មន្រ្តីជាន់ខ្ពស់សន្តអាសនៈជួបជនភៀសខ្លួនស៊ីរីនៅភាគខាងជើងលីបង់

លោកកាឌីណាល់ ម៉ាយឃើល ហ្សឺនី (Michael Czerny) អ្នកទទួលខុសត្រូវក្រសួងអភិវឌ្ឈន៍និងលោកកំពស់មនុស្សជាតិ (the Dicastery for Promoting Integral Human Development ) នៅពេលទស្សនកិច្ចលីបង់ បានចុះផ្ទាល់ដល់ជំរំជនភៀសខ្លួនស៊ីរីនៅប្រទេសនេះ។

វ៉ាទីកង់ញូវបានរាយការណ៍ថា លោកកាឌីណាល់ បានអញ្ជើញទៅដល់ជំរំ ក្វាឡាកូស (Kfardlakos) ជាជំរំប្រមូលផ្តុំជនភៀសខ្លួនស៊ីរីនៅភាគខាងជើងលីបង់ ខ្វះខាតសម្ភារៈមូលដ្ឋាន ដោយពួកគេកំពុងតែរស់នៅក្នុងសំណង់តូចៗធ្វើពីតង់និងដី​។

លោកកាឌីណាល់ បានចុះដល់ជំរំនោះកាលពីចុងសប្តាហ៍មុន ហើយក៏បានទៅដល់កន្លែងមណ្ឌលជំនួយរបស់អង្គការការីតាស ដែលកំពុងតែជួយផ្នែកសុខភាពតាមរយៈគម្រោងដំណើរការគ្លីនិកចល័តផងដែរ។​

ប្រភពដដែលបានអះអាងថា​ជំរំនេះ គឺជាជំរំមួយក្នុងចំណោមជំរំ៥០កន្លែងដែលរាយប៉ាយនៅទូទាំងប្រទេស។  ជំរំនេះ មានមនុស្ស ១២៥នាក់ ​ឬ​ ២៥ គ្រួសារ និងអនីតិជនជាង ៦០ នាក់បន្តតស៊ូក្នុងស្ថានភាពរស់នៅដ៏លំបាករយៈពេល ១១ ឆ្នាំបន្ទាប់ពីការរត់គេចពីប្រទេសស៊ីរី។  ពួកគេរស់នៅក្នុងភាពអត់ឃ្លាន ក្រីក្រ​ និង កំពុងតែប្រឈមមុខនឹងអាកាសធាតុដ៏ត្រជាក់​។

ស្ថានភាពមនុស្សជាតិនៅទីនោះគឺអាក្រក់ ប៉ុន្តែលោកកាឌីណាល់ បានកោតសរសើរអំពីភាពអំណត់និងការតស៊ូប្រកបដោយសេចក្តីសង្ឃឹមរបស់ពលរដ្ឋទាំងនោះ៕