ប្រមុខការទូតវ៉ាទីកង់ចាកចេញពី ហុងគ្រីជាមួយនឹងសារសន្តិភាព និង ជំនឿ

លោកអគ្គអភិបាល ប៉ូល រីឆាត ហ្គាឡាហ្គ័រ  (Paul Richard Gallagher) រដ្ឋមន្រ្តីក្រសួងទំនាក់ទំនងជាមួយរដ្ឋនិងអង្គការអន្តរជាតិបានបញ្ចប់ដំណើរទស្សនកិច្ចនៅប្រទេសហុងគ្រីប្រកបដោយផ្លែផ្កាជាមួយនឹងសារសន្តិភាព និង ជំនឿ។

វ៉ាទីកង់ញូវបានរាយការណ៍ថា នៅក្នុងដំណើរទស្សនកិច្ចពីថ្ងៃទី ២៧ ដល់ថ្ងៃទី ៣០ ខែមីនា ឆ្នាំ ២០២៥ លោកអគ្គអភិបាលបានចែករំលែកនូវសារសន្តិភាព ជំនឿ និង រឹតបន្តឹងទំនាក់ទំនងរវាងសន្តអាសនៈដែលមានសម្តេចប៉ាបហ្រ្វង់ស៊ីស្កូដឹកនាំ នៅក្នុងប្រទេសដែលមានទីតាំងស្ថិតនៅ អឺរ៉ុបកណ្តាលមួយនេះ។​

ក្នុងអំឡុងពេលនោះ លោកអគ្គអភិបាល បាននាំយកកិច្ចស្វាគមន៍ និងព្រះពរពី​សម្តេចប៉ាប ហើយបានរំលឹកឡើងវិញនូវគ្រោះថ្នាក់នៃរបបប្រល័យពូជសាសន៍នៅក្នុងអំឡុងសម័យសង្រ្គាមលោកលើកទីពីរ និង បានរំលឹកនូវកិច្ចខិតខំប្រឹងប្រែងរបស់សន្តអាសនៈនៅក្នុងអំឡុងពេលនោះ ដែលមាន​កិច្ចខិតខំប្រឹងប្រែងការពារជនជាតិយូដា។

នៅក្នុងពេលពេលជួបពិភាក្សា ជាមួយរដ្ឋមន្ត្រីក្រសួងការបរទេស និងពាណិជ្ជកម្មហុងគ្រី លោក ភីធ័រ ស៊ីហ្សាតូ (Péter Szijjártó ) លោកអគ្គអភិបាល បានចែករំលែកលើ ប្រធានបទ «ការកសាងសន្តិភាពសកល៖ តួនាទីសាសនា និងការទូតក្នុងការដោះស្រាយជម្លោះ»។

លោកបានអះអាងថា ការពិភាក្សានេះគឺធ្វើឡើងស្របតាម​ពេលវេលា ជាពិសេសនៅក្នុងអំឡុងពេលដែលសង្រ្គាមនៅអ៊ុយក្រែនបានអង្រួនមូលដ្ឋានគ្រឹះនៃសន្តិសុខអឺរ៉ុប ខណៈដែលជម្លោះនៅមជ្ឈិមបូព៌ានៅតែបន្តកើនឡើង ដោយមានវិបត្តិអ៊ីស្រាអែល និងប៉ាឡេស្ទីនឈរនៅជួរមុខ៕