នៅពេលដែលការវាយប្រហារគ្នាទៅវិញទៅមករវាងអ៊ីស្រាអែល និងអ៊ីរ៉ង់នៅតែបន្តប្រមាណជា១សប្តាហ៍ជាប់គ្នា ក្រុមលោកអភិបាលនៃព្រះសហគមន៍កាតូលិកនៅសហរដ្ឋអាមេរិកបាន អំពាវនាវឱ្យប្រទេសរបស់ពួកគេ និងសហគមន៍អន្តរជាតិឱ្យចូលរួមក្នុងកិច្ចខិតខំប្រឹងប្រែងការទូតបន្ថែមទៀតដើម្បីលើកកម្ពស់សន្តិភាពនៅមជ្ឈិមបូព៌ា។
ក្រុមលោកអភិបាលបានកំពុងអំពាវនាវដល់រដ្ឋាភិបាលសហរដ្ឋអាមេរិក និងសហគមន៍អន្តរជាតិទាំងមូល ឱ្យខិតខំប្រឹងប្រែងដើម្បីបន្តទំនាក់ទំនងការទូតពហុភាគី ដើម្បីសម្រេចបាននូវ សន្តិភាពយូរអង្វែងរវាងអ៊ីស្រាអែល និងអ៊ីរ៉ង់។
ជម្លោះបច្ចុប្បន្នបានផ្ទុះឡើងកាលពីថ្ងៃសុក្រសប្តាហ៍មុន នៅពេលដែលអ៊ីស្រាអែលបើកការវាយឆ្មក់តាមអាកាសលើអ៊ីរ៉ង់ ដែលបានសម្លាប់មន្ត្រីយោធាជាន់ខ្ពស់ ក៏ដូចជាអ្នកវិទ្យាសាស្ត្រដែលធ្វើការលើកម្មវិធីនុយក្លេអ៊ែររបស់អ៊ីរ៉ង់។ អ៊ីរ៉ង់បានឆ្លើយតបដោយការវាយប្រហារដោយកាំជ្រួចនិងគ្រាប់រ៉ុក្កែតលើគោលដៅក្នុងប្រទេសអ៊ីស្រាអែលនានា។
នៅក្នុងសេចក្តីថ្លែងការណ៍ដែលចេញផ្សាយដោយក្រុមអន្តរសភាលោកអភិបាលនៃព្រះសហគមប៍សហរដ្ឋអាមេរិក លោកអភិបាល អេលៀរ ហ្សៃដាន (Elias Zaidan) ប្រធានគណៈកម្មាធិការយុត្តិធម៌ និងសន្តិភាពអន្តរជាតិនៃក្រុមអន្តរសភាលោកអភិបាល បានព្រមានថា ការរីកសាយភាយអាវុធនុយក្លេអ៊ែរបន្ថែមទៀតនៅមជ្ឈិមបូព៌ា ក៏ដូចជាការកើនឡើងនៃអំពើហិង្សានេះរារាំងស្ថិរភាពដ៏ផុយស្រួយដែលនៅសេសសល់នៅក្នុងតំបន់៕
Daily Program
