កាលពីល្ងាចថ្ងៃសុក្រសប្តាហ៍មុន គ្រីស្តបរិស័ទបានជួបជុំគ្នានៅទីលានសន្តសិលាដើម្បីរៀបចំពិធីអធិដ្ឋាននិងសូត្រផ្គាំទូលអង្វរព្រះជាម្ចាស់ឲ្យសុខភាពសម្តេចប៉ាបហ្រ្វង់ស៊ីស្កូមានស្ថានភាពប្រសើរឡើង។
កម្មវិធីនេះបានរៀបចំឡើងក្រោយពេលដែលពួកគេបានជួបជុំគ្នាបញ្ចប់នូវជំនួបដ៏សំខាន់ដែលហៅថាលំហាត់ ខាងវិញ្ញាណប្រចាំឆ្នាំសម្រាប់បុគ្គលិកនិងអ្នកដែលពាក់ព័ន្ធនឹងការងារនៅសន្តអាសនៈ។
វ៉ាទីកង់ញូវបានរាយការណ៍ថា កម្មវិធីនេះបានរៀបចំឡើងនៅក្នុងរង្វង់ម៉ោង ៧ និង ៣០ នាទីល្ងាច ហើយនរណាក៏អាចចូលរួមបានដែរ។
នៅក្នុងកម្មវិធីនេះគ្រីស្តបរិស័ទ ក៏ដូចជាអ្នកទេសចររាប់សិបនាក់បានប្រមូលផ្តុំគ្នា ដើម្បីអធិស្ឋានសុំឲ្យសុខភាពរបស់សម្តេចប៉ាបហ្វ្រង់ស៊ីស្កូ ឆាប់បានជាសះស្បើយពីជំងឺរលាកសួត នៅមន្ទីរពេទ្យ Gemelli នៃទីក្រុងរ៉ូម។
ក្រៅពីអ្នកចូលរួមនៅទីលានសន្តសិលាដោយផ្ទាល់ហើយនោះ ពិធីនេះក៏បានរៀបចំផ្សាយផ្ទាល់តាមបណ្តាញសង្គម ដែលគេដឹងថា មានការចូលរួមពីគ្រីស្តបរិស័ទនៅជុំវិញពិភពលោក។
កាលពីជំនួបអធិដ្ឋាននិងសូត្រផ្គាំកាលពីពេលកន្លងមក ស្ថានភាពសុខភាពបស់សម្តេចប៉ាបប្រសើរបន្តិច ហើយទ្រង់បានសំដែងការអរគុណអស់ពីហឫទ័យដល់អស់អ្នកដែលរិះគិតពីទ្រង់៕
Daily Program
