យោងតាមការសន្និដ្ឋានរបស់មូលនិធិនៃអង្គការសហប្រជាជាតិសម្រាប់កុមារ (UNICEF) បាន ឲ្យដឹងថា អនាគតលំបាកកំពុងរងចាំកុមារនៅឆ្នាំ២០៥០ នៅក្នុងពិភពលោកមួយដែលមានការផ្លាស់ប្តូរដោយសារវិបត្តិអាកាសធាតុខ្លាំងក្លា ចលនាប្រជាសាស្រ្ត និងអសមភាពខាងបច្ចេកវិជ្ជា។
សេចក្តីសន្និដ្ឋាននៅក្នុងរបាយការណ៍មួយពិនិត្យឃើញនូវនិន្នាការធំៗ ៣ និងថាមពលដ៏ខ្លាំងក្លា ៣ដែលនឹងជះឥទ្ធិពលលើជីវិតកុមារពីពេលនេះរហូតដល់ឆ្នាំ២០៥០ ឬលើសពីនេះ។ នៅក្នុងចំណោមនិន្នាការធំៗ ទាំងនេះ ដែលជះឥទ្ធិពលលជីវិតកុមារពីពេលនេះរហូតដល់ឆ្នាំ២០៥០ ឬលើសនេះ បានបង្ហាញថា ទាំងនោះគឺជាវិបត្តិអាកាសធាតុដ៏ខ្លាំងក្លា ចលនាប្រជាសាស្រ្ត និងអសមភាពនៃបច្ចេកវិជ្ជា។
នៅក្នុងសេចក្តីប្រកាសមួយ លោកស្រីកាតឺរីន រូសែល អគ្គនាយិកានៃអង្គការ UNICEF បានថ្លែងថា ៖ “សេចក្តីសន្និដ្ឋានដែលបង្ហាញនៅក្នុងរបាយការណ៍នេះ បង្ហាញថា ពិភពលោកដែលយើងនឹងផ្តល់ទៅឲ្យក្មេងៗ នឹងមានសភាពល្អ ឬអាក្រក់តាមរយៈការសម្រេចចិត្តដែលមេដឹកនាំពិភពលោកប្រកាន់យកធ្វើ ឬមិនប្រកាន់យកធ្វើ នាពេលសព្វថ្ងៃ។ សេចក្តីស្រមៃនឹងមិនគ្រប់គ្រាន់ផ្តល់ឲ្យពួកគេនូវអនាគតមួយល្អប្រសើរទេ។ យើងត្រូវតែបញ្ចេញសមកម្មភាព។ ជាច្រើនទសវត្សនៃការរីកចម្រើន ជាពិសេសសម្រាប់កុមារីនឹងរងការគំរាមកំហែង។
វិបត្តិអាកាសធាតុវាយប្រហារយើងដោយផ្ទាល់ និងខ្លាំងក្លារួចហើយ។ ឆ្នាំ២០២៣ គឺជាឆ្នាំដែលក្តៅបំផុតមិនដែលធ្លាប់មាន។ យោងតាមរបាយការណ៍នេះ បានឲ្យដឹងដែរថា ភាពមិនទៀងទាត់នៃអាកាសធាតុ និងបរិស្ថាន នឹងត្រូវរីកវិសាលភាពធំឡើងនៅគ្រប់ទីកន្លែងនៅលើពិភពលោកនៅអំឡុងឆ្នាំ២០៥០ និង២០៥៩។
ដូច្នេះ ចំនួនកុមារ ៨ដង ច្រើនជាងមុន នឹងត្រូវទទូលរងនូវរលកកម្តៅខ្លាំងក្លាបើប្រៀបធៀបនឹងឆ្នាំ២០០០។ ចំនួនកុមារ ៣ដង ច្រើនជាងមុននឹងទទួលរងជំនន់ទឹកភ្លៀងខ្លាំងក្លា និងជិត ២ដង ច្រើនជាងមុននឹងទទួលរងអគ្គីភ័យខ្លាំងដែលមិនអាចគ្រប់គ្រងបាន។
ការពិចារណាអំពីការប្រែប្រួលអាកាសធាតុទាំងនេះលើកុមារនឹងអាស្រ័យលើកត្តាជាច្រើន ៖ អាយុនៃកុមារដែលរងផលប៉ះពាល់ សុខភាពពួកគេ ស្ថានភាពសង្គមសេដ្ឋកិច្ច និងការអាចទទួលបានធនធានរបស់ពួកគេ។ កុមារដែលអាចទទួលបានជម្រកដែលស៊ូនឹងការប្រែប្រួលអាកាសធាតុ ហេដ្ឋារចនាសម្ព័ន្ធនៃការឲ្យត្រជាក់ ការព្យាបាលសុខភាព ការអប់រំ និងទឹកស្អាត នឹងទទួលបានលក្ខខណ្ឌអនុគ្រោះសម្រាប់ការរស់រានមានជីវិតពីការប៉ះទង្គិចពីអាកាសធាតុអាក្រក់ ជាងកុមារដទៃៗ ទៀត។
យោងតាមសេចក្តីសន្និដ្ឋាន បានឲ្យដឹងថា តំបន់អាហ្វ្រិកអនុសាហារ៉ា និងអាស៊ីខាងត្បូង នឹងមានក្មេងច្រើនបំផុតនៅក្នុងទសវត្សឆ្នាំ២០៥០។ ប៉ុន្តែប្រជាជនតំបន់ទាំងនេះនឹងត្រូវចាស់ដូចជានៅគ្រប់តំបន់នៅលើពិភពលោកដែរ។
នៅទ្វីបអាហ្វ្រិក អត្រាកុមារនៅក្នុងចំណោមប្រជាជនទូទៅនឹងនៅតែខ្ពស់ ប៉ុន្តែគឺវានៅត្រឹម ៤០% ប្រៀបធៀបនឹង ៥០% នៅឆ្នាំ២០០០។ នៅអាស៊ីខាងកើត និងអឺរ៉ុបខាងលិច អត្រាកុមារនឹងត្រូវស្ថិតនៅក្រោម ១៧% នៅខណៈពេលដែលកុមារមានចំនួន ២៩% និង ២០% នៃចំនួនប្រជាជនសរុប នៅក្នុងទសវត្សឆ្នាំ២០០០។
ការវិវត្តខាងប្រជាសាស្រ្តនេះ បង្កនូវការប្រឈមជាច្រើនសម្រាប់ប្រទេសនានា ដែលនឹងត្រូវរងសំពាធដើម្បីពង្រីកការផ្តល់សេវាដែលសំដៅឆ្លើយតបនឹងតម្រូវការនៃចំនួនប្រជាជនជាកុមារដែលកាន់តែមានសារសំខាន់ឡើងៗ ទល់នឹងប្រជាជនដែលមានវ័យចំណាស់។
ទទ្ទឹមគ្នាដែរ របាយការណ៍ទទួលស្គាល់ថា បច្ចេកវិជ្ជាបង្កើតថ្មី មានជាអាទិ៍ បញ្ញាញ្ញាណសប្បនិមិត្ត បានសន្យានាំមកនូវការរីកចម្រើនផង និងភាពគ្រោះថ្នាក់ផងសម្រាប់កុមារ ក្នុងពេលជាមួយគ្នា។
Daily Program
