មនុស្ស៣,៣ពាន់លាននាក់កំពុងរស់នៅក្នុងប្រទេសដែលចំណាយខ្ពស់លើសេវាបំណុល

វ៉ាទីកង់ញូវបានរាយការណ៍ថា មកដល់ពេលនេះនៅលើពិភពលោកទាំងមូលមានមនុស្សប្រមាណជា ៣,៣ ពាន់លាននាក់ពួកគេកំពុងតែរស់នៅក្នុងប្រទេសដែលបានចំណាយប្រាក់យ៉ាងច្រើនលើសេវាបំណុលជាងការថែទាំសុខភាពនិងសុខមាលភាពសង្គមរបស់ប្រជាជន ។

ប្រភពដដែលបានដកស្រង់របាយការណ៍មួយរបស់ធនាគារពិភពលោកថា នៅក្នុងចំណោមប្រជាពលរដ្ឋទាំងនោះ គឺមានប្រជាជន ២,១ពាន់លាននាក់រស់នៅក្នុងប្រទេសដែលចំណាយច្រើនជាងលើសេវាបំណុល ពោលគឺខ្ពស់ជាងការចំណាយផ្សេងៗនៅលើវិស័យ អប់រំ។

ប្រភពដដែលបានកត់សម្គាល់ថា ប្រទេសដែលមានចំណូលទាប និងមធ្យមឥឡូវនេះប្រឈមមុខនឹងកម្រិតបំណុលខ្ពស់ជាងក្នុងទសវត្សរ៍មុនជំងឺរាតត្បាត ដែលធ្វើឱ្យវាពិបាកសម្រាប់ពួកគេក្នុងការវិនិយោគលើហេដ្ឋារចនាសម្ព័ន្ធសំខាន់ៗ ដូចជាថាមពលស្អាត និងការបន្សាំអាកាសធាតុ។

តាមការស្រាវជ្រាវបានឲ្យដឹងថា  កាលពីឆ្នំា២០២៣ ប្រទេសកំពុងអភិវឌ្ឍន៍នានាបានចំណាយដល់ទៅ ១,៤ទ្រី លានដុល្លារលើសេវាបំណុល ពោលគឺជិត ៤% នៃប្រាក់ចំណូលជាតិសរុបរបស់ពួកគេ។