តើតំណាងសន្តអាសនៈនិយាយយ៉ាងណាអំពីសន្តិភាពនៅអង្គការសហប្រជាជាតិ?

សន្តិភាព​មិន​គ្រាន់តែតម្រូវ​ឲ្យ​គ្មាន​សង្គ្រាមប៉ុណ្ណោះទេ ប៉ុន្តែវាចាំបាច់ត្រូវមាន​យុត្តិធម៌ សច្ចភាព និង​ការគោរព​សេចក្តីថ្លៃថ្នូរ​របស់​មនុស្ស​។ នេះបើតាមសុន្ទរកថា របស់លោកអគ្គអភិបាល ប៉ូល រីឆាត ហ្គាឡាហ្គ័រ រដ្ឋមន្រ្តីទទួលបន្ទុកទំនាក់ទំនងជាមួយរដ្ឋនិងអង្គការក្រៅរដ្ឋាភិបាលរបស់សន្តអាសនៈ។

លោកអគ្គអភិបាលបានលើកឡើងថា  នៅលើពិភពលោក​ដែលកំពុងតែស្ថិតនៅក្នុងស្ថានភាពពោរពេញដោយ ការបែកបាក់ ជម្លោះ និងការមិនទុកចិត្ត ការអំពាវនាវឱ្យមានសន្តិភាពត្រូវតែបន្តធ្វើបន្ថែមទៀតនិងចាំបាច់ត្រូវធ្វើដោយស្មោះអស់ពីចិត្ត។

លោកអគ្គអភិបាលបានលើកឡើងថា សន្តិភាពពិតត្រូវការសន្ទនា និងការយោគយល់គ្នាទៅវិញទៅមក តាមរយៈការជឿទុកចិត្ត និង ការផ្សះផ្សារហើយត្រូវចាំថា ជម្លោះថ្ងៃនេះមិនត្រឹមតែបំផ្លាញជីវិតប៉ុណ្ណោះទេ ថែមទាំងកំពុងបំផ្លាញនូវក្តីសង្ឃឹមរបស់មនុស្សជាតិទៀតផង។

លោកបានជំរុញឲ្យមនុស្សជាតិយកសន្តិភាពដាក់ចេញពីបេះដូង ទាំងក្នុងគ្រួសារ ក្នុងសង្គម និងក្នុងចំណោមជាតិសាសន៍ ហើយត្រូវតាំងខ្លួនជាសិប្បករនៃសន្តិភាព ដើម្បីមនុស្សជំនាន់ក្រោយអាចទទួលមរតកពិភពលោកប្រកបដោយភាពសុខដុម និងក្តីសង្ឃឹម៕