នាយករដ្ឋមន្រ្តីដាណឺម៉ាក ទៅហ្គ្រ៊ូអេនឡេន ជាការឆ្លើយតបនឹងមហិច្ចតារបស់​អាម៉េរិក

នាយករដ្ឋមន្រ្តីដាណឺម៉ាក លោកស្រីម៉េតតេ ហ្វ្រ៉េដឺរីកសេន បានទៅកាន់កោះហ្គ្រ៊ូអេនឡេន កាលពីថ្ងៃព្រហស្បតិ៍ ដើម្បីពង្រឹងសាមគ្គីភាពប្រទេសនៅតំបន់ស្កង់ឌីណាវ​ជាមួយនឹងដែនដី​អាកទិកមួយនេះ។ ជាច្រើនសប្តាហ៍មកហើយ សហរដ្ឋអាម៉េរិកបញ្ជាក់ចង់ភ្ជាប់ជា​ឧបសម្ព័ន្ធ​នូវ​កោះ​​ដែលសម្បូរដោយធនធានធម្មជាតិមួយនេះមកអាម៉េរិក។

នាយករដ្ឋមន្រ្តីដាណឺម៉ាក លោកស្រីម៉េតតេ ហ្វ្រ៉េដឺរីកសេន បានទៅកាន់កោះហ្គ្រ៊ូអេនឡេន​កាលពីថ្ងៃព្រហស្បតិ៍ទី៣ ខែមេសា ដើម្បីពិភាក្សាពង្រឹងភាពរួបរួមរបស់ដាណឺម៉ាកជាមួយ​កោះនៃទ្វីបអាកទិកដ៏ធំសម្បើមនេះ។ ដំណើរទស្សនកិច្ចនេះកើតមានឡើងនៅខណៈកោះ​ហ្គ្រ៊ូអេនឡេន ទើបមានរដ្ឋាភិបាលសម្ព័ន្ធភាពថ្មី ក្រោមការដឹកនាំរបស់គណបក្សកណ្តាលស្តាំ ប្រជាធិបតេយ្យ។

លោកជេន ហ្វ្រ៉េដឺរីក នីញ៉ែលសេន ប្រមុខថ្មីនៃរដ្ឋាភិបាលហ្គ្រ៊ូអេនឡេន ដែលប្រមូលផ្តុំ​ដោយ​គណបក្ស ៤ តំណាងនៅសភាក្នុងតំបន់ បានសម្តែងនូវក្តីរីករាយថា ៖ “ដាណឺម៉ាក គឺជាដៃគូ​ដ៏​ជិត​​ស្និទ្ធបំផុតរបស់យើង និងវាជាធម្មតាដែលយើងនឹងជួបគ្នាតាមដែលអាចទៅរួច។”

មកដល់ទីក្រុងនូអ៊ូក កាលពីថ្ងៃពុធ លោកស្រីម៉េតតេ ហ្វ្រ៉េដឺរីកសេន បានថ្លែងថា លោកស្រី មានក្តីប្រាថ្នាតែមួយ គឺធ្វើគ្រប់អ្វីៗដែលលោកស្រីអាចដើម្បីថែរក្សាឲ្យបាននូវអ្វីដែលល្អបំផុត​នៃទឹកដីហ្គ្រ៊ូអេនឡេន និងគាំទ្រហ្គ្រ៊ូអេនឡេន​នៅក្នុងស្ថានភាពដ៏លំបាកពិតប្រាកដ។

លោកស្រីមីកាអឺឡា អេនហ្ស៉េល អ្នកឯកទេសនៃដែនដីអាកទិក និងជាអតីតអ្នកតំណាង​ប្រទេស​​ដាណឺម៉ាកនៅហ្គ្រ៊ូអេនឡេន បានរៀបរាប់ថា គឺវាមានសារសំខាន់ខ្លាំងណាស់ និង​សុវត្ថិភាព​​សម្រាប់ប្រជាជនហ្គ្រ៊ូអេនឡេន ដែលមើលឃើញប្រមុខរដ្ឋាភិបាលដាណឺម៉ាក​មក​កាន់ដែនដីនេះ។

