កាឌីណាល់នាយករដ្ឋមន្រ្តីជួបពិភាក្សាជាមួយនឹងប្រធានាធិបតីលីទុយអានី

លោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីនៃសន្តអាសនៈបានជួបពិភាក្សាជាមួយនឹង លោក ជីតាណាស ណូសេដា (Gitanas Nausėda)ប្រធានាធិបតីលីទុយអានី ដែលបានអញ្ជើញចូលរួមនៅក្នុងកម្មវិធីធម្មយាត្រានៅទីក្រុងរ៉ូម កាលពីថ្ងៃទី ០៣ ខែមីនា ឆ្នាំ២០២៥។​

វ៉ាទីកង់ញូវបានរាយការណ៍ថា នៅក្នុងជំនួបនេះ មេដឹកនាំទាំងពីរបានផ្លាស់ប្តូរការពិភាក្សាគ្នាជុំវិញអនាគតសន្តិភាពក្នុងប្រទេសអ៊ុយក្រែន ក៏ដូចជាការរួមចំណែកនៃគ្រីស្តសាសនា នៅក្នុងសង្គមនៃប្រទេសលីទុយអានី។

នៅក្នុងជំនូបនោះ លោកអគ្គអភិបាល ប៉ូល រីឆាត​ ហ្គាឡាហ្គ័ រដ្ឋមន្រ្តីក្រសួងទំនាក់ទំនាក់ទំនងជាមួយរដ្ឋនិងអង្គការអន្តរជាតិ ក៏បានចូលរួមនៅក្នុងជំនួបនោះផងដែរ។​

យោងតាមសេចក្តីថ្លែងការណ៍របស់ការិយាល័យព័ត៌មានសន្តអាសនៈបានឲ្យដឹងថា កិច្ចពិភាក្សានេះបានរៀបចំឡើងនៅក្នុងបរិយាកាសដ៏ស្និទ្ធស្នាល។​

ប្រភពដដែលបានបន្តថា ភាគីទាំងពីរបានបង្ហញពី ការពេញចិត្ត ចំពោះទំនាក់ទំនងទ្វេភាគីដ៏ល្អ និងប្រកបដោយផ្លែផ្កា ដោយបង្ហាញពីការរួមចំណែកជាវិជ្ជមាននៃជំនឿគ្រីស្តសាសនាចំពោះសង្គមលីទុយអានី។

ក្រៅពីទំនាក់ទំនងទ្វេរភាគី មេដឹកនាំទាំងពីរក៏បានផ្លាស់ប្តូរការពិភាក្សាគ្នាអំពីបញ្ហានៅក្នុងតំបន់ និង​អន្តរជាតិជាពិសេសអំពី អនាគតសម្រាប់សន្តិភាពនៅអ៊ុយក្រែន ។