តុល្យការនៃទឹកជំនន់ដែលបានវាយប្រហារអាស៊ីអាគ្នេយ៍ មានទម្ងន់ធ្ងន់ដ៏សម្បើមគិតមកត្រឹមចុងខែវិច្ឆិកា ដែលមានមនុស្សយ៉ាងហោចណាស់ ១៤៥នាក់បានស្លាប់នៅប្រទេសថៃ និង ១១១នាក់ ស្លាប់នៅឥណ្ឌូនេស៊ី។
នៅប្រទេសឥណ្ឌូនេស៊ីក៏ដូចជាម៉ាឡេស៊ី និងប្រទេសថៃ មានរូបភាពសឹងតែដូចគ្នានៃទីក្រុងទាំងឡាយដែលរងការជន់លិច ប្រជាជនជាប់នៅក្នុងទឹក និងការបាក់ដីដែលបង្កឡើងដោយទឹកជំនន់បុក ហើយបានកើតឡើងជាច្រើនថ្ងៃមកហើយ។
នៅប្រទេសថ្ងៃ លោកស៊ីរីពុង អង់កាសាគុលគីយ៉ាត អ្នកនាំពាក្យរដ្ឋាភិបាលថៃ បានថ្លែងថា ចំនួនសរុបនៃអ្នកស្លាប់នៅក្នុងខេត្តនានានៅភាគខាងត្បូង បានឡើងដល់ ១៤៥នាក់។ លោកបញ្ជាក់ថា មនុស្សច្រើនជាង ១០០នាក់ បានបាត់បង់ជីវិតនៅក្នុងខេត្តសុងក្លាតែមួយ។
អ្នកតំណាងមន្ទីរពេទ្យក្នុងតំបន់ បានថ្លែងថា ភាគខាងត្បូងថៃគឺជាតំបន់ដែលរងផលប៉ះពាល់ខ្លាំងបំផុត។ ទឹកជំនន់បានបង្ខំឲ្យប្រជាជននៅខេត្តហាតយ៉ៃ តោងឡើងដំបូលដោយរង់ចាំការជួយសង្រ្គោះ។ មនុស្សច្រើនជាង ១០០នាក់ បានស្លាប់នៅក្នុងខេត្តសុងក្លាតែមួយ ដែលកន្លែងដាក់សាកសពចម្បងបានទទួលសាកសពជនរងគ្រោះពីទឹកជំនន់នៅក្នុងភាពខាងត្បូង បានជន់ជោរពេញ។
អ្នកទទួលខុសត្រូវនៃទីកន្លែងទទួលសាកសព លោកចាន បាននិយាយថា ៖ “កន្លែងទទួលសាកសពបានផ្ទុកហួសសមត្ថភាពហើយ យើងត្រូវការកន្លែងបន្ថែមទៀត”។
ចំណែកនៅប្រទេសឥណ្ឌូនេស៊ី នៅលើកោះស៊ូម៉ាត្រា ភាគខាងលិច យោងតាមតុល្យការថ្មី បានឲ្យដឹងថា ទឹកជំនន់ និងការបាក់ដី បានធ្វើឲ្យមនុស្សយ៉ាងហោចណាស់ ១១១នាក់ បានស្លាប់ និងមនុស្សច្រើនជាង ១០០នាក់បានបាត់ខ្លួន។ លោកហ្វ៊ែរី វ៉ាលីនទូកាន អ្នកនាំពាក្យប៉ូលីសនៅកោះស៊ូម៉ាត្រា ភាគខាងជើង បានប្រាប់ថា ៖ “អាទិភាពរបស់យើងស្ថិតនៅលើការជម្លៀសប្រជាជន និងជួយពួកគេ។ យើងសង្ឃឹមថា អាកាសធាតុនឹងល្អប្រសើរឡើងវិញដើម្បីអាចហោះឧទ្ធម្ភាគចក្រទៅកាន់ទីតាំងជនរងគ្រោះនៅខណៈច្រកចូលតាមផ្លូវជាច្រើនត្រូវបានកាត់ផ្តាច់។
ប្រទេសឥណ្ឌូនេស៊ី និងប្រទេសដទៃៗទៀតនៃតំបន់អាស៊ីអាគ្នេយ៍ត្រូវរងគ្រោះដោយទឹកជំនន់ និងការបាក់ដីនៅក្នុងអំឡុងរដូវភ្លៀង។ ហើយភ្លៀងមូសុងដែលត្រូវធ្វើឲ្យធ្ងន់ធ្ងរបន្ថែមដោយព្យុះត្រូពិចបានវាយប្រហារលើតំបន់នេះ។ ការប្រែប្រួលអាកាសធាតុបានបង្កើនវិសាលភាពនៃព្យុះ និងនាំមកជាមួយនូវភ្លៀងដែលច្រើនហួសប្រមាណ ទឹកជំនន់រហ័សកើតឡើងភ្លាមៗ និងខ្យល់កន្រ្តាក់ដែលកាន់តែខ្លាំងក្លាផងដែរ។
អាកាសធាតុដែលកាន់តែក្តៅក៏បណ្តាលឲ្យមានសំណើមខ្លាំងដែរ និងបង្កឲ្យមានការធ្លាក់ភ្លៀងជាប់បន្តកន្ទុយគ្នា និងខ្លាំងក្លា នៅខណៈដែលសមុទ្រដែលកាន់តែក្តៅអាចពង្រីកអំណាចនៃប្រព័ន្ធព្យុះទៀត។
លោកស្រីអ៊ូលី អាកតា ស៊ីយ៉ាគៀន គឺជាមន្រ្តីអង្គការក្រៅរដ្ឋាភិបាលឥណ្ឌូនេស៊ីនៃការការពារបរិស្ថាន WALHI និងការអភិវឌ្ឍន៍ហួសហេតុ និងមានឯកទេសខាងទឹកជំនន់ និងការបាក់ដី។ លោកស្រីអ៊ូលី អាកតា ស៊ីយ៉ាគៀន បានព្យាករថា ៖ “ប្រសិនបើគម្របព្រៃឈើនៅតែបន្តថយចុះ និងត្រូវបានជំនួសដោយចំការដូងប្រេង ដំណាំឯកវប្បកម្ម ការរុករករ៉ែ និងសកម្មភាពរំខានដទៃៗទៀត ប្រព័ន្ធបរិស្ថានរបស់យើង នឹងបាប់បង់សមត្ថភាពដើម្បីធ្វើការសម្របសម្រួលលើប្រព័ន្ធវដ្តិនៃទឹកហើយ។”
ចំណែកនៅប្រទេសម៉ាឡេស៊ី ទឹកជំនន់បានពន្លិចតំបន់ដ៏ធំធេងនៅភាគខាងជើងរដ្ឋពេលីស និងបានធ្វើឲ្យមនុស្សពីរនាក់ស្លាប់ផងដែរ។
Daily Program
