ជាការព្រមាន ចិនធ្វើសមយុទ្ធក្លែងឡោមព័ទ្ធកោះតៃវ៉ាន់

ទីក្រុងប៉េកាំង បង្ហាញសាច់ដុំដាក់កោះតៃវ៉ាន់។ កាលពីថ្ងៃអង្ការ ទី១ ខែមេសា ចិនបានចល័ត​កងទ័ពជើងគោក ជើងទឹក និងទ័ពអាកាស នៅជុំវិញកោះតៃវ់ាន់ ដើម្បីធ្វើលំហាត់សមយុទ្ធ​យោធា​​​ក្នុងទ្រង់ទ្រាយធំដែលសំដៅដាក់ចេញនូវលក្ខខណ្ឌឡោមព័ទ្ធកោះតៃវ៉ាន់។

លោកស្ហ៊ី យី អ្នកនាំពាក្យទីបញ្ជាការយុទ្ធភូមិភាគបូព៌ានៃយោធាចិន បានថ្លែងថា កងកម្លាំង ទាហានចិនខិតទៅជិតដែនកោះតៃវ៉ាន់ចេញពីមុខព្រួញជាច្រើន។ លោកពិព៌នាការធ្វើ​សមយុទ្ធ នេះមានលក្ខណៈស្របច្បាប់ និងចាំបាច់ដើម្បីថែរក្សាអធិបតេយ្យភាព និងការបង្រួប​បង្រួមជាតិចិន។ អ្នកនាំពាក្យបានរៀបរាប់លំអិតថា ៖ “ការធ្វើសមយុទ្ធនេះគឺសំខាន់ផ្តោត​លើ​ការ​ល្បាត​សម្រាប់ការត្រៀមប្រយុទ្ធលើសមុទ្រ និងអាកាស ការច្បាមយករួមគ្នាឲ្យបាន​ខ្លាំង​​ជា​សកល ការវាយប្រហារលើគោលដៅសមុទ្រ និងដី និងការឡោមព័ទ្ធតំបន់គន្លឹះ និងផ្លូវ​សមុទ្រ។”

ជាការឆ្លើយតប ទីក្រុងតៃប៉ិ និយាយថា ប្រញាប់ប្រញាល់បញ្ចេញយន្តហោះចម្បាំង និងនាវា​ចម្បាំង ​​និងពង្រាយប្រព័ន្ធបាញ់មីស៊ីល។

គណបក្សកុំមុយនីស្តចិនមិនដែលបានគ្រប់គ្រងកោះតៃវ៉ាន់ទេ ប៉ុន្តែទាមទារថា ប្រជុំកោះ​តៃវ៉ាន់​ជា​ផ្នែក​ដែលត្រូវរួមបញ្ចូលមកក្នុងទឹកដីខ្លួន និងមិនលើកលែងនូវការប្រើប្រាស់កម្លាំង​ដើម្បី​ធ្វើ​ការ​គ្រប់គ្រងដែនកោះ​នោះទេ។

ប៉ុន្មានឆ្នាំចុងក្រោយនេះ ទីក្រុងប៉េកាំងបានពង្រីកវិសាលភាពដាក់ពង្រាយយន្តហោះ​ និង​នាវា​ចម្បាំងនៅជុំវិញកោះតៃវ៉ាន់ដើម្បីគាំទ្រការទាមទាររបស់ខ្លួន ដែលទីក្រុងតៃប៉ិបាន​បដិសេធ។

យោងតាមក្រសួងការពារជាតិតៃវ៉ាន់ ប្រទេសចិនបានចល័តនាវាចម្បាំង ១៩​គ្រឿង នៅជុំវិញ​កោះ​តៃវ៉ាន់ក្នុងរយៈពេល ២៤ម៉ោងនេះ។

