ថ្ងៃទី២៩ ខែមីនា ឆ្នាំ២០២៥អត្ថបទគម្ពីរ (លូកា១៨,៩-១៤)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

បងប្អជាទីស្រឡាញ់! ខ្ញុំមានក្តីសោមន្សរីករាយដើម្បីជួបជាមួយបងប្អូននៅថ្ងៃសៅរ៍ទី២៩ ខែមីនានេះ និង​យើង​នៅក្នុងរដូវ៤០ថ្ងៃបន្តដើម្បីគិតអំពីរឿដែលយើងត្រូវអធិដ្ឋាន ពេលដែលយើងអធិដ្ឋាន​នាំឱ្យ​យើង​​ធ្វើទាន និងធ្វើឱ្យយើងតមអាហារបាន។ ព្រះបន្ទូលដំណឹងល្អនៅថ្ងៃនេះព្រះយេស៊ូ​បានលើក​អំពី​បុរសពីរ​នាក់​ដែលចូលទៅក្នុងព្រះវិហារដើម្បីអធិដ្ឋាន។

បុរសទីមួយគឺខាងគណៈផារ៉ាស៊ីបានទៅឈរអធិដ្ឋាននៅក្នុងព្រះវិហារដោយស្រែកក្តែងៗថា ឱព្រះជា​ម្ចាស់​អើយ ​ខ្ញុំសុំអរគុណព្រះអង្គដែលព្រះអង្គបានប្រទាន​ឱ្យខ្ញុំជាមនុស្សល្អ​ឱ្យខ្ញុំចែកដង្វាយ​១០ភាគរយ​ទៅ​ព្រះអង្គ ហើយបានរិះគន់​ និងមើលងាយដល់បុរសម្នាក់ទៀតដែលជាអ្នកបាប។ រីឯបុរសអ្នកបាបនោះ​គាត់​អោន​មុខមិនហ៊ានងើយមើលព្រះភ័ក្រ្តព្រះជាម្ចាស់ដោយគក់ទ្រូងទទួលស្គាល់ថាខ្លួនជាមនុស្សបាប។

នៅក្នុងនិទានរបស់បុរសពីរអ្នកដែលចូលព្រះវិហារអធិដ្ឋាននេះជួយរំលឹកយើង និងណែនាំយើង ដោយ​ព្រះយេស៊ូ​មានព្រះបន្ទូលថា​អ្នកណាលើកតម្កើងខ្លួន អ្នកនោះនឹងត្រូវគេបន្ទាបចុះ!​រីឯអ្នកដែលបានបន្ទាប​ខ្លួននិងត្រូវគេលើកឡើង។ បាទបងប្អូនជាទីស្រឡាញ់! សូមឱ្យយើងយកពេលដើម្បីស្តាប់ព្រះបន្ទូល និ​ង​ស្តាប់​ពាក្យ​ឧបមាដែល​ព្រះយេស៊ូប្រទានដើម្បីឱ្យយើងរិះគិតអំពីជីវិតរបស់យើងសួរថា ខ្ញុំយើងជានរណា ដែល​! បានព្រះជាម្ចាស់ស្រឡាញ់មានមេត្តា និងការលើកលែងទោស?  តាមរយៈ​សម្លេងព្យាការី​ម៉ូសេ​បាន​និយាយថា សូមឱ្យមានចិត្តមេត្តាករុណាដូចព្រះបិតា ព្រោះសេចក្តីស្រឡាញ់របស់ព្រះជា​ម្ចាស់ស្ថិត​ថ្ថេរ​គង់​វង្សជានិច្ច។

សម្រាប់អ្នកដែលបន្ទាបខ្លួន សម្រាប់អ្នកដែលស្រឡាញ់ព្រះជាម្ចាស់នោះព្រះអង្គនិងមើលថែរក្សា រីឯអ្នកដែ​ល​មាន​ចរិតឆ្មើងឆ្មៃ វិនិច្ឆ័យគេ ដាក់ទោសគេ មើលងាយគេ នោះនឹងត្រូវផ្តន្ទាទោសពីព្រះជាម្ចាស់។​ នៅ​ក្នុង​រដូវ៤០ថ្ងៃនេះ ចូលយើងជាប់ចិត្តនឹងព្រះបន្ទូលរបស់ព្រះជាម្ចាស់ដែលជួយបំភ្លឺជិវិតរបស់យើងម្នាក់ៗ ហើយ​ណែនាំឱ្យយើងមើលឃើញព្រះជាម្ចាស់នៅក្នុងធម៌មេត្តាករុណាសម្រាប់មនុស្សគ្រប់ៗរូប ដោយ​​ដឹងថាយើងជាបងប្អូនគ្នានឹងគ្នា ដោយ​មានព្រះយេស៊ូមករកយើងនៅក្នុងរដូវ៤០ថ្ងៃនេះ​ដើម្បីរំលឹកដាស់​តឿន​យើង ណែនាំយើងឱ្យយើងចេះសម្រុះសម្រួលគ្នា ចេះរស់នៅរួមគ្នាជាបងប្អូនដោយ​មាន​សេច​ក្តី​ស្រឡាញ់។

នៅពេលណាដែលយើងចេះធ្វើទាន ចេះតមសេចក្តីអាក្រក់មិន​ត្រឹមតែតមអាហារទេ តែតមសេចក្តីអាក្រក់​ទាំង​ឡាយ​ដែល​ចេញពីចិត្តរបស់យើង នោះជាការដែលយើងដឹងគុណព្រះជាម្ចាស់​យើង​ធ្វើ​ល្អ​សម្រាប់​ព្រះ​អង្គ​។ សុំជូនពរ និងសុំសេចក្តីសុខរបស់ព្រះជាម្ចាស់ និងសុំឱ្យរដូវនៃ​៤០ថ្ងៃនៃបុណ្យ​ចម្លងនេះ​ឱ្យយើង​​អធិដ្ឋានដល់បងប្អូនដែលទើបទទួលការត្រាស់ហៅឱ្យស្វែងរកព្រះអង្គ និងឱ្យផ្ញើជីវិតលើព្រះអង្គ​គ្រប់ពេល​វេលា​។ អាម៉ែន៕