ការស្លាប់របស់លោកអាលី ឡារីចានី លោកម៉ូជតាបា ខាមឺនៃ ថ្លែងថា ឧក្រិដ្ឋជននឹង ត្រូវបង់ថ្លៃដោយឈាមរបស់ពួកគេ
យោងតាមទីភ្នាក់ងារសារព័ត៌មាន តាស្ន៊ីម នៅទីក្រុងតេអេរ៉ង់ ប្រទេសអ៊ីរ៉ង់ បានឲ្យដឹងថា មេដឹកនាំកំពូលអ៊ីរ៉ង់ លោកមូជតាបា ខាមឺនៃ បានចូលរួមរំលែកការគោរពវិញ្ញាណក្ខន្ធ នៅក្នុង សារមួយ ចំពោះប្រមុខសន្តិសុខអ៊ីរ៉ង់ លោកអាលី ឡារីចានី ដែលត្រូវបានសម្លាប់ដោយការ វាយប្រហារដែលអះអាងថាជាស្នាដៃរបស់អ៊ីស្រាអែល។ សារបញ្ជាក់ថា ឧក្រិដ្ឋជនទាំងនោះនឹងត្រូវបង់ថ្លៃឆាប់ៗដោយឈាមរបស់ពួកគេ។ មិនមានការសង្ស័យទេថា ការធ្វើឃាតជីវិតបុគ្គលសំខាន់បែបនេះ បង្ហាញពីសារៈសំខាន់របស់គាត់ និងការស្អប់របស់សត្រូវអ៊ីស្លាមចំពោះរូបគាត់។ សត្រូវឥស្លាមត្រូវដឹងថា ឈាមដែលបានហូរនៅគល់ដើមឈើដ៏រឹងមាំនៃប្រព័ន្ធឥស្លាម មិនបានធ្វើអ្វីក្រៅពីការធ្វើឲ្យប្រព័ន្ធនេះមានកម្លាំងកាន់តែរឹងម៉ាំ។
គេក៏អាចអានបាននៅលើបណ្តាញតេឡេក្រាមរបស់លោកមូជតាបា ខាមឺនៃ ដែលថា ច្បាស់ណាស់ រាល់ដំណក់ឈាមត្រូវតែមានតម្លៃ ៖ អ្នកដែលជាឧក្រិដ្ឋជន ដែលទទួលខុសត្រូវចំពោះការសម្លាប់វីរបុរស នឹងត្រូវបង់តម្លៃនេះក្នុងពេលឆាប់ៗ។
ចំណែកលោកស្រីទុលស៊ី ហ្គាបាក នាយិកានៃចារកម្មជាតិអាម៉េរិក បានថ្លែងកាលពីថ្ងៃពុធ ទី១៨ ខែមីនា ថា រដ្ឋាភិបាលអ៊ីរ៉ង់បានចុះទន់ខ្សោយចាប់តាំងពីការចាប់ផ្តើមនៃសង្រ្គាមកាលពីថ្ងៃទី២៨ ខែកុម្ភៈ ប៉ុន្តែវាហាក់ដូចជាមិនទាន់ខូចខាតទេ ហើយទីក្រុងតេអេរ៉ង់ និងសម្ព័ន្ធមិត្តរបស់ពួកគេនៅតែមានសមត្ថភាពវាយប្រហារផលប្រយោជន៍របស់សហរដ្ឋអាម៉េរិក និងសម្ព័ន្ធមិត្តនៅតំបន់មជ្ឈិមបូព៌ា។