ទាហានចិន បានបញ្ជាក់ថា ការធ្វើសមយុទ្ធថ្មីនេះមានគោលដៅបញ្ចេញសារព្រមាន​ម៉ឺងម៉ាត់ និងការបំផ្លាញដ៏មានសក្តានុពលសម្រាប់អ្នកដែលសន្នត់ថាជាក្រុមបំបែកខ្លួននៃដែន​កោះ។

លោកជូ អេនឈីង អ្នកនាំពាក្យឆ្មាំឆ្នេរចិន បានប្រាប់ឲ្យដឹងថា ឆ្មាំឆ្នេរ​ចិនបាន​ដឹកនាំ​ការ​ល្បាត​អនុវត្ត​ច្បាប់ និងដឹកនាំលំហាត់សមយុទ្ធ មានដូចជា ការពិនិត្យ និងចាប់ឃាត់ ប្រតិបត្តិ​ការចាប់ និងឃាត់នាវាដែលមិនមានការអនុញ្ញាត។

ប្រធានាធិបតីតៃវ៉ាន់ បានថ្កោលទោសយ៉ាងម៉ឺងម៉ាត់នូវការធ្វើសមយុទ្ធរបស់ចិន។ បើតាម​នាយក​រដ្ឋមន្រ្តីតៃវ៉ាន់ លោកចូ ជុងតៃ ក៏បានឲ្យដឹងថា ការប្រើប្រាស់ការបង្ហាញកម្លាំងយោធា មិន​មែនជាអ្វីដែលសង្គមសម័យទំនើប និងជឿនលឿន ត្រូវធ្វើនោះទេ។

ប្រធានាធិបតីតៃវ៉ាន់ដែលជាប់ឆ្នោតតាមបែបប្រជាធិបតេយ្យ លោកឡៃ ជីងតេ កាលពីខែមុន បាន​វាយតម្លៃថា ប្រទេសចិនគឺជាកងកម្លាំងបរទេសដែលប្រទូស្តរាយ និងស្នើនូវវិធានការថ្មី​ដើម្បី​ប្រយុទ្ធនឹងការជ្រៀតចូល និងចារកម្មរបស់របស់ចិន។

កាលពីថ្ងៃអង្គារដែរ នៅខណៈពេលធ្វើសមយុទ្ធ ទីក្រុងប៉េកាំង បានព្រមានតៃវ៉ាន់ថា ឯករាជ្យ​ភាព​របស់តៃវ៉ាន់ មានន័យថា សង្រ្គាម។ នៅក្នុងសេចក្តីប្រកាសមួយរបស់លោកជូ ហ្វ៉េងលៀន អ្នកនាំពាក្យនៃការិយាល័យកិច្ចការតៃវ៉ាន់ និងទទួលបន្ទុកនយោបាយផ្នែករដ្ឋចិន​ចំពោះ​តៃវ៉ាន់ បានព្រមានថា ការលើកកម្ពស់ឯករាជ្យភាពរបស់តៃវ៉ាន់ មានន័យថា រុញច្រាន​ប្រជាជន​តៃវ៉ាន់ឆ្ពោះ​ទៅកាន់ស្ថានភាពគ្រោះថ្នាក់នៃជម្លោះសង្រ្គាម។

សមយុទ្ធនេះគឺធំបំផុតចាប់តាំងពីខែកុម្ភៈ នៅខណៈដែលទីក្រុងតៃប៉ិបានបញ្ជាក់ថា ប្រទេស​ចិន បានរៀបចំលំហាត់សមយុទ្ធដោយបាញ់គ្រាប់ពិត ជាមួយនឹងយន្តហោះ និងនាវាចម្បាំង​នៅ​ក្នុង​តំបន់សមុទ្រដែលស្ថិតនៅចម្ងាយប្រមាណ ៧៤ គម ភាគខាងត្បូងកោះ។ ទាហាន​តៃវ៉ាន់​បានឆ្លើយតបដោយបញ្ជូនកងកម្លាំងផ្ទាល់ខ្លួនដើម្បីតាន​ដាន និងព្រមានឆ្លើយតបតាម​របៀប​សមរម្យ។