នៅវៀតណាម លោកស៊ី ជីនពីង រិះគន់ខ្លាំងលទ្ធិគាំពារនិយម​មិននាំទៅដល់ណាទេ

ក្នុងអំឡុងដំណើរទស្សនកិច្ចមកកាន់តំបន់អាស៊ីអាគ្នេយ៍ ដែលមានគោលដៅពង្រឹង​ទំនាក់ទំនងពាណិជ្ជកម្មជាមួយទីក្រុងប៉េកាំង កាលពីថ្ងៃទី១៤ ខែមេសា នៅប្រទេស​វៀតណាម ប្រធានាធិបតីចិន លោកស៊ី ជីនពីង បានបរិហារលទ្ធិគាំពារ​និយម ដែលមិននាំ​ទៅ​ដល់​លទ្ធផលល្អណាមួយទេ នៅខណៈដែលវាត្រូវបានប្រើជាមួយសង្រ្គាមពន្ធគយ​របស់​សហរដ្ឋអាម៉េរិក។

យោងតាមទីភ្នាក់ងារសារព័ត៌មានចិនថ្មី បានឲ្យដឹងថា លោកស៊ី បានបញ្ជាក់ថា មិនមានអ្នក ឈ្នះ​ណាមួយ​ដែលអាចលេចឡើងពីជម្លោះពាណិជ្ជកម្មបែបនេះនោះទេ។

នៅប្រទេសវៀតណាម ដែលលោកបានមកដល់កាលពីថ្ងៃចន្ទ សម្រាប់ជំហានដំបូងនៃដំណើរ ទស្សនកិច្ចរបស់លោកមុននឹងទៅកាន់ប្រទេសម៉ាឡេស៊ី និងកម្ពុជា។ ដំណើរទស្សនកិច្ចនេះ មាន​គោលដៅជាអាទិ៍ដើម្បីសម្រាលឥទ្ធិពលនៃច្បាប់ពន្ធគយហាមឃាត់ដែលចេញក្រឹត្យ​ដោយ ប្រធានាធិបតីអាម៉េរិក លោកដូណាល់ ត្រាំ ប្រឆាំងនឹងផលិតផលចិន។

ទីក្រុងប៉េកាំង បានថ្លែងថា លោកស៊ី ជីនពីងត្រូវជួបសមភាគីចំនួន ៣ រូបនៅតំបន់អាស៊ី អាគ្នេយ៍នៅអំឡុងការធ្វើដំណើរ ដែលគ្របដណ្តប់លើសារសំខាន់ជាចម្បងសម្រាប់តំបន់។

ដំណើរទស្សនកិច្ចនេះក៏សំដៅធ្វើឲ្យប្រទេសចិនលេចឡើងជាមួយដៃគូដ៏មានទំនុកចិត្ត ស្ថិរភាព ផ្ទុយពីសហរដ្ឋអាម៉េរិកដែលបានបង្កើតការវាយប្រហារខាងពាណិជ្ជកម្ម​គ្រប់ទិស​ជា​មធ្យោ​បាយ​ថ្មីដោយប្រើច្បាប់ពន្ធគយ រួមទាំងប្រឆាំងនឹងដៃគូសេដ្ឋកិច្ចផងដែរ។

នៅក្នុងអត្ថបទមួយដែលផ្សព្វផ្សាយនៅក្នុងកាសែតវៀតណាម ង៉ានដាន ដែលលើកឡើង ដោយ​កាសែតចិនថ្មី ប្រធានាធិបតីចិនបានផ្ញើសារទៅកាន់វៀតណាមថា ៖ “ប្រទេសយើងទាំង ពីរត្រូវការថែរក្សាឲ្យបានម៉ត់ចត់នូវប្រព័ន្ធពាណិជ្ជកម្មពហុភាគី ស្ថិរភាព​នៃចង្វាក់ឧស្សាហកម្ម និង​ការផ្គត់ផ្គង់ពិភពលោក ព្រមទាំងបរិស្ថានអន្តរជាតិបើកចំហរ និងសហប្រតិបត្តិការ”។ លោក​ស៊ី ជីនពីង បានបញ្ជាក់ថា ៖ “សង្រ្គាមពាណិជ្ជកម្ម និងសង្រ្គាមតារាងពន្ធគយ​នឹងមិនធ្វើ ឲ្យ​នរណាឈ្នះទេ ហើយលទ្ធិគាំពារនិយម​ក៏មិននាំទៅកាន់ទីណាដែរ”។