ដោយយោងលើយុទ្ធនាការយោធាអាម៉េរិកអ៊ីស្រាអែលប្រឆាំងនឹងអ៊ីរ៉ង់ នៅក្នុងសេចក្តីថ្លែងការណ៍បើកកិច្ចសវនាការប្រចាំឆ្នាំរបស់គណៈកម្មាធិការព័ត៌មានសម្ងាត់នៃសភាសហរដ្ឋអាម៉េរិកអំពីការគំរាមកំហែងពិភពលោកដែលជះឥទ្ធិពលលើសហរដ្ឋអាមេរិក លោកស្រី បានបញ្ជាក់ថា ៖ “របបអ៊ីរ៉ង់ហាក់ដូចជាមិនទាន់ខូចខាត ប៉ុន្តែបានទទួលរងចុះទន់ខ្សោយជាទូទៅដោយប្រត្តិបតិការយោធា Epic Fury (កំហឹងវរបុរស)។ លោកស្រីបានថ្លែងថា ៖ “ទោះបីជាដូច្នេះក៏ដោយ អ៊ីរ៉ង់ និងសម្ព័ន្ធមិត្តរបស់ខ្លួននៅតែមានសមត្ថភាពវាយប្រហារផលប្រយោជន៍អាម៉េរិក និងសម្ព័ន្ធមិត្តនៅមជ្ឈិមបូព៌ា និងបន្តធ្វើការវាយប្រហារដដែល។ ប្រសិនបើរបបប្រទូស្តរាយនៅរស់រាន គេនឹងចាប់ផ្តើមដំណើរការដ៏វែងនៃការស្តារឡើងវិញនូវកងកម្លាំង មីស៊ីល និងដ្រូន”។
លោកម៉ាក រ៉ូតតេ អគ្គលេខានៃអង្គការណាតូ បានថ្លែងថា សម្ព័ន្ធមិត្តនៃអង្គការណាតូ ពិភាក្សារួមគ្នាក្នុងរបៀបដែលច្រកសមុទ្រអ័រមូសនឹងអាចត្រូវបានបើកឡើងវិញ។ ណាតូបានព្រមព្រៀងគ្នាច្បាស់ណាស់ លើសារសំខាន់ចាំបាច់នឹងបើកផ្លូវដោះដូរពាណិជ្ជកម្ម។ នៅពេលឆ្លើយតបទៅកាន់អ្នកកាសែតក្នុងអំឡុងពេលទស្សនកិច្ចនៅប្រទេសណ័រវេស លោកម៉ាក រ៉ូតតេ បានថ្លែងថា លោកដឹងថា សម្ព័ន្ធមិត្តណាតូធ្វើការជាមួយគ្នា ពិភាក្សាអំពីមធ្យោបាយដើម្បីបើកច្រកនេះឡើងវិញ។ សម្ព័ន្ធមិត្តធ្វើការរួមគ្នាដើម្បីស្វែងរកដំណោះស្រាយ។
ចំណែករដ្ឋមន្រ្តីការពារជាតិអ៊ីស្រាអែល លោកអ៊ីស្រាអែល កាត បានថ្លែងកាលពីថ្ងៃពុធ ដែរថា រដ្ឋមន្រ្តីក្រសួងចារកម្មអ៊ីរ៉ង់ លោកអេស្មេល ខាទីប ត្រូវបានសម្លាប់ក្នុងអំឡុងការវាយប្រហារដែលធ្វើឡើងនាពេលរាត្រីថ្ងៃពុធ។ ការស្លាប់របស់រដ្ឋមន្រ្តីរូបនេះត្រូវបានបញ្ជាក់ដោយប្រធានាធិបតីអ៊ីរ៉ង់ លោកម៉ាស៊ូដ ប៉េហ្សេស្ហគៀន នៅលើបណ្តាញសង្គមអ៊ិក X របស់លោក។រដ្ឋមន្ត្រីការពារជាតិអ៊ីស្រាអែល បានប្រកាសថា លោក និងនាយករដ្ឋមន្ត្រីអ៊ីស្រាអែល លោកបេនយាមីន នេតាន់យ៉ាហ៊ូ បានអនុញ្ញាតឲ្យកងទ័ពសម្លាប់មន្ត្រីជាន់ខ្ពស់អ៊ីរ៉ង់ផ្សេងៗទៀត ដែលត្រូវបានដាក់គោលដៅ ដោយមិនចាំបាច់សុំឲ្យមានការអនុម័តបន្ថែមទៀតឡើយ។
Daily Program
