ការរាប់ថយក្រោយបានចាប់ផ្តើមហើយសម្រាប់បូជនីយេសក៍ឆ្ពោះទៅក្តីសង្ឃឹម​ដ៏អស្ចារ្យ​នៅប៉េណាំង

ទីក្រុងប៉េណាំង ប្រទេសម៉ាឡេស៊ី ដែលមានភាពរស់រវើក កំពុងត្រៀមខ្លួនធ្វើជាម្ចាស់ផ្ទះ បូជនីយេសក៍ឆ្ពោះទៅក្តីសង្ឃឹម ដែលជាការជួបជុំសំខាន់របស់មេដឹកនាំកាតូលិកនៅទូទាំងទ្វីបអាស៊ី ចាប់ពីថ្ងៃទី ២៧ ដល់ថ្ងៃទី ៣០ ខែវិច្ឆិកា ឆ្នាំ២០២៥។ ព្រឹត្តិការណ៍នេះប្រមូលផ្តុំនូវអភិបាល បូជាចារ្យ បព្វជិត-ជិតា និងមេដឹកនាំជាគ្រហស្ថ ដោយមានគោលបំណងពិចារណា ជជែកគ្នា ប្រារព្ធ និងគូសបង្ហាញផ្លូវដែលពោរពេញដោយក្តីសង្ឃឹមសម្រាប់ព្រះសហគមន៍កាតូលិកនៅអាស៊ី។

ឯកឧត្តម លោក Datuk Aaron Agu Dagang រដ្ឋមន្ត្រីក្រសួងឯកភាពជាតិ ប្រទេសម៉ាឡេស៊ី នឹងផ្តល់កិត្តិយសក្នុងពិធីបើកសម្ពោធនៅថ្ងៃទី ២៧ ខែវិច្ឆិកា នៅទីក្រុងប៉េណាំង ហើយនឹងថ្លែង សុន្ទរកថាបើកព្រឹត្តិការណ៍នេះ។

ប្រធានបទ និងគោលបំណង

ធម្មយាត្រានឹងឆ្លុះបញ្ចាំងលើប្រធានបទ “ការធ្វើដំណើររួមគ្នាជាសហគមន៍​នៃប្រជាជាតិអាស៊ី” ដោយគូសបញ្ជាក់ពីបំណងប្រាថ្នារបស់ព្រះសហគមន៍កាតូលិកដើម្បីរួម​គ្នាក្នុងជំនឿ និងប្រារព្ធភាពសម្បូរបែបនៃទ្វីបនេះ។ កម្មវិធី​នេះ រៀបចំដោយការិយាល័យផ្សាយដំណឹងល្អនៃសភា​​អភិបាលកាតូលិកអាស៊ី​(FABC) និងធ្វើជាម្ចាស់ផ្ទះដោយភូមិភាគប៉េណាំង ហើយ​​គាំទ្រដោយសមាគមបេសកកម្ម​នៃ​​សន្តអន្តអាសនៈសម្រាប់ទ្វីបអាស៊ី (Pontifical Mission Societies – Asia) និងសហការជាមួយសភាអភិបាលកាតូលិកនៃប្រទេសម៉ាឡេស៊ី សិង្ហបុរី និងប្រ៊ុយណេ។

គណៈប្រតិភូ និងកម្មវិធី

ធម្មយាត្រា នឹងប្រមូលផ្តុំគណៈប្រតិភូចំនួន​៧៧៣នាក់ មកពី ២៣ ប្រទេស រួមមាន ឥណ្ឌា (១២២) ហ្វីលីពីន (១២៨) ម៉ាឡេស៊ី (១៤៤) ថៃ (៣៤) វៀតណាម (៣០) និងប្រទេសដទៃទៀត។ ការជួបជុំនេះនឹង​ចូលរួមពីមេដឹកនាំព្រះសហគមន៍កាតូលិកសំខាន់ៗដូចជា កាឌីណាល់ លូវីស អាន់តូនីញ៉ូ តាគ្លេ (Cardinal Luis Antonio Cardinal Tagle) អ្នកទទួល​ខុស​ត្រូវ​លើ​ក្រសួងសម្រាប់​ប្រកាសដំណឹងល្អសម្រាប់​ប្រជាជាតិទាំងឡាយ កាឌីណាល់ ប៉ាប៉្លូ វើគីលីអូ ដាវីឌ (Cardinal Pablo Virgilio David) អភិបាលនៃភូមិភាគកាលូកាន-ហ្វីលីពីន លោកអគ្គអភិបាល​ ស៊ីមូន ផូ (Archbishop Simon Poh) អភិបាល​នៃភូមិភាគ​គូឈីង-ម៉ាឡេស៊ី កាឌីណាល ដាតូ ស៊ើរី សេបាស្ទៀន ហ្វ្រាន់ស៊ី (Cardinal Dato’ Seri Sebastian Francis) អភិបាលនៃភូមិភាគប៉េណាំង និងអភិបាល ចច ប៉ាលីពប៉ារ៉ាមបីល (Bishop George Pallipparambil, SDB) ប្រធានគណៈកម្មការនៃការិយាល័យ​សម្រាប់​ប្រកាសដំណឹងល្អ​របស់សភាលោកអភិបាល​អាស៊ី។