ច្បាប់ពន្ធគយរបស់អាម៉េរិកត្រូវបានកំណត់សម្រាប់ផលិតផលចិន ១៤៥%។ នេះគឺជាវិធាន​ការ​ដែល​ធ្វើឲ្យញ័ររញ្ជួយទីផ្សារពិភពលោក និងនាំឲ្យ​ទីក្រុងប៉េកាំងធ្វើ​ការ​វាយ​បក។

យោងតាមទិន្នន័យពន្ធគយចិន បានឲ្យដឹងថា តំបន់អាស៊ីអាគ្នេយ៍គឺជាមជ្ឈមណ្ឌលកណ្តាល​នៃ​​កា​រ​នាំចេញរបស់ចិន។ កាលពីឆ្នាំមុន ប្រទេសនានា​នៃប្លុកតំបន់ អាស៊ាន គឺជាគោលដៅ​នាំ​ចេញ​ទី១ ជាមួយនឹងទឹកប្រាក់ ៥៨៦,៥ ពាន់លានដុល្លារជា​សរុប។ ក្នុងចំណោមប្រទេស​ទាំង​នេះ វៀតណាមបានទទួលរហូតដល់ ១៦១,៩ ពាន់លានដុល្លារនៃ​ការនាំចូលរបស់ចិន តាម​ដោយ​ប្រទេសម៉ាឡេស៊ី ១០១,៥ ពាន់លានដុល្លារ។

ពង្រឹងឲ្យរឹងម៉ាំជាមួយអ្នកជិតខាងអាស៊ីអាគ្នេយ៍ខ្លួន នឹងអាចជួយឲ្យទីក្រុងប៉េកាំងធ្វើតុល្យភាព​ឥទ្ធិ​ពលនៃការវាយ​ប្រហារពាណិជ្ជកម្ម​របស់សហរដ្ឋអាម៉េរិក ដែលជាប្រទេសទី១ នាំ​ចូល​ផលិត​ផលចិន​នៅឆ្នាំ២០២៤។

លោកស៊ី ជីនពីងនឹងស្ថិតនៅប្រទេសវៀតណាមរហូតដល់ថ្ងៃអង្គារ។ ប្រទេសនៃតំបន់​អាស៊ី​អាគ្នេយ៍នេះ ដែលបានដឹកនាំដូចប្រទេសចិនដោយគណបក្សកុំមុយនីស្ត ជាយូរមកហើយ​បាន​ដឹកនាំ​នយោបាយការទូតឫស្ស៊ី ដែលរួមបញ្ជូលការថែរក្សាទំនាក់ទំនងល្អទាំងជាមួយ​មហា​យក្ស​​ចិន និងទីក្រុងវ៉ាស៊ីនតុន។

ទីក្រុងប៉េកាំង និងទីក្រុងហាណយ សន្ទនាអំពីទំនាក់ទំនងសេដ្ឋកិច្ចជិតស្និទ្ធ។ ប៉ុន្តែទំនាក់​ទំនង​​នេះ​ក៏ត្រូវ​បានធ្វើឲ្យល្អក់កករដោយទំនាស់ទឹកដីផ្សេងៗ ដែលចាប់ផ្តើមពីសមុទ្រ​ចិន​ខាង​ត្បូង និងប្រជុំកោះប៉ារ៉ាសែល។