សម្រាប់លោកម៉ាក ចាកូបសេន ប្រធានសន្និសីទ​នៅសកលវិទ្យាល័យភូមិន្ទការពារជាតិ​ដាណឺម៉ាក បានឲ្យដឹងថា ការទៅកាន់ទីនោះ នឹងអាចឲ្យបង្ហាញនូវសុខដុមរម្មនីយកម្ម បង្ហាញ​ការគាំទ្រ និងពិភាក្សាអំពីអ្វីដែលពួកគេអាចធ្វើឲ្យបានកាន់តែជាក់ស្តែង ម្យ៉ាងដើម្បីឆ្លើយតប​ទៅនឹងសហរដ្ឋអាម៉េរិក ក៏ដូចជារឿងនៃការវិនិយោគ​កិច្ចសហប្រតិបត្តិការ ជាក់ស្តែងផងដែរ។

នេះគឺជាដំណើរទស្សនកិច្ចរយៈពេលវែងគួរសម និងជាអ្វីដែលបង្កបានជាសារខ្លាំង។ យោង​តាមសាស្រ្តាចារ្យសកលវិទ្យាល័យម្នាក់ លោកស្រីម៉េតតេ ហ្វ្រ៉េដឺរីកសេន គួរតែបញ្ជាក់​អំពី​តួនាទីរបស់ដាណឺម៉ាកជាមិត្តរបស់ហ្គ្រ៊ូអេនឡេន ដែលគាំទ្រកោះនេះនៅអំឡុងដំណាក់​កាល​ត​ទៅ មុខទៀតឆ្ពោះទៅកាន់ឯករាជ្យភាព។

បើយោងតាមលោកស្រីមីកាអឺឡា អេនហ្ស៉េល ការធ្វើដំណើររបស់នាយករដ្ឋមន្រ្តីដាណឺម៉ាក នឹងអាចឲ្យធ្វើមានការផ្លាស់ប្តូរយោបល់ពាក់ព័ន្ធនឹងដំណើរការធម្មនុញ្ញនៃកិច្ចសហប្រតិបត្តិការរវាង​ហ្គ្រ៊ូអេនឡេន និងដាណឺម៉ាក និងពិភាក្សាអំពីរបៀបថ្មីនៃការសន្យាកិច្ចសហប្រតិបត្តិការ សេដ្ឋកិច្ច។

បញ្ហាសន្តិសុខ គឺជាការទាមទារគន្លឹះដែលប្រើប្រាស់ដោយរដ្ឋបាលលោកត្រាំ ដើម្បីបង្ហាញ ភាពត្រឹមត្រូវរបស់ខ្លួនក្នុងតម្រូវការដើម្បីភ្ជាប់ជាឧបសម្ព័ន្ធនៃដែនដីអាកទិកនេះ។ ទីក្រុងកូពេនហាហ្គ គួរតែរំឭកអំពីការសន្យារបស់ខ្លួនដើម្បីពង្រឹងវត្តមាន និងការវិនិយោគនៅ ក្នុងតំបន់អាកទិក និងមិនបិទទ្វារសម្រាប់កិច្ចសហប្រតិបត្តិការដែលកើនឡើងជាមួយ ជនជាតិ អាម៉េរិក។

លោកម៉ាក ចាកូបសេន បាននិយាយថា លោកគិតថា លោកស្រីម៉េតតេ ហ្វ្រ៉េដឺរីកសេន នឹង និយាយឡើងម្តងទៀតនូវសេចក្តីថ្លែងសន្ទរកថារបស់លោកឡាក ឡុកកេ ដែលជារដ្ឋមន្រ្តី ការ បរទេសរបស់ដាណឺម៉ាក ដែលនិយាយថា វាអាចទៅរួចនឹងពង្រឹងវត្តមានយោធា​អាម៉េរិកនៅ លើដែនដីហ្គ្រ៊ូអេនឡេន បន្ទាប់ពីមានកិច្ចព្រមព្រៀងការពារគ្នានៅឆ្នាំ១៩៥១។