មេដឹកនាំបរទេស ប្រមាណ ២០រូប ដែលជាសម្ព័ន្ធមិត្ត ឬដៃគូ ប្រទេសរុស្ស៊ី នឹងត្រូវបានទទួលស្វាគម៍ចាប់តាំងពីថ្ងៃទី២២ ខែតុលា ឆ្នាំ២០២៤ ដោយប្រធានាធិបតីរុស្ស៊ី លោកវ្លាឌីមៀ ពូទីន ក្នុងកិច្ចប្រជុំកំពូលប្រចាំឆ្នាំ Brics នៅទីក្រុងកាហ្ស៉ង ប្រទេសរុស្ស៊ី។ នេះគឺជាសម្ព័ន្ធមិត្តនៃប្រទេសដែលទើបលេចឡើង ដែលវិមានក្រឹមឡាំង ប្រាថ្នាប្រជែងនឹងអនុត្តរភាពរបស់លោកខាងលិច។
កិច្ចប្រជុំកំពូល Brics កើតមាននៅខណៈដែលទីក្រុងមូស្គូ ទទួលជ័យជម្នះចំណេញខាងយោធាបានទឹកដីនៅអ៊ុយក្រែន។ ទីក្រុងមូស្គូក៏ស្ថាបនាសម្ព័ន្ធមិត្តជិតស្និទ្ធជាមួយនឹងគូប្រជែងដ៏ធំរបស់សហរដ្ឋអាម៉េរិក មានដូចជា ចិន អ៊ីរ៉ង និងកូរ៉េខាងជើងជាដើម។
វិមានក្រឹមឡាំង បានអួតអំពីការរៀបចំព្រឹត្តិការណ៍ការទូតដែលមានសារសំខាន់បំផុតដែលមិនដែលធ្លាប់មាននៅប្រទេសរុស្ស៊ី និងបានចម្អកឲ្យលោកខាងលិចអំពីការបរាជ័យនៃនយោបាយរបស់ពួកគេក្នុងការធ្វើឲ្យលោកវ្លាឌីមៀ ពូទីន នៅឯកា ចាប់តាំងពីការវាយប្រហារលើអ៊ុយក្រែន នៅខែកុម្ភៈ ឆ្នាំ២០២២។
នៅក្នុងកណ្តាលក្រុង កាហ្ស៉ង ប្រទេសរុស្ស៊ី នៅលើច្រាំងទន្លេ វ៉ុលហ្គា វិធានការសន្តិសុខត្រូវបានពង្រឹងយ៉ាងខ្លាំងក្លា។ ប្រជាជនត្រូវបានបង្គាប់ឲ្យស្ថិតនៅក្នុងផ្ទះរបស់ពួកគេ។
ទីក្រុងកាហ្ស៉ង ដែលមានចម្ងាយ ១០០០ គម ពីព្រំដែនអ៊ុយក្រែន បានទទួលរងជាច្រើនសានូវការវាយប្រហារដោយដ្រូនដែលមកពីប្រទេសអ៊ុយក្រែន និងដែលសំដៅទៅលើមជ្ឈមណ្ឌលឧស្សាហកម្មដែលពាក់ព័ន្ធនឹងយោធា។
យោងតាមវិមានក្រឹមឡាំង បានឲ្យដឹងថា លោកវ្ល៉ាឌីមៀ ពូទីន ត្រូវចាប់ផ្តើមមានជំនួបទ្វេភាគីជាបន្តបន្ទាប់ចាប់តាំងពីថ្ងៃអង្គារ ទី២២ ខែតុលា រហូតដល់ថ្ងៃព្រហស្បតិ៍ ជាមួយមេដឹកនាំជាង ១០ប្រទេស។
នេះគឺជាសញ្ញាដ៏មានសារសំខាន់នៃរបត់យុទ្ធសាស្រ្តដែលប្រកាន់យកដោយទីក្រុងមូស្គូ ឆ្ពោះមកកាន់អាស៊ី។ ប្រមុខវិមានក្រឹមឡាំង នៅថ្ងៃទី១ ចាប់ផ្តើមកិច្ចប្រជុំជាមួយសម្ព័ន្ធមិត្តចិនរបស់លោក គឺលោកស៊ី ជីនពីង។
បើយោងតាមវិមានក្រឹមឡាំង បានឲ្យដឹងទៀតថា បន្ទាប់មក លោកវ្ល៉ាឌីមៀ ពូទីន នឹងជួបលោកនាយករដ្ឋមន្រ្តីឥណ្ឌា លោកណារិនដ្រា ម៉ូឌី។
ប្រមុខរដ្ឋរុស្ស៊ី នឹងជួបសន្ទនានៅថ្ងៃពុធ ជាមួយសមាភាគីទួរគី លោករ៉ឺសេព តៃយីប អៀដូហ្គ៉ង់ ដែលប្រទេសទួរគី គឺជាសមាជិកអង្គការណាតូ ហើយបានសុំចូលរួមជាមួយ Brics រួមជាមួយនឹងប្រធានាធិបតីអ៊ីរ៉ង លោកម៉ាស៊ូដ ប៉េហ្សេស្ហ្គៀន។
បន្ទាប់មកនៅថ្ងៃព្រហស្បតិ៍ លោកវ្លាឌីមៀ ពូទីន ក៏មានជំនួបប្រជុំទល់មុខ ជាមួយអគ្គលេខាអង្គការសហប្រជាជាតិ លោកអន់តូនីញ៉ូ ហ្គូទែរ៉េសផងដែរ។ នេះគឺជាជំនួបរបស់ឥស្សរជនទាំងពីរចាប់តាំងពីខែមេសា ឆ្នាំ២០២២។
ចំណែកជម្លោះនៅអ៊ុយក្រែន និងការកើនឡើងភាពតានតឹងនៅមជ្ឈិមបូព៌ា ត្រូវបានលើកឡើង ហើយក៏ដូចជាការរៀបចំអនាគតនៃប្រព័ន្ធទូទាត់អន្តរជាតិដែលរៀបចំដើម្បីប្រជែងជាមួយប្រព័ន្ធ Swift ដែលធនាគាររបស់រុស្ស៊ីភាគច្រើនត្រូវបានផាត់ចេញបន្ទាប់ពីការឈ្លានពានរបស់រុស្ស៊ីនៅអ៊ុយក្រែន។
លោកវ្ល៉ាឌីមៀ ពូទីន នឹងធ្វើសន្និសីទកាសែតនៅចុងបញ្ចប់នៅកិច្ចប្រជុំកំពូល។
អ្នកវិភាគនយោបាយរុស្ស៊ី លោកកូនស្តាន់ទីន កាឡាតឆេវ បញ្ជាក់ថា កិច្ចប្រជុំកំពូល Brics នេះសំដៅបង្ហាញថា រុស្ស៊ីមិនគ្រាន់តែនៅឆ្ងាយពីការឯកា ប៉ុន្តែរុស្ស៊ីមានដៃគូ និងសម្ព័ន្ធមិត្តផងដែរ។
Daily Program
