញ៉ូ តាគ្លេ បានណែនាំឱ្យយុវជនកម្ពុជា ប្រើទេពកោសល្យ ឱ្យមានប្រយោជន៍ នោះព្រះភក្ត្ររបស់ព្រះជាម្ចាស់ និងកិច្ចការប្រកាសដំណឹងល្អរបស់ព្រះអង្គ នឹងរីកសាយភាពនៅក្នុងមាតុភូមិរបស់បងប្អូន ក្នុងព្រះសហគមន៍ ក្រុមគ្រួសាររបស់បងប្អូន និងពិភពលោកទាំងមូល។
លោកបានបញ្ជាក់ថា ៖ «សង្ឃឹមថា យុវជនកម្ពុជា នឹងរួមចំណែកក្នុងបេសកកម្មរបស់ព្រះសហគមន៍សកលបន្ទាប់ពីកម្មវិធីនេះ។ សូមព្រះជាម្ចាស់ប្រទានពរដល់បងប្អូន»។
សូមបញ្ជាក់ថា យុវជនកាតូលិក កម្ពុជា ប្រារព្វសន្និបាតយុវជនអន្តរភូមិភាគ ចាប់ពីថ្ងៃទី១៦-១៩ ខែតុលា ឆ្នាំ២០២៤៕
Daily Program
