ព្រះសហគមន៍កាតូលិកភូមិភាគភ្នំពេញនៅកម្ពុជា បានរៀបចំកិច្ចសន្ទនាអន្តរសាសនាអន្តរជាតិលើកទី៨ រវាងព្រះពុទ្ធសាសនានិងគ្រីស្តសាសនា ក្រោមប្រធានបទ «ពុទ្ធបរិស័ទនិងគ្រីស្តបរិស័ទរួមគ្នារក្សាសុខដុមនីយកម្មសាសនាដោយភាពធន់» ក្រោមអធិបតីភាពរបស់ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា លោកកាឌីណាល់ចក យ៉ាកុប កូវ៉ាកាដ (Cardinal George Jacob Koovakad) រដ្ឋមន្ត្រីក្រសួងកិច្ចសន្ទនាអន្តរសាសនានៃបុរីវ៉ាទីកង់ រួមនិងតំណាងសម្តេចសង្ឃទាំងពីរគណៈនៅក្នុងប្រទេសកម្ពុជា លោកអគ្គអភិបាល អភិបាល បូជាចារ្យ ភ្ញៀវជាតិនិងអន្តរជាតិ តំណាងសាសនានានា គ្រីស្តបរិស័ទ និងពុទ្ធបរិស័ទប្រមាណជិត២០០នាក់នាព្រឹកថ្ងៃទី២៧ ខែឧសភានេះ។
កម្មវិធីនេះរៀបចំនៅមណ្ឌលសកម្មភាពភូមិភាគភ្នំពេញ នារាជធានីភ្នំពេញ ដើម្បីបន្តដំណើរការបើកចំហកិច្ចសន្ទនានៃសាសនាទាំងពីរ ក្នុងបំណងជំរុញសុខដុមរមនា និងសន្តិភាពជាសាធារណៈ។
សម្តេចឧត្តមបញ្ញាកិត្តិបណ្ឌិត ដួង ផង់ អនុប្រធានថេរសភានៃព្រះពុទ្ធសាសនានៅកម្ពុជា និងជាព្រះរាជតំណាងដ៏ខ្ពង់ខ្ពស់របស់សម្តេច ព្រះមហាសុមេធាធិបតីកិត្តិបណ្ឌិត អំ លីមហេង សម្តេចព្រះសង្ឃនាយកគណៈមហានិកាយនៃព្រះរាជាណាចក្រកម្ពុជា មានសង្ឃដីកាថា ប្រសិនបើបុគ្គលគ្រប់រូប បដិបត្តិនិងអនុវត្តនូវធម៌ព្រះសម្មាសម្ពុទ្ធ នោះនឹងទទួលបាននូវតម្លៃនៃការរស់នៅ ប្រកបដោយគុណធម៌ សមធម៌ សាមគ្គីធម៌ សង្គហធម៌ ការយោគយល់អធ្យាស្រ័យគ្នា និងសេចក្តីថ្លៃថ្នូរ ប្រាសចាកការប្រមាទគ្នា នោះសុខសន្តិភាព ស្ថេរភាព សុវត្ថិភាព សុខដុមនីយកម្មសាសនា សុភមង្គល វិបុលភាព ភាពរុងរឿង និងវឌ្ឍនភាពពិតជាបានស្ថិតនៅជាដរាបសម្រាប់មនុស្សជាតិ និងពិភពលោកទាំងមូល។
ក្នុងនោះដែរ សម្តេចព្រះមង្គលទេព្វាចារ្យ វង្ស អានេតា សម្តេចព្រះសង្ឃនាយករងនៃគណៈធម្មយុត្តិកនិកាយនៃប្រទេសកម្ពុជា ព្រះរាជតំណាងដ៏ខ្ពង់ខ្ពស់របស់សម្តេចព្រះសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ មានបន្ទូលថា ព្រះពុទ្ធសាសនាបង្រៀនអំពីមេត្តាធម៌ ការអត់ធ្មត់ និងការយល់ឃើញអំពីសភាពពិតនៃជីវិត ចំណែកគ្រីស្តសាសនាលើកទឹកចិត្តអំពីសេចក្តីស្រឡាញ់ ការអត់ឱន និងការលើកលែងទោស។
