សានែ តាកៃជី បេក្ខភាពជាអ្នកជាតិនិយមដាច់ខាត គឺជាប្រមុខនៃគណបក្សប្រជាធិបតេយ្យសេរី PLD ដែលជាគណបក្សអភិរក្សស្តាំនិយម និងកាន់អំណាចនៅជប៉ុន។ លោកស្រី បាន ក្លាយជានាយករដ្ឋមន្រ្តីដែលជាស្ត្រីដំបូងរបស់ជប៉ុនកាលពីពេលថ្មីៗនេះ បន្ទាប់ពីការលាលែងរបស់នាយករដ្ឋមន្រ្តី ស្ហ៊ីហ្គឺរូ អ៊ីស្ហ៊ីបា។
មានអាយុ ៦៤ឆ្នាំ ជាសម្ព័ន្ធមិត្តដ៏ស្មោះត្រង់របស់អតីតនាយករដ្ឋមន្រ្តីស្ហ៊ីនហ្ស៉ូ អាបេ ដែលត្រូវគេធ្វើឃាតនៅឆ្នាំ២០២២ លោកស្រីសានែ តាកៃជី បានឡើងកាន់ក្បាលម៉ាស៊ីនគណបក្សដែលផុយស្រួយដោយរឿងអាស្រូវ បែកបាក់ និងត្រូវបង្ខំឲ្យធ្វើសម្បទានដោយសារខ្វះសម្លេងភាគច្រើនដាច់ខាតនៅក្នុងសភា។ លើសពីនេះ ជំហរបស់លោកស្រីដែលជាអ្នកអភិរក្សជ្រុលនិយម អាចនឹងធ្វើឲ្យស្មុគស្មាញដល់ការងាររបស់លោកស្រីដែរ ជាពិសេសចំពោះមហាអំណាចធំៗ ជិតខាង ដែលរួមមានប្រទេសចិន និងកូរ៉េខាងត្បូងជាដើម។
នៅលើបណ្តាញ វីឆាត WeChat លោកលីន កានចុង អ្នកឯកទេសតៃវ៉ាន់នៃនយោបាយអន្តរជាតិ បានវាយតម្លៃថា សម្រាប់ទីក្រុងប៉េកាំង ការមកកាន់អំណាចរបស់សានែ តាកៃជី ជាការប្រកាសប្រាប់អំពីសុបិន្តអាក្រក់នៃការទូតជាមួយជប៉ុន។ យោងតាមអ្នកសិក្សាស្រាវជ្រាវរូបនេះ អនាគតមេដឹកនាំជប៉ុនអាចនឹងឆ្លងបន្ទាត់ក្រហមរបស់ចិនលើសំណុំរឿងរស៊ើបចំនួន ៣ មាន បញ្ហាតៃវ៉ាន់ ការយល់ឃើញខាងប្រវត្តិសាស្រ្ត និងជម្លោះទឹកដី។
នៅលើកម្រិតតម្លៃមនោគមន៍វិជ្ជា លោកស្រីសានែ តាកៃជី ប្រកាន់យកជំហរបដិសេធការសម្លាប់រង្គាលនៅណាគីន ដែលជាឧក្រិដ្ឋកម្មសង្រ្គាមដ៏ចម្បងរបស់ជប៉ុននៅសង្រ្គាមចិនជប៉ុនលើកទី២ និងបដិសេធរាល់គំនិតនៃការសោកស្តាយ។ ឥស្សរជនគណបក្ស PLD លោកស្រីសានែ តាកៃជី ក៏ត្រូវបានស្គាល់អំពីដំណើរទស្សនកិច្ចជាទៀងទាត់របស់លោកស្រីទៅកាន់វិហារ យ៉ាស៊ូគូនី ដែលជាទង្វើមានការជជែកវែកញែកជាខ្លាំង។ នេះគឺជាទីសក្ការៈដែលឧទ្ទិសកិត្តិយសដល់ឧក្រិដ្ឋជនសង្រ្គាមលោកលើកទី២ ជាច្រើន និងត្រូវបានចាត់ទុកដោយប្រទេសអាស៊ីជាច្រើនថា ជានិមិត្តរូបនៃលទ្ធិយោធានិយមរបស់ជប៉ុនកាលពីអតីតកាល។
សារព័ត៌មានគូរីយ៉េ អាំងទែណាស្យូណាល់ Courrier International បានឡើងឡើងថា ដំណើរទស្សនកិច្ចនៃមេដឹកនាំជប៉ុននៅទីសក្ការៈនេះដែលស្ថិតនៅទីក្រុងតូក្យូបានក្លាយជាចំនុចនៃភាពតានតឹងជាពិសេសរវាងប្រទេសចិន និងជប៉ុន នៅក្នុងហេតុផលនៃពិធីគោរពវិញ្ញាណក្ខន្ធ សម្រាប់យោធាជប៉ុន ១០៦៨នាក់ ដែលត្រូវកាត់ទោសសម្រាប់ឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងនឹងមនុស្សជាតិ ដែលបានប្រព្រឹត្តិធ្វើនៅក្នុងសង្រ្គាមលោកលើកទី២។ សម្រាប់រូបលោកស្រី ជប៉ុនមិនគួរអនុញ្ញាតឲ្យជាតិដទៃៗ លើកយកដំណើរទស្សនកិច្ចនេះជាបញ្ហាការទូតនោះទេ។
នៅខណៈដែលបញ្ហាតៃវ៉ាន់ ស្ថិតនៅចំកណ្តាលជាពិសេសនៅក្នុងទំនាក់ទំនងចិនជប៉ុន លោកស្រីសានែ តាកៃជី មិនដែលញញើតនឹងបង្ហាញជំហរនៃការគាំទ្រចំពោះកោះតៃវ៉ាន់ទេ។
កាលពីខែមេសា ក្នុងអំឡុងជំនួបរបស់លោកស្រីនៅទីក្រុងតៃប៉ិជាមួយប្រធានាធិបតីតៃវ៉ាន់ លោកលៃ ជីងតេ លោកស្រីសានែ តាកៃជី បានបញ្ជាក់ថា ការការពារតៃវ៉ាន់ បានក្លាយជាការការពារពិភពលោកសេរី។ លោកស្រីក៏បានថ្លែងថា ប្រសិនបើតៃវ៉ាន់ដួលរលំ ជប៉ុននឹងបាត់បង់សន្តិភាព។ នេះមិនមែនជាបញ្ហានៃការឃ្លាតឆ្ងាយខាងភូមិសាស្រ្តនយោបាយទេ ប៉ុន្តែវាគឺជាបញ្ហានៃការរស់រានមានជីវិត។
អ្នកឯកទេសតៃវ៉ាន់ លោកលីន កានចុង បានរៀបរាប់ទៀតថា លោកស្រីសានែ តាកៃជី ក៏បានស្នើឲ្យបញ្ចូលស្ថិរភាពនៃច្រកសមុទ្រតៃវ៉ាន់ ទៅចំកណ្តាលនៃយុទ្ធសាស្រ្តសន្តិសុខជាតិជប៉ុនផងដែរ។
Daily Program