អនុលោមតាមទម្រង់នៃការប្រជុំតាមបែបស៊ីណូដាល (Synodal Format) ធម្មយាត្រានឹងលើកទឹកចិត្តដល់ឱ្យ​ ចែករំលែក ធ្វើកិច្ចសន្ទនា និងស្តាប់គ្នាទៅវិញទៅមកក្នុងចំណោមអ្នកចូលរួម។ កម្មវិធីនឹងរាប់បញ្ចូលទាំងសុន្ទរកថាគន្លឹះ និងវគ្គសិក្សាដែលមានឥទ្ធិពល ដោយឈ្វេងយល់ពីប្រធានបទនានា ដូចជា កិច្ចបម្រើយុវជន សន្តិភាព និងការផ្សះផ្សា កិច្ចសន្ទនាអន្តរសាសនា និងការថែរក្សាផ្ទះរួមរបស់យើង។

ពិធីបុណ្យអភិបូជា និងទិដ្ឋភាពវប្បធម៌សំខាន់ៗ

ធម្មយាត្រា នឹងរាប់បញ្ចូលទាំង​ពិធីបុណ្យអភិបូជាឱឡារិកជាសាធារណៈ នៅបាស៊ីលីកានៃព្រះវិហារតូចសន្តីហាណា​ (Minor Basilica of St. Anne) ក្រោម​អធិបតីភាពរបស់កាឌីណាល់​ លូវីស អាន់តូនីញ៉ូ តាគ្លេ។ នេះគឺជាព្រះវិហារប្រវត្តិសាស្ត្រ និងត្រូវបានគោរពបូជាបំផុតមួយនៅក្នុងតំបន់អាស៊ីអាគ្នេយ៍។ បន្ទាប់ពីពិធីបុណ្យអភិបូជា ការជួបជុំនឹងមាន​ប្រគំតន្ត្រីពិសេស ដោយលោកឪពុករ៉ុប ហ្គាលៀ (Fr. Rob Galea) មកពីប្រទេសអូស្ត្រាលី ដែលជាអ្នកចម្រៀង អ្នកនិពន្ធបទចម្រៀង អ្នកនិពន្ធ និងស្ថាបនិកនៃក្រុម​អាយខនមីនីស្ទ្រី (ICON Ministry) ដែលមានកេរ្តិ៍ឈ្មោះល្បីល្បាញលំដាប់អន្តរជាតិ។

ព្រឹត្តិការណ៍នេះក៏នឹងមានកម្មវិធីវប្បធម៌ផ្សេងទៀត រួមទាំងការប្រគំតន្ត្រីពីក្រុម ឌឹ រ៉េចប៊េន (The Rexband) ដោយគូសបញ្ជាក់ពីបេតិកភណ្ឌវប្បធម៌ដ៏សម្បូរបែបរបស់អាស៊ី។

ការផ្សព្វផ្សាយព័ត៌មាន

វិទ្យុវើរីតាសអាស៊ី គឺជាដៃគូប្រព័ន្ធផ្សព្វផ្សាយផ្លូវការនៃព្រឹត្តិការណ៍បូជនីយេសក៍ឆ្ពោះទៅក្តីសង្ឃឹម​ដ៏អស្ចារ្យនេះ។ ទស្សនិកជនអាចតាមដានព័ត៌មានផ្សាយបន្តផ្ទាល់ ចំណុចសំខាន់ៗ និងរឿងរ៉ាវនានានៅលើទំព័រហ្វេសបុក អ៊ីស្តាក្រាម យូរធូប អ៊ិច និង​ទិកតុក ដែលមានឈ្មោះ @VeritasAsia ឬតាមរយៈគេហទំព័ររបស់យើង www.rvasia.org។

ធម្មយាត្រានេះ សន្យាថានឹងក្លាយជាពេលវេលាកំណត់សម្រាប់ព្រះសហគមន៍កាតូលិកនៅអាស៊ី – ដែលជាការធ្វើដំណើរនៃជំនឿ ឯកភាព និងក្តីសង្ឃឹម ដែលបំផុសគំនិតដល់មនុស្សជំនាន់ក្រោយឱ្យរស់នៅក្នុងជំនឿកាតូលិក ខណៈពេលដែលផ្តល់កិត្តិយសដល់ភាពសម្បូរបែបនៃវប្បធម៌របស់ទ្វីបនេះ៕