កាឌីណាល់ ជួបពិភាក្សាជាមួយនឹងនិងប្រធានាធិបតីអ៊ីរ៉ង់​

លោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីសន្តអាសនៈបានជួបសន្ទនាតាមទូរស័ព្ទជាមួយ លោក ម៉ាស៊ូត ប៉េសេស្គៀន ( Masoud Pezeshkian) ប្រធានាធិបតីថ្មីនៃប្រទេសអ៊ីរ៉ង់ជាលើកដំបូងកាលពីព្រឹកថ្ងៃចន្ទទី ១២ ខែ សីហា ឆ្នាំ២០២៤។

លោក  ម៉ាតេអូ ប្រ៊ុនី (Matteo Bruni ) ប្រធានការិយាល័យព័ត៌មានសន្តអាសនៈ បានឲ្យដឹងថា នៅក្នុងកិច្ចសន្ទនា លោកកាឌីណាល់ បានអបអរសាទរលោកប្រធានាធិបតីថ្មីនៅពេលចាប់ផ្តើមអាណត្តិរបស់លោក ហើយមេដឹកនាំទាំងពីរ បានពិភាក្សាអំពីបញ្ហាមួយចំនួន ដោយរួមទាំងបញ្ហានៃការព្រួយបារម្ភអំពី ភាពតានតឹងនៅមជ្ឈិមបូព៌ា។​

លោកកាឌីណាល់បានសម្តែងការព្រួយបារម្ភយ៉ាងខ្លាំងរបស់​សន្តអាសនៈ លើអ្វីដែលកំពុងកើតឡើងនៅមជ្ឈិមបូព៌ា ដោយបានរំលឹកឡើងវិញពីចំណុច​សំខាន់នៃ​ជម្លោះ​​ដែលអាចកើតមាន​ការរីករាលដាល​ដ៏ធ្ងន់ធ្ងរនិង​កំពុងមាន​កម្ដៅ ដោយ​ប្រើ​គ្រប់​មធ្យោបាយ​ក្នុងកិច្ចខិតខំប្រឹងប្រែងសន្ទនា ចរចា ដើម្បីទទួល​បាន​សន្តិភាព។

នៅក្នុងការសន្ទនានេះ លោកកាឌីណាល់ក៏បានសង្កត់ធ្ងន់ទៅលើសាររបស់​សម្តេច​ប៉ាប ដែលបាន​អំពាវនាវ​ជា​ប្រចាំ​ឲ្យមានការ​សន្ទនាសន្តិភាព និង​រាល់​ការ​ខិតខំ​ប្រឹងប្រែង​ដើម្បី​ជួយ​អ្នក​រងទុក្ខ៕