ព្រះសហគមន៍កម្ពុជាចេញសារអំពាវនាវ​ឲ្យមានបទឈប់បាញ់ និង​សុំសន្តិភាព

នៅរសៀលថ្ងៃទី១២ ខែ​ធ្នូនេះ ក្នុង​ថ្ងៃបុណ្យគោរពព្រះនាងព្រហ្មចារិនីម៉ារី នៅហ្គ័រដាឡូពេ លោកអភិបាល​ព្រះសហគមន៍កាតូលិក​នៅកម្ពុជា​ទាំងបីភូមិភាគរួមមាន លោកអភិបាល​អូលីវីយ៉េ ជ្មីតហស្លេនៃភូមិភាគភ្នំពេញ លោក​សិលា សួន ហង្សលីនៃភូមិភាគកំពង់ចាមនិងជាអភិបាល​ឧបត្ថម្ភកៈនៃភូមិភាគភ្នំពេញ និង​លោកអេនរីគេ ហ្វីការេដូនៃភូមិភាគបាត់ដំបង ​បាន​ចេញ​សេចក្តី​អំពាវនាវឲ្យមានបទឈប់បាញ់ និងសុំសន្តិភាព។

នៅក្នុង​សារនោះ​បាន​សរសេរថា ក្នុងនាម​ថ្នាក់ដឹកនាំរបស់​ព្រះសហគមន៍កាតូលិកនៅកម្ពុជា លោក​​សោកស្ដាយ និងមានទុក្ខព្រួយយ៉ាងខ្លាំង ចំពោះការផ្ទុះជម្លោះឡើងវិញនៅតាមព្រំដែនកម្ពុជា-ថៃ។

ក្រុម​លោក​អភិបាល​ព្រះសហគមន៍​បាន​លើកឡើង​នូវ​ព្រះ​បន្ទូលរបស់ព្រះយេស៊ូដែលមានព្រះបន្ទូលថា៖ «អ្នកណាកសាងសន្តិភាព អ្នកនោះមានសុភមង្គលហើយ ដ្បិតពួកគេនឹងមានឈ្មោះជាបុត្ររបស់ព្រះជាម្ចាស់» (ម៉ាថាយ ៥,៩)។

ដោយ​ក្នុងនោះ​ ព្រះសហគមន៍​បាន​ជឿថា មនុស្សគ្រប់រូបត្រូវ​បានបង្កើតឡើងជារូបតំណាងរបស់ព្រះជាម្ចាស់ ហេតុនេះហើយពួកគេ «​ត្រូវតែទទួលបាន​ការគោរពដោយថ្លៃថ្នូរ និងសេចក្តីស្រឡាញ់ដ៏ពេញលក្ខណៈ»។

ក្នុងពេល​វឹកវរនេះ អស់លោកបាន​អំពាវនាវដល់រដ្ឋាភិបាល និងថ្នាក់ដឹកនាំកម្ពុជា​ សូមបញ្ឈប់ការបាញ់ប្រហារជាបន្ទាន់ ហើយបន្តការចរចានិងកិច្ចការទូត ដើម្បីស្វែងរកដំណោះស្រាយដែលលើកកម្ពស់ប្រយោជន៍រួម និងសន្តិភាពពិតប្រាកដ ដោយគោរពនូវសេចក្តីថ្លៃថ្នូររបស់មនុស្សម្នាក់ៗ។

ជាមួយគ្នានេះដែរ លោកអភិបាលព្រះសហគមន៍ ជំរុញឲ្យ «គ្រីស្តបរិស័ទធ្វើជាភ្នាក់ងារនៃសន្តិភាព» លើកកម្ពស់ការយោគយល់គ្នា ការគោរពគ្នា ហើយជាពិសេសសូមអធិស្ឋានសម្រាប់សន្តិភាព ក្នុងអំឡុងពេលរៀបចំសម្រាប់បុណ្យព្រះយេស៊ូប្រសូតដែលជាព្រះអម្ចាស់នៃសន្តិភាព។

យ៉ាងណាមិញ​ លោក​បាន​បន្ថែម​ថា សូមឲ្យការរួមចំណែក និងការប្តេជ្ញាចិត្តរបស់គ្រីស្តបរិស័ទ​ចំពោះសន្តិភាពនាំទៅរកអនាគតដ៏ភ្លឺស្វាងមួយ ហើយសូមឲ្យសេចក្តីស្រឡាញ់ និងសេចក្តីមេត្តាករុណាយកឈ្នះលើសេចក្តីស្អប់ និងការបែកបាក់។

ក្នុងលិខិតដដែលនោះ ក្រុមលោកអភិបាល​បានអធិដ្ឋានសម្រាប់ជនរងគ្រោះទាំងអស់ ទាំងទាហាន និងជនស៊ីវិល ដែលបានបាត់បង់ជីវិត ហើយនិង​​គ្រួសារជនភៀសសឹកទាំងអស់ ជាពិសេសកុមារ អ្នកជំងឺ និងជនងាយរងគ្រោះ តាម​រយៈ​ព្រះនាងព្រហ្មចារិនីម៉ារី ជាក្សត្រីនៃសន្តិភាព សូមជួយអង្វរ​ព្រះជាម្ចាស់។