ជនត្រូវចោទ លី សាម៉េត ត្រូវបានឃុំខ្លួននៅក្នុងពន្ធនាគារព្រៃស

សាលាដំបូងរាជធានីភ្នំពេញ ​បានចេញដីកាបង្គាប់ឲ្យឃុំខ្លួនជនត្រូវចោទ​ លី សាម៉េត កាលពី​ថ្ងៃទី៥ ខែវិច្ឆិកា ឆ្នាំ២០២៤ ដែលត្រូវបានដាក់ក្រោមការពិនិត្យពីបទៈ ឆបោក ​តាមបញ្ញត្តិមាត្រា ៣៧៧ និងមាត្រា ៣៧៨ នៃក្រមព្រហ្មទណ្ឌ។

នេះបើយោងតាម​ដីកាបង្គាប់ឱ្យឃុំខ្លួន ដែលចុះហត្ថលេខាដោយ​លោក ថោង ផល្លារង្សី ចៅក្រមស៊ើបសួរសាលាដំបូងរាជធានីភ្នំពេញ។

ដីកាបង្គាប់ឱ្យឃុំខ្លួនបានបញ្ជាក់ថា៖ «បង្គាប់ឲ្យភ្នាក់ងារមានសមត្ថកិច្ច នៃកងកម្លាំងសាធារណៈធ្វើការនាំខ្លួនជនត្រូវចោទដែលមានឈ្មោះ លី សាម៉េត ទៅមណ្ឌលអប់រំកែប្រែទី១ “ម១” ដោយអនុវត្តឲ្យបានត្រឹមត្រូវតាមច្បាប់»។

ប្រធានមណ្ឌលអប់រំកែប្រែទី១ “ម១” ត្រូវ​ទទួល និងឃុំខ្លួនជននេះរហូត ដល់មានបញ្ហាថ្មីសម្រេចផ្សេងពីនេះ និងបង្គាប់ឲ្យគ្រប់ភ្នាក់ងារនៃកងកម្លាំងសាធារណៈទាំងអស់សហការអនុវត្តឲ្យបានល្អនៅពេលដីកានេះត្រូវបានបង្ហាញក្នុងករណីចាំបាច់។

សូមរម្លឹកថា អតីតទីប្រឹក្សា​របស់​សម្តេចអគ្គមហាសេនាបតីតេជោ ហ៊ុន សែន លោក លី សាម៉េត ត្រូវបានបញ្ចូនខ្លួនពីផ្ទះកូនមួយកន្លែងនៅខេត្តព្រះសីហនុ មកដល់ស្នងការដ្ឋាននគរបាលរាជធានីភ្នំពេញហើយនៅយប់ថ្ងៃទី៤ ខែវិច្ឆិកា ឆ្នាំ២០២៤។

ជនត្រូវចោទរូបនេះ ​​បាន​យក​ឈ្មោះសម្តេចតេជោ​​ ហ៊ុន សែន ឆបោក​អ្នក​ដទៃ​មាន​ទឹកប្រាក់​​រាប់​លាន​ដុល្លារ​ រហូត​បែកការណ៍ ឈានដល់មានការចាប់ខ្លួន​ ចោទប្រកាន់ និង​ឃុំខ្លួននៅក្នុងពន្ធនាគារ៕