បុរីវ៉ាទីកង់រៀបចំពិធីអធិដ្ឋាននិងសូត្រផ្គាំសម្រាប់សុខភាពរបស់សម្តេចប៉ាប

ការិយាល័យព័ត៌មានវ៉ាទីកង់បានប្រកាសថា សន្តអសនៈបានរៀបចំពិធីអធិដ្ឋាននិងសូត្រផ្គាំ​ដើម្បីទូលអង្វរព្រះជាម្ចាស់ឲ្យសុខភាពរបស់សម្តេចប៉ាបហ្រ្វង់ស៊ីស្កូ ជាសះស្បើយឡើងវិញ ក្រោយពេលដែលបានចូលសម្រាក់ពេទ្យតាំងពីថ្ងៃទី​១៤ ខែ កុម្ភៈ​ឆ្នាំ​២០២៥ ។​

ប្រភពដដែលបានឲ្យដឹងថា ពិធីនេះបានរៀបចំឡើងក្រោមអធិបតីភាពរបស់លោកកាឌីណាល់​ ព្យែត្រូ ផារ៉ូលីន នាយករដ្ឋមន្រ្តីនៃសន្តអាសនៈ នៅទីលានសន្តសិលា កាលពីយប់ថ្ងៃទី​២៤ ខែ​កុម្ភៈ នៅវេលាម៉ោង ៩ យប់ ។

ពិធីនេះបានទាក់ទាញអ្នកចូលរួមជាច្រើនរយនាក់ ដោយមានតាំងពីលោកកាឌីណាល់ លោកអភិបាល សមាជិកនៃក្រុមប្រឹក្សានានាចំណុះអោយរដ្ឋបាលគ្រប់គ្រងរបស់សន្តអាសនៈ និងគ្រីស្តបរិស័ទនានា ទោះបីជានៅថ្ងៃនោះមានភ្លៀងធ្លាក់ ហើយស្ថានភាពចរាចរណ៍ស្ទះខ្លាំងក៏ដោយចុះ ។​

ក្រៅពីអ្នកដែលចូលរួមផ្ទាល់ គ្រិស្តបរិស័ទក៏អាចនឹងចូលរួមអធិដ្ឋានតាមអនឡាញជាមួយនឹងគណកម្មការរៀបចំ នៅទីលានសន្តសិលា​តាមរយៈឧបករណ៍ផ្សាយផ្ទាល់ពីកម្មវីធីនោះ ។

សម្តេចប៉ាបបានធ្លាក់ខ្លួនមានជំងឺផ្លូវដង្ហើមនិងត្រូវបានបញ្ជូនចូលមន្ទីរពេទ្យតាំងតែពីថ្ងៃសុក្រ​ទី ១៤ ខែ កម្ភៈ ឆ្នាំ២០២៥ ហើយមកដល់ពេលនេះស្ថានភាព មិនទាន់ប្រសើរនៅឡើយទេ ។​