ព្រះអង្គថា «គោលការណ៍ទាំងនេះអាចជួយឲ្យមនុស្សជាតិរស់នៅដោយសុខសាន្ត ទោះបីមានភាពខុសគ្នាក៏ដោយ និងអាចក្លាយជាគំរូដ៏ល្អនៃការរួមរស់ដោយសន្តិភាព និងការសហការគ្នាដើម្បីប្រយោជន៍រួមរបស់មនុស្សជាតិ។»
កាឌីណាល់ ចក យ៉ាកុប កូវ៉ាកាដ រដ្ឋមន្ត្រីក្រសួងកិច្ចសន្ទនាអន្តរសាសនានៃបុរីវ៉ាទីកង់ មានប្រសាសន៍ថា សន្តិភាពចាប់ផ្តើមនៅក្នុងចិត្ត និងអាចផ្លាស់ប្តូរពិភពលោក ហើយការផ្សះផ្សា និងការតស៊ូយ៉ាងស្វិតស្វាញ នឹងអាចព្យាបាលពិភពលោកដែលបែកបាក់ ហើយជំនឿទាមទារឲ្យមានការអាណិតអាសូរចំពោះទុក្ខវេទនា និងក្លាហានប្រឆាំងនឹងភាពអយុត្តិធម៌។
កាឌីណាល់បន្តថា «នៅពេលពិភពលោកស្ពឹកស្រពន់ចំពោះសម្រែកយំសោករបស់ជនភៀសខ្លួន និងជនរងគ្រោះដោយការកេងប្រវ័ញ្ច ជំនួបរបស់យើងត្រូវតែជាសាក្សីដ៏រស់រវើកមួយ គឺថាសន្តិភាពនៅតែអាចធ្វើទៅបាន»។
ដើម្បីក្លាយជាអ្នកកសាងសន្តិភាព លោកបានសុំឲ្យម្នាក់ៗ បំបាត់ភាពស្ពឹកស្រពន់នេះ ហើយរើសយកសេចក្តីសង្ឃឹមជាជាងការបោះបង់ចោល និងថែរក្សាអ្នកមានបន្ទុកខណៈអ្នកផ្សេងទៀតមិនរវីរវល់។ លោកថា សូមឲ្យយើងក្លាយជាសិល្បករដែលចេះព្យាបាល មិនគ្រាន់តែសម្រាប់ពិភពលោក តែសម្រាប់អ្នកដែលមានសេចក្តីត្រូវការ ដោយយើងរួមគ្នាកំចាត់ហិង្សា ការរើសអើង និងភាពលោភលន់។
លោកបន្ថែមថា អំណាចស្មារតីនៃការផ្សះផ្សារនិងភាពធន់ អាចជំនះរនាំងឧបសគ្គ ប្រសិនបើយើងហ៊ានស្តាប់គ្នា ហ៊ានធ្វើ និងហ៊ានស្រឡាញ់លើសពីព្រំដែនរបស់យើង។ ប្រសិនបើយើងរួមគ្នាក្នុងព្រះវិញ្ញាណដ៏វិសុទ្ធ និងចេញឲ្យផុតពីច្រវ៉ាក់នៃមនោគមវិជ្ជា យើងអាចនិយាយថា «ទេចំពោះសង្គ្រាម និងឆ្លើយបាទឬចាសចំពោះសន្តិភាព និងឆ្លើយថាទេ ចំពោះការបំផ្លិចបំផ្លាញ និង ឆ្លើយថាបាទឬចាស ចំពោះការព្យាបាល»។
ក្នុងឱកាសនោះឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការនិងសាសនា បានកោតសរសើរនិងវាយតម្លៃខ្ពស់ចំពោះសកម្មភាពនាពេលកន្លងមក ក៏ដូចជាចក្ខុវិស័យនៃបេសកកម្មដែលត្រូវអនុវត្តបន្ត ដើម្បីរួមគ្នាថែរក្សាសុខដុមនីយកម្មសាសនា នៅកម្ពុជារបស់ព្រះសហគមន៍កាតូលិក។
លោករដ្ឋមន្ត្រី បានចាត់ទុកកិច្ចសន្ទនាអន្តរសាសនាអន្តរជាតិលើកទី៨ រវាងពុទ្ធសាសនា និងគ្រីស្តសាសនា ថាពិតជាមានសារៈសំខាន់ណាស់ ដោយមិនគ្រាន់តែបានចូលរួមចំណែកឱ្យយល់ដឹងអំពីគុណតម្លៃរួម ភាពផ្សេងគ្នា ការយោគយល់គ្នា ការលើកកម្ពស់សាមគ្គីធម៌ក្នុងនាមជាបងប្អូនរួមជាតិ និងរួមចំណែកឱ្យមានសុខដុមរមនាសាសនានៅប្រទេសកម្ពុជាប៉ុណ្ណោះទេ ប៉ុន្តែកិច្ចសន្ទនានេះ នឹងផ្ដល់វិភាគទានដ៏សំខាន់ដល់សុខដុមរមនាសាសនានៅក្នុងតំបន់ និងពិភពលោកផងដែរ។
