មេដឹកនាំ​អារ៉ាប់​ពិភាក្សា​អំពី​តំបន់​ហ្គាហ្សា​ក្រោយ​សង្គ្រាម

មេដឹកនាំអារ៉ាប់កំពុងជួបប្រជុំគ្នានៅទីក្រុងគែរ ដើម្បីពិភាក្សាអំពីការអនុម័តសំណើប្រឆាំងរបស់អេហ្ស៊ីបចំពោះការអំពាវនាវរបស់ប្រធានាធិបតីអាមេរិក ឱ្យផ្តាច់តំបន់ហ្គាហ្សាស្ទ្រីប និងផ្លាស់ប្តូរទៅជាគោលដៅឆ្នេរកំសាន្តរបស់សហរដ្ឋអាមេរិក ។

កិច្ចប្រជុំកំពូលត្រូវបានរៀបចំឡើងដោយប្រធានាធិបតីអេហ្ស៊ីប លោក អាបដែល ហ្គាតាស អេល ស៊ីសស៊ី (Abdel-Gattah el-Sissi ) និងមានការចូលរួមពីមេដឹកនាំក្នុងតំបន់ រួមទាំងអារ៉ាប៊ីសាអូឌីត និងអារ៉ាប់រួម ដែលការគាំទ្ររបស់ពួកគេមានសារៈសំខាន់សម្រាប់គម្រោងក្រោយសង្គ្រាមណាមួយនៅហ្គាហ្សា។

ការពិភាក្សាតាមសេចក្តីរាយការណ៍ រួមមានផែនការមួយ ដែលប្រជាជនប៉ាឡេស្ទីននឹងត្រូវផ្លាស់ទីលំនៅទៅកាន់តំបន់សុវត្ថិភាព នៅខាងក្នុងហ្គាហ្សា ដែលបំពាក់ដោយផ្ទះចល័ត និងទីជម្រក ខណៈដែលទីក្រុងរបស់ខ្លួនត្រូវបានសាងសង់ឡើងវិញ ។

ក្រៅពីនោះក៏មានការពិភាក្សាគ្នា ពាក់ព័ន្ធនឹងសំណើរឲ្យក្រុមហាម៉ាស់ ប្រគល់អំណាចទៅឱ្យរដ្ឋបាលបណ្តោះអាសន្នដែលមានជំហរនយោបាយឯករាជ្យ រហូតដល់អាជ្ញាធរប៉ាឡេស្ទីន ត្រូវបានកែទម្រង់អាចគ្រប់គ្រងបាន។

ទន្ទឹមនឹងនេះ នៅពេលដែលយោធាអ៊ីស្រាអែលបន្តបើកការវាយប្រហារនៅតំបន់ វេស បែង រដ្ឋមន្ត្រីការបរទេសអ៊ីស្រាអែលបាននិយាយកាលពីថ្ងៃអង្គារ៍ថា រដ្ឋាភិបាលរបស់លោកត្រៀមខ្លួនជាស្រេចដើម្បីបន្តទៅដំណាក់កាលទីពីរនៃកិច្ចព្រមព្រៀងបទឈប់បាញ់នៅតំបន់ ហ្គាហ្សា ដរាបណាក្រុមហាម៉ាសបានត្រៀមខ្លួនរួចជាស្រេចក្នុងការដោះលែងចំណាប់ខ្មាំងចំនួន ៥៩ នាក់បន្ថែមទៀតដែលខ្លួនកំពុងចាប់ពង្រត់ពួកគេ។

ការប្រយុទ្ធគ្នានៅហ្គាហ្សាត្រូវបានបញ្ឈប់ចាប់តាំងពីថ្ងៃទី ១៩ ខែមករា ក្រោមបទឈប់បាញ់ដែលរៀបចំដោយការគាំទ្ររបស់សហរដ្ឋអាមេរិក និងកាតា និងអ្នកសម្របសម្រួលអេហ្ស៊ីប។ ចាប់តាំងពីពេលនោះមក ក្រុមហាម៉ាសបានផ្លាស់ប្តូរចំណាប់ខ្មាំងជនជាតិអ៊ីស្រាអែលចំនួន៣៣ នាក់ និងជនជាតិថៃ ៥ នាក់ ជាមួយនឹងអ្នកទោសនិងអ្នកឃុំឃាំងប៉ាឡេស្ទីនប្រមាណ ២.០០០ នាក់។