គណបក្សភ្លើងទៀន លុបឈ្មោះស៊ិន ចាន់ពៅរ៉ូហ៊្សេត ដែលជាបុគ្គលខ្លាំងក្នុងខេត្តបាត់ដំបង ចេញពីបក្ស
គណបក្សភ្លើងទៀន ដែលមានអតីតភាពជាគណបក្សសមរង្ស៊ី បានសម្រេចលុបឈ្មោះអ្នកស្រី ស៊ិន ចាន់ពៅរ៉ូហ៊្សេត ចេញពីគណបក្ស កាលពីថ្ងៃទី១៦ ខែធ្នូ ឆ្នាំ២០២៤។ នេះបើយោងតាមសេចក្តីសម្រេចរបស់គណបក្សភ្លើងទៀនស្តីពីការលុបឈ្មោះសមាជិកភាពចេញពីគណបក្ស។
លោក សំ វង្សតារ៉ា ប្រធានគណៈកម្មាធិការប្រតិបត្តិគណបក្សភ្លើងទៀនខេត្តបាត់ដំបង បានចុះហត្ថលេខាលើសេចក្តីសម្រេចនៃការលុបឈ្មោះលោកស្រី ស៊ិន ចាន់ពៅរ៉ូហ៊្សេត ចេញពីសមាជិកភាពគណបក្ស។
ទាក់ទងនឹងការលុបឈ្មោះនេះ លោកស្រី ស៊ិន ចាន់ពៅរ៉ូហ៊្សេត បានលើកឡើងពីមូលហេតុនៃការដកលោកស្រីចេញពីសមាជិកភាពបក្សក្រោយពីលោកស្រីគាំទ្រគណបក្ស កម្លាំងជាតិ និងរកជំនួយជួយគណបក្ស កម្លាំងជាតិ។
លោកស្រីក៏បានអំពាវនាវដល់ប្រជាពលរដ្ឋខ្មែរទាំងក្នុងប្រទេស និងក្រៅប្រទេសឈប់គាំទ្រគណបក្សភ្លើងទៀនបន្តទៀត។
លោកស្រីបានសរសេរលើបណ្តាញសង្គមហ្វេសប៊ុករបស់លោកស្រីនៅថ្ងៃទី១៧ ខែធ្នូថា គណបក្សនេះ ពីដើម ជាគណបក្សដែលល្អ តែក្រោមការគ្រប់គ្រងរបស់បក្ខពួកមេបច្ចុប្បន្ន បានបំផ្លាញស្មារតីដើម បំផ្លាញកេរ្តិ៍ឈ្មោះដ៏ល្អរបស់បក្សដែលជាគណបក្ស សម រង្ស៊ី។
«ពួកអស់នេះធ្វើការដកសកម្មជនណាដែលស្មោះត្រង់នឹងពលរដ្ឋ ដែលបម្រើទុក្ខលំបាករបស់ពលរដ្ឋ ហើយមិនចេះរណបគេ បង្ខិតបង្ខំសកម្មជនឱ្យទៅបោះឆ្នោតឱ្យគណបក្សផ្សេងដែលគេមិនស្រឡាញ់ ។ មូលហេតុនៃការដកខ្ញុំដោយបំពានលក្ខន្តិកៈនេះ គឺក្រោយពីខ្ញុំគាំទ្រគណបក្ស កម្លាំងជាតិ និងរកជំនួយជួយគណបក្ស កម្លាំងជាតិ»។
លោកស្រីបានបញ្ជាក់បន្តទៀតថា ក្រោយពីគណបក្សភ្លើងទៀនមិនអោយលោកស្រីចូលប្រកួតមក ពួកគេបានបង្ខំឲ្យសកម្មជនភ្លើងទៀនទៅបោះឆ្នោតឲ្យបក្សផ្សេង ដែលជាបក្សដែលក្រុមពួកគេឈរឈ្មោះ តែបើសកម្មជនរូបណាមិនស្តាប់តាមគេទេ ពួកគេគំរាមដកតួនាទីនិងលុបឈ្មោះ។
«ការដកខ្ញុំនេះ គឺខុសពីលក្ខន្តិកៈគណបក្ស ដោយខ្ញុំជាគណៈកម្មាធិការនាយករបស់គណបក្សភ្លើងទៀននៅឡើយ តែត្រូវបានពួកនេះធ្វើខុសលក្ខន្តិកៈដែលតម្កល់ទុកនៅក្រសួងមហាផ្ទៃ»។ លោកស្រី ស៊ិន ចាន់ពៅរ៉ូហ៊្សេត បានលើកឡើង។
លោកស្រីបន្តថា ៖ «បើលុបឈ្មោះខ្ញុំពីគណបក្សនោះ គួរមានលិខិតមួយទៀតពីគណៈកម្មាធិការនាយកបក្ស ជាពិសេសពួកនេះមិនចេះច្បាប់ដែលខ្លួនឯងបានបង្កើតឡើងឡើយ ដោយដកខ្ញុំម្តងហើយពីលេខាធិការបក្សខេត្តដោយបំពាន ហើយពេលនេះលុបឈ្មោះខ្ញុំម្តងទៀត ទាំងខ្ញុំនៅជាគណៈកម្មាធិការនាយក និយាយរួមពួកនេះបំពានច្បាប់លក្ខន្តិកៈគណបក្ស បំពានច្បាប់គណៈកម្មាធិការនាយក»។
សូមបញ្ជាក់ដែរថា នៅថ្ងៃទី១៦ ខែធ្នូដដែលនោះ គណៈកម្មាធិការប្រតិបត្តិគណបក្សភ្លើងទៀនខេត្តបាត់ដំបង ក៏បានលុបឈ្មោះលោក ឌុច សាវុធ ចេញពីសមាជិកភាពរបស់គណបក្សនេះដែរ៕
Daily Program
