រឿងអ៊ុយក្រែន អ្វីដែលត្រូវដឹងអំពីជំនួប​រវាងលោកម៉ាក្រុង និងលោកត្រាំ នៅ ទីក្រុង​វ៉ាស៊ីនតុន

ប្រធានាធិបតីអេម៉ានូអេល ម៉ាក្រុង បានស្ថិតនៅទីក្រុងវ៉ាស៊ីនតុន កាលពីថ្ងៃចន្ទ ទី២៤ ខែកុម្ភៈ សម្រាប់ជំនួបជាមួយសមភាគីអាម៉េរិក លោកដូណាល់ ត្រាំ នៅសេតវិមាន និងព្យាយាមស្វែង​រក​ទម្ងន់សម្រាប់ប្រទេសបារាំង និងអឺរ៉ុប នៅក្នុងការចរចសារវាងសហរដ្ឋអាម៉េរិក និង​ប្រទេស​រុស្ស៊ីចំពោះជោគវាសនារបស់អ៊ុយក្រែន។ ទោះបីមានការឃ្លាតឆ្ងាយពីគ្នាយ៉ាងជ្រៅ ឥស្សរជន​ទាំងពីរបានបង្ហាញនូវភាពជាសម្ព័ន្ធមិត្ត និងអះអាងចង់ធ្វើការរួមគ្នាក្នុងគោលដៅបញ្ចប់​សង្រ្គាម។

មុនសន្និសីទកាសែតរួម នៅក្នុងការិយាល័យពងក្រពើនៃសេតវិមាន ប្រធានាធិបតីបារាំង បាន​អះអាង​ថា គោលដៅរួម គឺស្ថាបនាសន្តិភាពរឹងមាំ និងមានចីរភាព​នៅអ៊ុយក្រែន និងបន្ថែមថា លោកសង្ឃឹមមានការរួមចំណែកដ៏ខ្លាំងក្លារបស់អាម៉េរិកក្នុងការធានាអំពីរឿងនេះ។ លោកក៏​បាន​សន្និដ្ឋានថា អ៊ុយក្រែនត្រូវតែត្រូវបានបញ្ចូលនៅក្នុងកិច្ចចរចាដើម្បីបញ្ចប់​សង្រ្គាម។

ចំណែកលោកដូណាល់ ត្រាំ បានអួតអំពីទំនាក់ទំនងពិសេសជាមួយសមភាគីបារាំង និង​អះអាងថា​អាចបញ្ចប់សង្រ្គាមនៅក្នុងប៉ុន្មានសប្តាហ៍ខាងមុខ។

ប្រធានាធិបតីបារាំងបាននិយាយបន្តថា អឺរ៉ុប បានត្រៀមខ្លួនទៅរហូតដល់អាចបញ្ជូនទាហាន​ទៅ​​អ៊ុយក្រែន​​ដើម្បីផ្ទៀងផ្ទាត់ថា សន្តិភាពត្រូវបានគោរពត្រឹមត្រូវ។ នៅក្បែរលោក សមភាគី​អាម៉េរិក បានអះអាងថា លោកវ្លាឌីមៀ ពូទីន នឹងយល់ព្រមចំពោះវត្តមានកងកម្លាំងអឺរ៉ុបដើម្បី​រក្សា​សន្តិភាព​នៅអ៊ុយក្រែន។

នៅពេលថ្លែងនិយាយជាលើកដំបូង លោកដូលណាល់ ត្រាំ បានបញ្ជាក់ថា កិច្ចព្រមព្រៀង​ជាមួយ​អ៊ុយក្រែនអំពីរ៉ែគឺស្ថិតជិតសម្រេចហើយ។ មុននេះ រដ្ឋាភិបាលអ៊ុយក្រែន បានបញ្ជាក់​ថា កិច្ចចរចាអំពីកិច្ចព្រមព្រៀងនេះ ដែលនឹងផ្តល់ឲ្យទីក្រុងវ៉ាស៊ីនតុនអាចប្រើប្រាស់រ៉ែ​អ៊ុយក្រែន​​ដោយដូរជាមួយនឹងការការពារ ស្ថិតនៅដំណាក់កាលចុងក្រោយ។

នៅក្នុងក្របខណ្ឌនេះ ប្រធានាធិបតីអាម៉េរិកបានថ្លែងថា លោកវ៉ូឡូឌីមៀ ហ្សេឡេនស្គី អាច​នឹង​​​មកសេតវិមាននៅសប្តាហ៍នេះ ឬសប្តាហ៍ក្រោយ។ នេះគឺជាសេចក្តីសម្រេចដែលស្វាគមន៍​ដោយ​លោកអេម៉ានូអេល ម៉ាក្រុង ដែលបានសន្និដ្ឋានថា កិច្ចព្រមព្រៀងនេះ (...) អំពីរ៉ែកម្រ (...) ទង្វើនៃការសន្យារបស់អាម៉េរិក សម្រាប់បូរណភាពដែនដីអ៊ុយក្រែន។

លោកដូណាល់ ត្រាំ បានអះអាងថា គោលដៅរបស់យើង គឺឈានទៅដល់បទឈប់បាញ់ និង​បញ្ចប់​ដោយឈានទៅរកសន្តិភាព។ លោកសន្និដ្ឋានថា សមភាគីបារាំងរបស់លោក លោក​ព្រមព្រៀង​លើបញ្ហាធំៗហើយ។

ម្យ៉ាងវិញទៀត លោកទទូចថា ៖ “នេះគឺជាឱកាសល្អដើម្បីបញ្ចប់សង្រ្គាមនៅអ៊ុយក្រែនដែល​អាច​នឹងសំណាងអាក្រក់វវត្តន៍ទៅជា សង្រ្គាមលោកលើកទី៣។” ហើយលោកត្រាំ ក៏បាន​វាយ​តម្លៃថា សង្រ្គាមនេះគឺជានរកបង្ហូរឈាម។

ប៉ុន្តែជាថ្មីម្តងទៀត លោកអេម៉ានូអេល ម៉ាក្រុង ទទូចថា ៖ “យើងចង់បានសន្តិភាព ប៉ុន្តែ​សន្តិភាព​នេះមិនអាចមានន័យថា ជាការចុះចាញ់របស់អ៊ុយក្រែនទេ។” ម្យ៉ាងវិញទៀត ប្រមុខ​រដ្ឋ​​បារាំង បានព្រមានថា ៖ “គ្មាននរណាម្នាក់ចង់រស់នៅក្នុងពិភពលោកមួយដែលច្បាប់ គឺដាក់​ចុះ​ដោយអ្នកខ្លាំងតាមចិត្តនោះទេ”។

លោកអេម៉ានូអេល ម៉ាក្រុង បានបន្តថា ៖ “សន្តិភាពនេះមិនអាចជាការឈប់បាញ់ដោយ​មិន​មាន​​ការធានា។ សន្តិភាពនេះត្រូវតែគ្រោង​លក្ខខណ្ឌនៃបូរណភាពរបស់អ៊ុយក្រែន អនុញ្ញាត​ឲ្យ​អ៊ុយក្រែនចរចាជាមួយគ្រប់ភាគីលើគ្រប់​បញ្ហាដែលប៉ះពាល់ដល់អ៊ុយក្រែន។ ​លោកម៉ាក្រុង​សង្ខេបថា ៖ “យើងចង់បានកិច្ចព្រមព្រៀងរហ័ស ប៉ុន្តែមិនមែនជាកិច្ចព្រមព្រៀងដែល​ផុយ​ស្រួល​​ទេ។”