យន្តហោះរុស្ស៊ីត្រូវបានវាយប្រហារ ៖ អ៊ុយក្រែននិយាយថា មិនមាន​ព័ត៌មាន​គួរ ឲ្យ ទុកចិត្តបានសម្រាប់អ្នកដំណើរ

យោងតាមអភិបាលតំបន់ បានឲ្យដឹងថា យន្តហោះយោធារុស្ស៊ីបានធ្លាក់​នៅក្នុង​ទីក្រុង​បេលហ្ការ៉ូដ នៅព្រំដែនជាមួយអ៊ុយក្រែន។ យោងតាមប្រភពរុស្ស៊ី យន្តហោះនេះ បាន​ដឹក​ជញ្ជូន​មនុស្ស ៧៤ ដែលមាន ៦៥នាក់ គឺជាអ្នកទោសសង្រ្គាមរបស់អ៊ុយក្រែន។ ដូច្នេះ​គេ​នៅ​មិន​ដឹងអំពីមូលហេតុនៃការធ្លាក់ ទីក្រុងមូស្គីបានចោទប្រកាន់ទីក្រុងគៀវយ៉ាង​លឿនថា​បាន​វាយ​ប្រហារយន្តហោះ ចំណែកប្រធានាធិបតីអ៊ុយក្រែន ទាមទារឲ្យមាន​ការស៊ើបអង្កេតជា​អន្តរជាតិ។

យន្តហោះដឹកជញ្ជូនយោធារុស្ស៊ី II-76 បានធ្លាក់ កាលពីថ្ងៃពុធទី២៤ ខែមករា នៅក្នុងតំបន់​បេលហ្គារ៉ូដ ក្បែព្រំដែនអ៊ុយក្រែន។ យោងតាមក្រសួងការពារជាតិរុស្ស៊ី មានអ្នកទោស​សង្រ្គាម​អ៊ុយក្រែន ៦៥នាក់ ជិះនៅក្នុងនោះ។

ក្រុមប្រឹក្សាសន្តិសុខនៃអង្គការសហប្រជាជាតិនឹងជួបប្រជុំជាបន្ទាន់​កាលពីល្ងាចថ្ងៃព្រហស្បតិ៍ តាម​ការស្នើសុំរបស់ទីក្រុងមូស្គូ ដែលបានចោទប្រកាន់អ៊ុយក្រែនថា​បានវាយប្រហារ​យន្តហោះ​នេះ។

ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានសុំកាលពីថ្ងៃពុធនូវការស៊ើបអង្កេត ជាអន្តរជាតិសម្រាប់សំនុំរឿងនេះ។ នៅក្នុងសារប្រចាំថ្ងៃ លោកបានថ្លែងថា ៖ “វាច្បាស់ថា រុស្ស៊ី​បានលេងជាមួយជីវិត​នៃអ្នកទោសអ៊ុយក្រែន ជាមួយនឹងមនោសញ្ចេតនា​ឪពុកម្តាយរបស់​ពួកគេ និងការរញ្ជួលអារម្មណ៍ពីសង្គមរបស់យើង។” លោកមិនបានបញ្ជាក់ ឬបដិសេធថា ជន​រង​គ្រោះ គឺពិតជាអ្នកទោសអ៊ុយក្រែន​ ឬយ៉ាងណា? ចារកម្មយោធាអ៊ុយក្រែន  (GUR) បញ្ជាក់​ថា មិនមានព័ត៌មានគួរឲ្យទុកចិត្តបាន​អំពី​អ្នកដំណើរនៅលើយន្តហោះ។ GUR បញ្ជាក់ថា ៖ “សព្វថ្ងៃ យើងមិនមានព័ត៌មានដែលគួរឲ្យទុកចិត្ត និងពេញលេញអំពីមនុស្ស ដែលស្ថិតនៅ​លើ​យន្ត​ហោះ ឬចំនួនរបស់ពួកគេ។ GUR ការផ្លាស់ប្តូរអ្នកទោសត្រូវគ្រោងធ្វើនៅថ្ងៃនេះ ប៉ុន្តែ​វា​​មិនអាចទៅរួច។

នៅក្នុងសេចក្តីប្រកាសមួយ ក្រសួងការពារជាតិរុស្ស៊ី បានបញ្ជាក់ថា ៖ “របបទីក្រុងគៀវ នៅ​អ៊ុយក្រែន បានប្រព្រឹត្តអំពើភេរវកម្ម​ដោយវាយប្រហារយន្តហោះដឹកជញ្ជូន​យោធារុស្ស៊ី​ដែល​បាន​ធ្វើការហោះហើរចេញពីព្រលានយន្តហោះ ឆ្កាឡូវស៊ី នៅជិតទីក្រុងមូស្គូ ទៅកាន់​បេលហ្គារ៉ូដ​​ដើម្បីដឹកជញ្ជូនយោធាអ៊ុយក្រែន​ដែលត្រូវដោះដូរអ្នកទោស។” យោងតាមក្រសួងការពារជាតិរុស្ស៊ី យោធាអ៊ុយក្រែនដឹងច្បាស់ថា រុស្ស៊ីដឹកជញ្ជូនអ្នកទោស​អ៊ុយក្រែន​​តាមយន្តហោះទៅកាន់បេលហ្គារ៉ូដ បន្ទាប់មកដឹកពួកគេដល់ស្ពានមួយដែលជា​កន្លែង​​ណាត់ជួបនៅព្រំដែន។ យោងតាមប្រភពនេះ អ៊ុយក្រែន​ក៏បានវាយប្រហារ​ចេញពី​តំបន់​ខាឃីវ នូវមីស៊ីលពី​ពីប្រព័ន្ធ​ការពារអាកាសដើម្បីវាយប្រហារលើយន្តហោះដឹកជញ្ជូនយោធា II-76 ហើយបន្ទាប់មក នឹងចោទប្រកាន់ប្រទេសរុស្ស៊ី។  

អ្នកទោសអ៊ុយក្រែន ៦៥នាក់ ដែលយោងតាមទីក្រុងមូស្គូ ស្ថិតនៅលើយន្តហោះ ព្រមទាំង​ក្រុមនាវិកបើកយន្តហោះ ៦នាក់ និងទាហានរុស្ស៊ី បីនាក់ទៀត បានស្លាប់។

សោកនាដកម្មបានកើតឡើននៅជិតភូមិ រុស្ស៊ី ឡាប្ល៉ូណូវ៉ូ មានចម្ងាយ ៤៥ គីឡូម៉ែត្រ​ពី​ព្រំដែន​រួម។ រូបភាពនានាដែលត្រូវបានបង្ហោះនៅលើបណ្តាញសង្គម បង្ហាញពី​យន្តហោះធ្លាក់ចុះមក ហើយរលាយបាត់នៅក្នុងការផ្ទុះដ៏ធំមួយ និងមានផ្សែងខ្មៅខ្មួលខ្មាញ​ហោះឡើងទៅលើ។

លោកស្រីម៉ារីយ៉ា ម៉េហ្សេនសឺវ៉ា ប្រជាជនក្នុងតំបន់ និងជាសាក្សីរៀបរាប់ថា ៖ “យើង​បាន​ឮ​សម្លេង​ខ្លាំងណាស់ ហើយយើងបានចេញមក។ វាមានភ្លើងឆេះសន្ធោរសន្ធៅ”។