លោក អូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញនៅកម្ពុជា បានគូសបញ្ជាក់ថា ជំនួបនេះ ស្ថិតលើកិច្ចសន្ទនាចំនួន៤សំខាន់ៗ គឺកិច្ចសន្ទនានៃជីវិត កិច្ចសន្ទនានៃសកម្មភាព កិច្ចសន្ទនានៃការផ្លាស់ប្តូរទ្រឹស្តីនិងជំនឿ និងកិច្ចសន្ទនាខាងបទពិសោធនៃសាសនា។
ក្នុងឱកាសនោះដែរ លោកអភិបាលភ្នំពេញបានអរគុណសន្តិភាពសម្រាប់ប្រទេសកម្ពុជាដែលជាគំរូយ៉ាងពិសេសចំពោះតំបន់និងសកលលោកដែលជាប្រទេសមួយមានសុខសន្តិភាព មានសុខដុមនីយកម្មខាងផ្នែកសាសនានិងសុខសុវត្ថិភាពគ្រប់ទីកន្លែង។
លោកអភិបាល អូលីវីយ៉េ បានបញ្ជាក់ថា សន្តិភាពមិនត្រឹមតែគ្មានជម្លោះប៉ុណ្ណោះទេ តែថែមទាំងជាវត្តមានយ៉ាងសកម្មនៃយុត្តិធម៌ មេត្តាករុណានិងការសន្ទនា ផ្សះផ្សាក្នុងជីវិតប្រចាំថ្ងៃ ការរស់នៅដោយភាតរភាពប្រកបដោយភាពសុខដុមរមនា។
លោកថា វត្តមានរបស់ឯកឧត្តមរដ្ឋមន្ត្រីក្នុងថ្ងៃនេះ និងតំណាងជាន់ខ្ពស់បំផុតនៃសម្តេចសង្ឃទាំងពីរនិកាយ គឺឲ្យយើងមើលឃើញសន្តិភាពយ៉ាងជាក់ស្តែង។
លោកអភិបាលព្រះសហគមន៍ភ្នំពេញបញ្ជាក់ថា «សព្វថ្ងៃនៅក្នុងប្រទេសកម្ពុជា សាសនានីមួយៗធ្វើដំណើររួមជាមួយគ្នា ដើម្បីជួយឲ្យប្រជារាស្ត្រ រស់នៅក្នុងមេត្តាករុណា សុខដុមរមនានិងកសាងសង្គមដែលមើលឃើញអនាគតនិងពោរពេញដោយសេចក្តីសង្ឃឹម។»
បន្ទាប់ពីកម្ពុជាឆ្លងផុតវាលពិឃាត ទំនាក់ទំនងការទូតត្រូវបានស្ថាបនាឡើងវិញរវាងព្រះរាជាណាចក្រកម្ពុជានិងសន្តអាសនៈ ក្នុងឆ្នាំ ១៩៩៤ ព្រះសហគមន៍កាតូលិកនៅកម្ពុជា បានអនុវត្តតួនាទីសកម្មខាងការផ្សះផ្សា និងបង្កើតសុខដុមនីយកម្មសាសនា។ កន្លងមកទំនាក់ទំនងរវាងព្រះសហគមន៍និងសហគមន៍ពុទ្ធសាសនា បានខិតខំរួមគ្នាក្នុងសកម្មភាពអប់រំ ជំនួយមនុស្សធម៌ និងការកសាងសន្តិភាព ដើម្បីសង្គមសន្តិភាព។
កិច្ចសន្ទនាអន្តរសាសនាអន្តរជាតិនេះផ្តួចផ្តើមឡើងដោយបុរីវ៉ាទីកង់ នាឆ្នាំ ១៩៩៥ នៅកោះតៃវ៉ាន់ និងបានរៀបចំឡើងជាបន្តបន្ទាប់នៅប្រទេសជាច្រើនដូចជា ឥណ្ឌា ជប៉ុន អ៊ីតាលី ថៃ និងចុងក្រោយគឺប្រទេសកម្ពុជា។
កែវ កញ្ញា
Daily Program
