ការខូចខាតដែលកើនកាន់តែខ្ពស់ដែលមិនធ្លាប់មានសម្រាប់រុស្ស៊ី។ នៅអំឡុង ៨ខែដើមឆ្នាំ២០២៥ រុស្ស៊ី បានបាត់បង់ទាហាន ២៨១៥៥០នាក់ នៅអ៊ុយក្រែន។ តួលេខដែលមានប្រភពពីឯកសារដែលទទួលបានពីប្រព័ន្ធផ្សព្វផ្សាយអនឡាញអាម៉េរិក ប៉ូលីទីកូ Politico ដោយយោងតាមសេវាកម្មចារកម្មរបស់អ៊ុយក្រែនពីព័ត៌មានបែកធ្លាយរបស់រុស្ស៊ី។ បើជឿលើឯកសារ នោះគឺមានទាហានរុស្ស៊ី ៨៦៧៤៤នាក់ បានស្លាប់ ចាប់តាំងដើមឆ្នាំ ៣៣៩៦៦នាក់ បានបាត់ខ្លួន ១៥៨៥២៩នាក់ រងរបួស និង ២៣១១នាក់ ត្រូវបានចាប់ខ្លួន។
ទោះបីជាយ៉ាងណា តួលេខទាំងនេះត្រូវបានតវ៉ា។ គេហទំព័ររុស្ស៊ី ម៉េឌីយ៉ាហ្ស៉ូណា Mediazona ដែលដឹកនាំជាមួយទូរទស្សន៍ BBC នូវគម្រោងការកំណត់អត្តសញ្ញាញទាហានរុស្ស៊ីដែលបានស្លាប់នៅក្នុងការប្រយុទ្ធចាប់តាំងពីដើមដំបូងនៃសង្រ្គាម និងរហូតមកដល់ពេលនេះ រាប់ឃើញមានចំនួនទាហានស្លាប់ ១៣៤០០០នាក់។ វាបង្កបានការសង្ស័យ។ ប៉ុន្តែ សម្រាប់ក្រុមអន្តរជាតិនៃចារកម្ម ហ្វ្រ៉ាន់ថេលីជេន អ៊ីនសាយ Frontelligence Insight បានឲ្យដឹងថា ឯកសារនេះគឺច្បាស់ល្មម និងមានទំនាក់ទំនងផ្ទាល់នឹងការវាយតម្លៃត្រឹមត្រូវនៃសេវាចារកម្មឯករាជ្យ។
ប៉ូលីទីកូ វិនិច្ឆ័យថា ស្ថិតិ ដែលបង្ហាញអំពីរបៀបគ្មានប្រសិទ្ធភាពដែលទីក្រុងក្រឹមឡាំង ដឹកនាំធ្វើសង្រ្គាម និងឥទ្ធិពលនៃសង្រ្គាមដ្រូន ដែលកងកម្លាំងដ្រូនអ៊ុយក្រែនដឹកនាំប្រឆាំងនឹងរុស្ស៊ី។
យោងតាមរបាយការណ៍មួយបានឲ្យដឹងថា អត្រាផលធៀបខាងរុស្ស៊ី គឺក្នុងអ្នករបួស ១,៣ នាក់ មានម្នាក់ស្លាប់ ទល់នឹង អ្នករបួស ៣នាក់ មានម្នាក់ស្លាប់ សម្រាប់សង្រ្គាមផ្សេងៗ។ នេះបង្ហាញថា ការរស់រានមានជីវិត គឺទាបណាស់សម្រាប់ទាហានរុស្ស៊ី។ ឯកសារក៏បានធ្វើសេចក្តីលំអិតថា មានអត្រាដ៏ទាបនៃការរស់រានមានជីវិតនៃទាហានរងរបួស ដែលបានមកពីគ្រូពេទ្យដែលទទួលបានការបណ្តុះបណ្តាលមិនល្អ និងជាទូទៅ ទាហានត្រូវបានបោះបង់ចោលដោយគ្មានជំនួយ បន្ទាប់ពីបានរងរបួស។
ចាប់តាំងពីដើមនៃការឈ្លានពានរបស់រុស្ស៊ីនៅឆ្នាំ២០២២ អគ្គមេបញ្ជាការកងទ័ពអ៊ុយក្រែន វាយតម្លៃថា ការបាត់បង់របស់ទាហានរុស្ស៊ី ឡើងហួសជាង ១លាននាក់ បានស្លាប់ រងរបួស និងបាត់ខ្លួន ឬប្រមាណ ១០០០នាក់ ក្នុងមួយថ្ងៃ។
កងកម្លាំងរបស់រុស្ស៊ីបាត់បង់ដ៏សម្បើមដែរ។ ដ្រូនរបស់អ៊ុយក្រែន ដាក់លើគោលដៅទាហានម្នាក់ៗ នៅខណៈដែលរ៉ូកែត និងកាំភ្លើងធំវាយប្រហារលើខ្សែផ្គត់ផ្គង់។ ទាហានដែលប្រើប្រាស់ក្នុងការវាយប្រហារជារលកទ័ពថ្មើរជើង គឺទទួលរងការបាត់បង់កើនឡើងដូចព្រួញ។ កាលពីខែមិថុនា ឆ្នាំ២០២៥ ហ្វ្រ៉ាន់ថេលីជេន អ៊ីនសាយ Frontelligence Insight វាយតម្លៃថា រុស្ស៊ីបានបាត់បង់បុគ្គលិកយោធាពី៨៤០០នាក់ ទៅដល់ ១០៥០០ នាក់ ក្នុងមួយខែ ឬត្រូវសម្លាប់ក្នុងការប្រយុទ្ធ។ ទោះបីជាមានការបាត់បង់ទាំងនេះ ទាហានរុស្ស៊ីបន្តការវាយប្រហារ ដែលសម្រេចវឌ្ឍនភាពទៅមុខផ្នែកតាក់ទិកដែលមានកម្រិត ប៉ុន្តែពួកគេនៅតែស៊ូទ្រាំនៅក្នុងសង្រ្គាមដែលចំណាយដ៏ថ្លៃខាងជីវិតមនុស្ស។
នៅលើសមរភូមិ ទាហានទីក្រុងក្រឹមឡាំងបន្តដណ្តើមបានទឹកដីដោយមានប្រសិទ្ធភាព។ កាលពីខែកញ្ញា មុន ឧត្តមសេនីយ៍ អូឡេចសានដ្រ៍ សៀស្គី អគ្គមេបញ្ជាការទាហានអ៊ុយក្រែន វាយតម្លៃប្រាប់សារព័ត៌មានថា ខ្សែត្រៀមសមរភូមិ បានរីកលាតសន្ធឹង ២០០ គម នៅឆ្នាំនេះ។
លើសពីនេះ ខ្សែសមរភូមិ ២៤០០ គម មិនមានប្រតិបត្តិការប្រយុទ្ធ ប៉ុន្តែអ៊ុយក្រែនក៏ត្រូវឈជើងថែរក្សា និងដាក់កម្លាំងប្រចាំការ។ លោកឧត្តមសេនីយ៍ ក៏ធ្វើសន្និដ្ឋានអំពីស្ថានភាពជាទូទៅនៃខ្សែត្រៀមសមរភូមិដែលស្ថិតនៅតែលំបាក និងរុស្ស៊ីបន្តឆ្ពោះទៅមុខលើទិសដៅសំខាន់ៗ មានជាអាទិ៍នៅតំបន់ ប៉ូក្រូវស្ក៍ និងដូប្រូពីយ៉ាជាដើម។
Daily Program
