នាយករដ្ឋមន្រ្តីនឹងជួបសំណេះសំណាលជាមួយនឹង​សិស្សនិទ្ទេសA នៅដើមសប្តាហ៍ក្រោយ

លោកនាយករដ្ឋមន្រ្តី ហ៊ុន ម៉ាណែត នឹង​ជួប​សំណេះសំណាលជាមួយសិស្សនិទ្ទេស A នៃការប្រឡងសញ្ញាបត្រមធ្យមសិក្សាទុតិយភូមិ និងការប្រឡងសញ្ញាបត្របច្ចេកទេសនិងវិជ្ជាជីវៈកម្រិត៣ សរុបចំនួន២ ២២៥នាក់ នៅ​ថ្ងៃចន្ទ ទី២៣ ខែធ្នូ ឆ្នាំ២០២៤ខាងមុខនេះ​។

លោកអ៊ីន វីរជាតិ រដ្ឋលេខាធិការទីស្ដីការគណៈរដ្ឋមន្ត្រី បាន​ផ្ញើលិខិតជូន​ឧបនាយករដ្ឋមន្រ្តី រដ្ឋមន្ត្រីក្រសួង​អប់រំ យុវជន និងកីឡា លោក ហង់ជួន ណារ៉ុន​​​ ស្នើសុំការអនុញ្ញាត ដើម្បីឱ្យបេក្ខជនប្រឡងជាប់សញ្ញាបត្រមធ្យមសិក្សា ទុតិយភូមិ ​និងបេក្ខជនប្រឡងជាប់សញ្ញាបត្របច្ចេកទេសនិងវិជ្ជាជីវៈ​ ដែ​លទទួលបាននិទ្ទេស A បានចូលជួបសំណេះសំណាល ជាមួយសម្តេចមហាបវរធិបតីនាយករដ្ឋមន្ត្រី នាសប្តាហ៍​ក្រោយនេះ​។​​

សូមរម្លឹកថា លទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) កាលពីថ្ងៃទី៨ តុលា ២០២៤ មានបេក្ខជនប្រឡងជាប់ ចំនួន ១០៦ ៣៥១ នាក់ ក្នុងនោះ និទ្ទេស A ចំនួន ២ ២១៦នាក់។​​​

ក្រសួង បញ្ជាក់ថា ​ជាលទ្ធផល បេក្ខជនប្រឡងជាប់សរុប ១០៦ ៣៥១ នាក់ ត្រូវជា ៧៩.០០ ភាគរយនៃចំនួន បេក្ខជនមកប្រឡង។ បេក្ខជនជាប់និទ្ទេស A ចំនួន ២ ២១៦ នាក់, និទ្ទេស B ចំនួន ៩ ៧០១ នាក់, និទ្ទេស C ចំនួន ២២ ៦៧៥ នាក់, និទ្ទេស D ចំនួន ៣៦ ៦៨៣ នាក់, និងនិទ្ទេស E ចំនួន ៣៥ ០៧៦នាក់៕