យោងតាមមន្រ្តីជាន់ខ្ពស់មួយរូបរបស់អ៊ុយក្រែនបានឲ្យដឹងថា សហរដ្ឋអាម៉េរិកបានធ្វើសំណើរមកកាន់អ៊ុយក្រែននូវផែនការសន្តិភាព ដែលស្នើថា ទីក្រុងគៀវត្រូវធ្វើសម្បទានដីរួមទាំងតំបន់គ្រីមៀទៅឲ្យរុស្ស៊ី និងកាត់បន្ថយយោធារបស់ខ្លួនពាក់កណ្តាល។ ទីក្រុងវ៉ាស៊ីនតុនមិនបានបញ្ជាក់អំពីព័ត៌មាននេះទេ។
កាលពីថ្ងៃពុធ ទី១៩ ខែវិច្ឆិកា អ៊ុយក្រែនបានទទួលនូវសំណើរសន្តិភាពថ្មីមួយពីភាគីសហរដ្ឋអាម៉េរិក ដែលទាមទារថា អ៊ុយក្រែនត្រូវប្រគល់ដីមួយចំនួនទៅឲ្យរុស្ស៊ី និងកាត់បន្ថយយោធារបស់ខ្លួនពាក់កណ្តាល។
យោងតាមការរៀបរាប់របស់មន្រ្តីជាន់ខ្ពស់អ៊ុយក្រែនមួយរូបដោយសុំមិនបញ្ចេញឈ្មោះ បានឲ្យដឹងថា ផែនការរបស់អាម៉េរិកហាក់ដូចជាយកមកប្រើឡើងវិញនូវលក្ខខណ្ឌអតិបរមាដែលទាមទារដោយរុស្ស៊ីតាំងពីមុនការចរចាសន្តិភាព។ ទាំងនេះគឹជាការទាមទារដែលត្រូវបានបដិសេធចោលដោយទីក្រុងគៀវរួចហើយ ដែលវាមានន័យក្នុងការអនុវត្តថា ជាការចុះចាញ់។
ប្រភពនេះ រៀបរាប់ដែរថា សំណើរសន្តិភាពរួមបញ្ចូលការទទួលស្គាល់ការភ្ជាប់ជាឧបសម្ព័ន្ធនៃតំបន់គ្រីមៀ និងតំបន់ដទៃៗ ទៀតដែលកាន់កាប់យកដោយរុស្ស៊ី និងកាត់បន្ថយទាហានអ៊ុយក្រែនឲ្យនៅត្រឹម ៤០០០០០នាក់។ អ៊ុយក្រែនក៏គួរតែបោះបង់ចោលនូវរាល់សព្វាវុធរយៈចម្ងាយឆ្ងាយទាំងអស់របស់ខ្លួន។ មន្រ្តីជាន់ខ្ពស់អ៊ុយក្រែនបានបន្ថែមថា ៖ “ភាពខុសគ្នាតិចតួចគឹថា យើងមិនយល់ថា តើវាគឹជាពិតជាផែនការរបស់លោកត្រាំ ឬមនុស្សជុំវិញលោកឬយ៉ាងណា?” លោកក៏បានវិនិច្ឆ័យថា វាដូចជាស្រពិចស្រពិលអំពីព័ត៌មានលើអាកប្បកិរិយានេះ និងថា រុស្ស៊ីនឹងសន្មត់ទទួលយកផែនការថ្មីនេះឬយ៉ាងណាដែរ?
ប្រព័ន្ធផ្សព្វផ្សាយអាម៉េរិក អាស្យូស (Axios) កាលពីមុនធ្លាប់បានបញ្ជាក់ថា ទីក្រុងមូស្គូ និងទីក្រុងវ៉ាស៊ីនតុន ធ្វើការសម្ងាត់ជាមួយគ្នាលើផែនការដើម្បីបញ្ចប់សង្រ្គាមដែលបង្កឡើងដោយទីក្រុងមូស្គូប្រឆាំងនឹងប្រទេសជិតខាងអស់រយៈពេលជិត ៤ឆ្នាំ មកហើយ។
តើអ្វីធ្វើឲ្យមានដំណើរទស្សនកិច្ចមកកាន់ទីក្រុងគៀវរបស់រដ្ឋលេខាធិការនៃកងទ័ពអាម៉េរិក លោកដានីញ៉ែល ឌ្រីស្កូល ដែលបានជួបប្រមុខមេបញ្ជាការកងទ័ពអ៊ុយក្រែន លោកអូឡិចសានដ្រ៍ សៀស្គី។
នៅលើបណ្តាញតេឡេក្រាម ដោយមិនអធិប្បាយអំពីផែនការថ្មីរបស់អាម៉េរិក លោកអូឡិចសានដ្រ៍ សៀស្គី បានរៀបរាប់ថា ជាថ្មីម្តងទៀត លោកបញ្ជាក់ថា ការពង្រឹងការការពារដែនអាកាសអ៊ុយក្រែន ការពង្រីកសមត្ថភាពការវាយប្រហាររយៈចម្ងាយឆ្ងាយប្រឆាំងនឹងគោលដៅយោធាសត្រូវ ព្រមទាំងការរក្សា និងធ្វើឲ្យមានស្ថិរភាពនៃខ្សែសមរភូមិជួរមុខ នឹងធ្វើឲ្យទន់ខ្សោយដល់សក្តានុពលវាយប្រហាររបស់សត្រូវ និងបង្ខំឲ្យពួកគេចុងក្រោយនឹងទទួលយកសន្តិភាពដែលមានយុត្តិធម៌។
ប្រទេសរុស្ស៊ី ដែលបានគ្រប់គ្រងប្រមាណ ២០% នៃទឹកដីអ៊ុយក្រែន ទាមទារថា ផែនការសន្តិភាពគឺត្រូវ ប្រគល់តំបន់ ៥ និងបដិសេធការចូលណាតូ។ ចំណែកទីក្រុងគៀវបដិសេធ និងទាមទារឲ្យមានការពង្រាយកងកម្លាំងលោកខាងលិចលើទឹកដីអ៊ុយក្រែនដែលនៅសល់ក្រោមការគ្រប់គ្រងរបស់ខ្លួន ដែលនេះគឺជាអ្វីដែលរុស្ស៊ីវិនិច្ឆ័យថា គឺមិនអាចទទួលយកបាន។
ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី ស្ថិតនៅប្រទេសទួរគីកាលពីថ្ងៃពុធ ដែលលោកបានព្យាយាមដោយគ្មានបានផលឲ្យមានការចាប់ផ្តើមឡើងវិញនូវកិច្ចចរចាសន្តិភាព។ ប៉ុន្តែចេញពីជំនួបជាមួយសមភាគីទួរគី លោករ៉ឺសេព តៃយីព អៀដូហ្គង់ នៅអង់ការ៉ា លោកអាចគ្រាន់តែសង្ឃឹមថា នឹងមានការចាប់ផ្តើមការដោះដូរឈ្លើយសឹកបន្ថែមជាមួយរុស្ស៊ីពីពេលនេះទៅដល់ដំណាច់ឆ្នាំ។
Daily Program
