រដ្ឋមន្ត្រីការពារជាតិអ៊ីស្រាអែល បញ្ជាឱ្យបង្កើនការវាយឆ្មក់នៅតំបន់ វេសបែង

រដ្ឋមន្ត្រីការពារជាតិអ៊ីស្រាអែល លោក អ៊ីស្រាអេល កាល ( Israel Katz) បានបញ្ជាឱ្យបង្កើនការវាយឆ្មក់យោធានៅក្នុងជំរុំជនភៀសខ្លួននៅទូទាំងតំបន់ វេស បែង ។

វ៉ាទីកង់ញូវបានរាយការណ៍ថា រដ្ឋមន្រ្តីការពារជាតិនេះ បានបញ្ជាឱ្យបង្កើនការវាយឆ្មក់យោធានៅក្នុងជំរុំជនភៀសខ្លួននៅទូទាំងតំបន់នោះ ​បន្ទាប់​ពី​មាន​ការ​បំផ្ទុះ​រថយន្តក្រុង​ជា​បន្តបន្ទាប់​ក្នុង​ទីក្រុង តែលអាវីវ  (Tel Aviv ) ដែល​បាន​បណ្តាល​ឲ្យ​មាន​អ្នក​របួសមួយចំនួន។

មកដល់ពេលនេះគ្មានក្រុមប្រដាប់អាវុធណាមួយប្រកាសទទួលស្គាល់ការវាយប្រហារដោយការបំផ្ទុះគ្រាប់បែកនៅតែលអាវីវនោះទេ ។

លោក កាល បាននិយាយថា ការវាយឆ្មក់កាន់តែខ្លាំងនឹងផ្តោតលើជំរុំជនភៀសខ្លួន នៅសង្កាត់ទូលកាម ( Tulkarm) និងកន្លែងផ្សេងទៀតនៅ វេស បែង ។

នៅក្នុងការវាយប្រហារនោះ រថយន្តក្រុងទទេចំនួនបីគ្រឿងបានផ្ទុះក្នុងរយៈពេលប៉ុន្មាននាទី ហើយឧបករណ៍បំផ្ទុះត្រូវបានរកឃើញនៅលើឡានក្រុងពីរផ្សេងទៀត ដែលជំរុញឱ្យមានការផ្អាកជាបណ្តោះអាសន្ននូវសេវាកម្ម ដឹកជញ្ជូនសាធារណៈទូទាំងប្រទេស ។

ដោយឡែកទាក់ទងនឹងសាកសពចំណាប់ខ្មាំងដែលក្រុមហាម៉ាសបញ្ជូនមកអោយអ៊ីស្រាអែល អ្នកជំនាញអ៊ីស្រាអែលបានលើកឡើងថា ​ដំណើរការ​កំណត់​អត្តសញ្ញាណ​បាន​បង្ហាញ​ថា​សាកសព​មិន​មែន​ជា​ចំណាប់ខ្មាំង​ដែល​ត្រូវ​គេ​ស្គាល់​ឡើយ​ដោយ​ចោទ​ក្រុម​ហាម៉ាស់​ថា​បាន​បំពាន​កិច្ចព្រមព្រៀង​បទ​ឈប់​បាញ់។