ទើបតែជាប់ឆ្នោត លោកលី ជែមីញ៉ុន ឡើងកាន់ដំណែងជាប្រធានាធិបតីកូរ៉េខាង ត្បូង

ប្រធានាធិបតីកណ្តាលឆ្វេង លោកលី ជែមីញ៉ុន បានឡើងកាន់តំណែង​ជាប្រធានាធិបតីកូរ៉េ ខាងត្បូង កាលពីថ្ងៃពុធ ទី៤ ខែមិថុនា ក្រោយមួយថ្ងៃពីជ័យជម្នះដ៏ទូលំ​ទូលាយក្នុងការ បោះឆ្នោត។

បន្ទាប់ពីរយៈពេល ៦ខែ នៃវិបត្តិនយោបាយដ៏ជ្រាលជ្រៅ អតីតកម្មករអាយុ ៦០ឆ្នាំ បានឈ្នះ​ការបោះឆ្នោតជាមួយនិងសម្លេង ៤៩,៤២% ទល់នឹង ៤១,១៥% របស់គូបដិបក្ខ មកពី គណបក្ស​ស្តាំ លោកគីម មូនស៊ូ។

លោកលី ជែមីញ៉ុន មកកាន់អំណាចលើប្រទេសដែលកំពុងបែងចែកប៉ូលអំណាចច្រើន និង សេដ្ឋកិច្ចដែលផុយស្រួលដោយសារសង្រ្គាមពាណិជ្ជកម្មពិភពលោកដែលប្រកាសដោយ​លោកប្រធានាធិបតីអាម៉េរិក ដូណាល់ ត្រាំ។ លោកលី ជែមីញ៉ុន នឹងត្រូវស្វែងរកទីតាំង សម្រាប់កូរ៉េខាងត្បូង ​នៅពេលការប្រឈមមុខរវាងប្រទេសចិន ដៃគូ​ពាណិជ្ជកម្មទី១ និង សហរដ្ឋអាម៉េរិក អ្នកធានាជាប្រពៃណី​នៃសន្តិសុខរបស់ប្រទេស។

ប្រមុខការទូតអាម៉េរិក លោកម៉ាកកូ រូប៊ីយ៉ូ បានផ្ញើសារអបអរសាទ និងរំឭកអំពីសម្ព័ន្ធមិត្តរវាង​ទីក្រុងសេអ៊ូល និងទីក្រុងវ៉ាស៊ីនតុន ដែលមិនអាចកាត់ផ្តាច់បាន។

នៅអំឡុងសេចក្តីថ្លែងសន្ទរកថានៃការឡើងកាន់អំណាច លោកលី ជែមីញ៉ុន សន្យាភ្ជាប់ ឡើង​វិញនូវកិច្ចសន្ទនា ជាមួយទីក្រុងព្យុងយ៉ាង និងធ្វើឲ្យល្អប្រសើរឡើងនូវទំនាក់ទំនង ជាមួយ ប្រទេសជិតខាងដែលមានអាវុធនុយក្លេអ៊ែរនេះ។ 

លោកលី ជែមីញ៉ុន បានថ្លែងថា ៖ “ប្រសិនបើឲ្យគេជ្រើសរើស គឺសន្តិភាពគឺគ្រាន់បើជាង សង្រ្គាម”។ លោកបានសន្យានឹងពន្យល់ឲ្យកូរ៉េខាងជើងបោះចោលគំនិតការបង្កហេតុ​ខាង​នុយក្លេអ៊េរ និងយោធា ​ដោយបើកផ្លូវនៃទំនាក់ទំនង។

លោកលី ជែមីញ៉ុន ក៏បានព្រមានថា លទ្ធិការពារនិយមគំរាមកំហែងការរស់រានមានជីវិត​របស់​កូរ៉េ​ខាងត្បូង ដែលអាស្រ័យយ៉ាងខ្លាំងលើការនាំចេញ។ លោកបានថ្លែងថា ៖ “ការប្រែប្រួល​យ៉ាង​​លឿននៃសណ្តាប់ធ្នាប់ពិភពលោក មានដូចជា​ការកើនឡើងនៃលទ្ធិការពារនិយម និង​ការ​រៀបចំឡើងវិញនៃរចនាសម្ព័ន្ធនៃចង្វាក់ផ្គត់ផ្គង់ ក៏គំរាមកំហែងដល់ការរស់រានមានជីវិត របស់កូរ៉េខាងត្បូងដែរ។” លោកថ្លែងយោងលើភាព​រប៉ាត់រប៉ាយដែលបង្កឡើងដោយសង្រ្គាម ពាណិជ្ជកម្ម ដែលដាក់ចេញដោយប្រធានាធិបតីអាម៉េរិក លោកដូណាល់ ត្រាំ។

ការឡើងកាន់អំណាចរបស់លោកលី ជែមីញ៉ុន ដែលគណបក្សប្រជាធិតេយ្យមានសម្លេងភា​គ​ច្រើននៅរដ្ឋសភា នឹងស្ថាបនាឡើងវិញនូវភាពធម្មតានៃស្ថាបននៅក្នុងប្រទេស​ដែលឮសូរ​ដោយសារចលាចលនយោបាយរយៈពេល ៦ខែមកហើយ បន្ទាប់ពីមានការប៉ុងប៉ុនធ្វើ​រដ្ឋ​ប្រហាររបស់អតីតប្រធានាធិបតីលោក យូន សុកយូល។

លោកស្ហ៉ារុន យូន សាស្រ្តាចារ្យនៃការសិក្សាកូរ៉េនៅសកលវិទ្យាល័យណូត្រ៍ ដាម វិភាគថា ៖​”នឹងមានការរំពឹងដ៏ខ្លាំងក្លាពីផ្នែកនៃសាធារណជនដើម្បីឲ្យលោកលី ជែមីញ៉ុន ពង្រឹងយន្តការ​ការគ្រប់គ្រងស្ថាបន និងធានាទំនួលខុសត្រូវដ៏ធំនៃតំណាងរាស្រ្ត”។

លើសពីច្បាប់ពន្ធគយអាម៉េរិក និងចិន លោកលី ជែមីញ៉ុន ក៏នឹងមានកិច្ចការជាមួយអ្នកជិត ខាង​កូរ៉េខាងជើង ដែលកំពុងឆ្លងកាត់រយៈពេលនៃភាពតានតឹងដ៏ខ្ពស់បំផុតក្រោម​អណត្តិ ប្រធានាធិបតី យូន សុកយូល។

ចុងក្រោយ លោកលី ជែមីញ៉ុន នឹងត្រូវចាត់វិធានការបន្ទាន់ដើម្បីលើកកម្ពស់អត្រាកំណើត របស់ប្រទេសដែលសព្វថ្ងៃនេះគឺនៅទាបបំផុតលើពិភពលោក ដែលគំរាម​នឹងធ្វើឲ្យប្រជាជន​កូរ៉េខាងត្បូងថយចុះអស់ពាក់កណ្តាលពីពេលនេះដល់ឆ្នាំ២១០០។