កាលពីសប្តាហ៍មុន អាជ្ញាធរអ៊ុយក្រែន បានលើកឡើងថា ប្រទេសរុស្ស៊ីចង់តែធ្វើសង្រ្កាម មិនមែនសន្តិភាពទេ។
នៅតំបន់ភាគខាងជើងអ៊ុយក្រែន ទាហានរុស្ស៊ីបានពង្រីកវិសាលភាពវាយប្រហារនៅក្នុងតំបន់ស៊ូមី ដែលទល់នឹងខេត្តឃឺស្ក៍របស់រុស្ស៊ី ហើយកងកម្លាំងអ៊ុយក្រែនបានវាយរុញច្រានចេញតាំងពីដើមខែមេសា។ កាលពីថ្ងៃទី១៩ ខែឧសភា ទាហានរុស្ស៊ី បញ្ជាក់ថា បានចាប់យកជាកម្មសិទ្ធភូមិមួយនៅ ១៥គម ក្បែរព្រំដែន។
តើរឿងនេះវាគ្រប់គ្រាន់នឹងនិយាយអំពីការវាយប្រហារនៅរដូវក្តៅដែរឬទេ? លោកស្រីវ៉េរ៉ូនីកា ប៉ូនីសចាកូវ៉ា ដែលជាអ្នកឯកទេសនៃសង្រ្គាមអ៊ុយក្រែននៅសកលវិទ្យាល័យ ផតម៉ៅ ចក្រភពអង់គ្លេស បានអះអាងថា គេមិនដឹងច្បាស់អំពីរូបភាពគូសវាសនៃការវាយប្រហាររដូវក្តៅ ដែលរុស្ស៊ីអាចព្យាយាមធ្វើចាប់តាំងពីដើមនៃការវាយប្រហារក្នុងទ្រង់ទ្រាយធំនៅឆ្នាំ២០២២ ជាមួយនឹងការប៉ុនប៉ងដើម្បីធ្វើការវាយទម្លុះខ្សែការពារអ៊ុយក្រែនឲ្យបានធំនោះទេ។
លោកហ៊ូសីអ៊ីន អាលីយ៉េវ ដែលជាអ្នកឯកទេសនៃសង្រ្គាមអ៊ុយក្រែននៅសកលវិទ្យាល័យហ្គ្លាហ្គូវ ប្រទេសស្កុតឡេន បានទទួលស្គាល់ថា ស្ថានភាពនៅខេត្តស៊ូមី គឺគួរឲ្យចាប់អារម្មណ៍។ ដោយសារអស់រយៈជាង ១ខែ មកហើយ ដែលរុស្ស៊ីធ្វើការវាយប្រហារនៅក្នុងតំបន់នេះ និងគេមានអារម្មណ៍ថា មានការពង្រីកសម្ពាធខាងយោធារុស្ស៊ីដាក់លើខ្សែការពារអ៊ុយក្រែននៅប៉ុន្មានខែចុងក្រោយនេះ។
តំបន់ស៊ូមីលេចឡើងជាផ្ទាំងស៊ីបនៃការឆក់ឱកាសសម្រាប់ទាហានរុស្ស៊ីធ្វើការវាយប្រហារ។ ចាប់តាំងពីដើមខែមេសា ទាហានរុស្ស៊ីបានដណ្តើមយកទឹកដីភាគច្រើនដែលវាយយកបានដោយទាហានអ៊ុយក្រែននៅក្នុងតំបន់ឃឺស្ក៍របស់រុស្ស៊ីតាំងពីរដូវក្តៅឆ្នាំមុន។ ចាប់តាំងពីពេលនោះ រុស្ស៊ីបានបង្កើនជាច្រើនដងនៃការវាយប្រហារលើអ៊ុយក្រែននៅតំបន់នេះ។ លោកហ៊ូសីអ៊ីន អាលីយ៉េវ បញ្ជាក់ថា ទីក្រុងមូស្គូបានចល័តកងកម្លាំងក្នុងបរិមាណដ៏ធំដើម្បីដណ្តើមយកតំបន់ឃឺស្ក៍មកវិញ និងប្រើកម្លាំងទាំងនេះនៅក្នុងភូមិភាគនេះផងដែរ។
ជាមួយនឹងការពង្រីកវិសាលភាពនៃការប្រយុទ្ធជាច្រើនដង។ លោកវីល ឃីងស្តុន ខូក ដែលជាអ្នកឯកទេសអំពីរុស្ស៊ីនៅក្រុមសម្រាប់ការសិក្សាសន្តិសុខអន្តរជាតិ (ITSS) Verona កត់សម្គាល់ថា ៖ “គេអាចចោទសួរថាតើរុស្ស៊ីមិនព្យាយាមប្រើប្រាស់តំបន់ស៊ូមីជាឈ្នាន់ ដូចរូបភាពឆ្នាំ២០២២ដែរឬយ៉ាងណា? នៅខណៈពេលទាហានរុស្ស៊ីអាចឆ្លងកាត់តំបន់នេះដើម្បីព្យាយាមឆ្ពោះទៅមុខឲ្យបានកាន់តែលឿនមកកាន់រដ្ឋធានីគៀវ”។
លោកហ៊ូសីអ៊ីន អាលីយ៉េវ ទទួលស្គាល់ថា ៖ “ឈលើទស្សនៈយុទ្ធសាស្រ្ត វាច្បាស់ថា ការចាប់យកតំបន់ស៊ូមីនឹងអាចបើកផ្លូវឆ្ពោះមកកាន់រដ្ឋធានីគៀវរបស់អ៊ុយក្រែន”។
សម្រាប់ពេលេនះ លោកវីល ឃីងស្តុន ខូក គិតប្លែកបន្តិចថា ៖ “រុស្ស៊ីកំពុងតែធ្វើតេស្តិ៍ខ្សែការពាររបស់អ៊ុយក្រែនជាជាង។”
លោកស្រីវ៉េរ៉ូនីកា ប៉ូនីសចាកូវ៉ា ពន្យល់ថា ៖ “ប្រសិនបើរុស្ស៊ីពិតជាចង់បើកការវាយប្រហារដ៏ធំនៅក្នុងតំបន់នេះ រុស្ស៊ីនឹងត្រូវប្រមូលផ្តុំកងកម្លាំងដ៏ច្រើនបន្ថែមទៀត ហើយជាពិសេសអ្វីដែលមានសារសំខាន់ដែរនោះគឺត្រូវមានការគាំទ្រពីយានយន្តដឹកជញ្ជូនដ៏ច្រើន និងការស្តុកនូវគ្រាប់រំសេវដ៏ច្រើនផងដែរ។
សម្រាប់លោកស្រី លក្ខខណ្ឌទាំងនេះមិនអាចបំពេញបានទេ។ មួយផ្នែកពីព្រោះថា ទាហានរុស្ស៊ីមិនមានមធ្យោបាយដូចគ្នានឹងឆ្នាំ២០២២ទេ នៅពេលដែលពួកគេចាប់ផ្តើមយុទ្ធនាការឈ្លានពានអ៊ុយក្រែន។ អ្នកស្រាវជ្រាវរូបនេះ វិភាគថា ៖ “សកម្មភាពរបស់រុស្ស៊ីដូចនឹងការពង្រីកសង្រ្គាមដើម្បីបំផ្លិចបំផ្លាញអ៊ុយក្រែនទៅវិញទេ”។
Daily Program
