យោងតាមប្រធានាធិបតីរុស្ស៊ី លោកវ្លាឌីមៀ ពូទីន នេះគឹជាការបង្កហេតុថ្មីក្នុងកម្រិតធំធេង។ កាលពីថ្ងៃអង្គារ៍ ទី៦ ខែសីហា រុស្ស៊ីបានប្រកាសប្រឆាំងនឹងការជ្រៀតចូលរបស់យោធា អ៊ុយក្រែននៅក្នុងតំបន់ក្បែរព្រំដែនអ៊ុយក្រែន គូស្ក៍។
យោងតាមក្រសួងការពារជាតិរុស្ស៊ី កងកម្លាំងអ៊ុយក្រែន បានជ្រៀតចូលក្នុងតំបន់របស់រុស្ស៊ី នេះ ជាមួយនឹងរថក្រោះ ១០គ្រឿង និងរថពាសដែកជាង ២០គ្រឿង។ យោងតាមសារព័ត៌មាន Financial Times អគ្គមេបញ្ជាការយោធារុស្ស៊ី លោកឧត្តមសេនីយ៍វ៉ាឡេរី ហ្គេរ៉ាស៊ីម៉ូវ បានបញ្ជាក់ក្រោយមកថា ទាហានអ៊ុយក្រែនរហូតដល់ ១០០០នាក់ ត្រូវបានចល័តក្នុងពេលប្រតិបត្តិការ។ ចំណែកទីក្រុងគៀវ រក្សាភាពស្ងៀមស្ងាត់សម្រាប់បេសកកម្មនេះ។
អាជ្ញាធរតំបន់ បាននិយាយថា មនុស្សរាប់ពាន់នាក់ត្រូវបានជម្លៀសចេញពីតំបន់នេះ ដោយសារតែការប្រយុទ្ធ និងការទម្លាក់គ្រាប់បែក ដែលធ្វើឲ្យជនស៊ីវិលយ៉ាងហោចណាស់ ៥នាក់ស្លាប់ និង២៨នាក់ទៀតរងរបួស។ ហើយគ្រប់សកម្មភាពសាធារណៈត្រូវបានលុបចោល។
នៅអ៊ុយក្រែន នៅក្នុងតំបន់ស៊ូមី ដែលទល់មុខនឹងតំបន់ គូស្ក៍រុស្ស៊ី អាជ្ញាធរបានបញ្ជាឲ្យ ជម្លៀសជាដាច់ខាតចេញពីទីប្រជុំជនចំនួន ២៣។ យោងតាមអាជ្ញាធរតំបន់នេះ លោក វ៉ូឡូឌីមៀ អាកទីយ៉ុខ បានឲ្យដឹងថា នេះគឺជាវិធានការដែលពាក់ព័ន្ធនឹងមនុស្ស ៦០០០នាក់ ក្នុងនោះមានកុមារ ៤២៥នាក់។
យោងតាមក្រសួងសុខាភិបាលរុស្ស៊ី មនុស្ស ១៣នាក់ ដែលមានក្មេង ៣នាក់ ត្រូវបានបញ្ជូនទៅកាន់មន្ទីរពេទ្យនៅក្នុងតំបន់បន្ទាប់ពីការទម្លាក់គ្រាប់បែករបស់អ៊ុយក្រែន។
ប្រធានាធិបតីរុស្ស៊ី លោកវ្លាឌីមៀ ពូទីន បានចោទប្រកាន់កងកម្លាំងអ៊ុយក្រែនថាបានបាញ់ដោយមិនមើលជាមួយនឹងអាវុធផ្សេងៗ និងរ៉ូកែត ទៅលើអគារជនស៊ីវិល លំនៅដ្ឋាន និងឡានពេទ្យផង។ ក្រោយមកលោកជួបពិភាក្សាជាមួយមន្រ្តីកងកម្លាំងសន្តិសុខ និងយោធា និងបញ្ជាឲ្យអាជ្ញាធរតំបន់ផ្តល់ជំនួយចាំបាច់ទៅដល់ប្រជាជន។
ក្រសួងការពារជាតិរុស្ស៊ីអះអាងថា ទាហានរុស្ស៊ី បានរារាំងសត្រូវចូលជ្រៅនៅក្នុងដែនដីរុស្ស៊ី និងហាក់ដូចជាទទួលស្គាល់ថា ទាហានអ៊ុយក្រែនបានដណ្តើមដីគ្រប់គ្រងនៅក្នុងពេលជ្រៀតចូលនេះ។
អគ្គមេបញ្ជាការកងទ័ពរុស្ស៊ី ឧត្តមសេនីយ៍ វ៉ាឡេរី ហ្គេរ៉ាស៊ីម៉ូវ ក៏បានអះអាងប្រាប់លោកពូទីនថា ៖ ”ការរុលទៅមុខរបស់សត្រូវនៅក្នុងជម្រៅនៃដែនដីរុស្ស៊ី ត្រូវបានបញ្ឈប់ដោយការវាយប្រហារតាមផ្លូវអាកាស និងកាំភ្លើងធំ។”
យោងតាមបណ្តាញ តេឡេក្រាម រីបា ដែលមានមនុស្សតាមដានជាង ១លាននាក់ និងស្និទ្ធនឹងយោធារុស្ស៊ី បានឲ្យដឹងថា កងកម្លាំងអ៊ុយក្រែន ដណ្តើមបានភូមិ៣ នៅក្នុងតំបន់ គូស្ក៍។ ចំណែក។ប្រភពមួយនៅក្នុងសេវាកម្មសន្តិសុខអ៊ុយក្រែន SBU បានអះអាងថា ការបំផ្លាញ តាមផ្លូវអាកាសដោយប្រើដ្រូនតូច កំទេច ឧទ្ធម្ភាចក្ររុស្ស៊ី Mi-28 គឺជាប្រវត្តិសាស្រ្តទី១ នៅក្នុងសង្រ្គាម។
អាជ្ញាធរអ៊ុយក្រែនត្រូវបានគេពិនិត្យឃើញនូវភាពស្ងៀមស្ងាត់ស្ទើតែទាំងស្រុងនៅក្នុងតំបន់ គូស្ក៍។ មន្រ្តីជាន់ខ្ពស់អ៊ុយក្រែនជាច្រើន បានបដិសេធមិនធ្វើការអធិប្បាយ។
អ្នកជំនាញយោធាអ៊ុយក្រែន លោកសឺហ្គ៊ីអ៊ី ហ្គូរ៉េ បានថ្លែងថា គោលដៅមួយក្នុងចំណោមគោលដៅជាច្រើនរបស់ទីក្រុងគៀវ គឺទាញធនធានបម្រុងរបស់រុស្ស៊ី ធ្វើឲ្យងាយស្រួលដល់សកម្មភាពយោធារបស់អ៊ុយក្រែននៅក្នុងតំបន់ខាកគៀវ និងអាចជាតំបន់ដទៃៗ ទៀតដែរ។ លោកវាយតម្លៃថា ទាហានអ៊ុយក្រែនហាក់ព្យាយាមបង្វែរកងកម្លាំងរុស្ស៊ីចេញពីតំបន់ផ្សេងៗ នៃសមរភូមិផងដែរ។
Daily Program
