ថ្ងៃទី២០ ខែមករា ឆ្នាំ២០២៥ អត្ថាធិប្បាយគម្ពីរ ម៉ាកុស ២,១៨-២២បកស្រាយដោយ៖ លោកបូជាចារ្យ វី សំណាង

អត្ថបទព្រះគម្ពីរដែលយើងបានស្តាប់ គឺបាននិយាយអំពីសាវ័ករបស់លោកយ៉ូហានបាទីស្ត និងសាវ័ក​ខាង​គណៈ​ផារ៉ា​ស៊ីដែលបាន​តមអាហារ តែសាវ័កព្រះយេស៊ូមិនបាន​តមអាហារដូច្នេះនាំ​ឱ្យ​គេ​ឆ្ងល់ ហើយគេ​មកសួរព្រះយេស៊ូ។ នេះក៏ជាមេរៀនមួយសម្រាប់យើងជាគ្រីស្តបរិស័ទ នៅក្នុង​ដំណើរ​ជីវិត​របស់យើង​ប្រចាំថ្ងៃយើងមានការការល្បូងជាច្រើន ការល្បូងដែល​គ្រោះ​ថ្នាក់​បំផុត​គឺការល្បូង​ដែល​ណែ​នាំ​​ឱ្យយើង​ធ្វើ​”អំពីល្អ”។

ការធ្វើអំពើល្អជាសេចក្តីមួយដែលល្អ ប៉ុន្តែ! ​ឱ្យយើងប្រយ័ត្ន​ថា តើអំពើល្អដែលធ្វើនោះបានជួយ​យើងឱ្យ​ជិត​សិទ្និ​និងព្រះជាម្ចាស់ទេ! ឬបានត្រឹមតែនាំយើងឲ្យមានមោទនភាពចំពោះខ្លួនឯង ឱ្យយើងចេះតែលើក​តម្កើង​ខ្លួន​ឯង! ចេះតែប្រៀបធៀបខ្លួនជាមួយនឹងបងប្អូនដទៃ! ចាប់ផ្តើមវិនិច្ឆ័យអ្នក​នេះ​មិន​អធិដ្ឋាន អ្នក​នោះ​មិ​ន​ចូ​លព្រះវិហារ អ្នកនោះមិនតមអាហារ ឬអ្នកនេះអីចេះ អ្នកនោះអីចុះ មិនចេះទុកដាក់-ល-។

បងប្អូន! អំពើល្អដែលយើងបានធ្វើជាទង្វើមួយដែល​យើងគ្រាន់តែបានធ្វើតែប៉ុណ្ណោះ ហេតុនេះសូមកុំ​ឱ្យអំពើ​ល្អ​ដែល​​យើង​បានធ្វើ ក្លាយ​ជា​មាគ៌ានាំយើងឲ្យប្រព្រឹត្តអំពើបាប។ យើងឃើញសាវ័ក​របស់លោក​យ៉ូហាន​បាទីស្ត និង​សាវ័ករបស់គណៈផារ៉ាស៊ីធ្វើល្អហើយ គេបានតមអាហារ ប៉ុន្តែពេលដែលគេបាន​ធ្វើល្អ គេ​ចាប់​ផ្តើម​មើលអ្នកនេះ មើលអ្នកនោះ តើអ្នកនេះបានធ្វើនៅមុខព្រះជាម្ចាស់ឬអត់?

មិនខុស​អី​និង​ជីវិតប្រចាំ​ថ្ងៃ​របស់យើងទេ! សូម​ឱ្យយើងអធិដ្ឋានសុំឱ្យព្រះជាម្ចាស់ជួយយើង! ​ដើម្បីឱ្យ​គ្រប់​កិច្ច​ការ​ល្អ​ដែល​យើងបានធ្វើបានដល់​ព្រះជាម្ចាស់! កុំឱ្យយើងធ្លាក់នៅក្នុង​ការល្បូងរបស់មាដែលនាំ​ឱ្យ​យើង​វិនិច្ឆ័យបងប្អូនរបស់យើង។

ដូចធម៌ឱព្រះបិតាដែលយើងសូត្រប្រចាំថ្ងៃគឺសុំកុំឱ្យយើងខ្ញុំចាញ់ការល្បូងឡើយតែ សុំឱ្យ​ព្រះជាម្ចាស់​ជួយ​យើងពីមួយថ្ងៃទៅមួយថ្ងៃ សុំឱ្យយើងចេះបន្ទាបខ្លួននៅក្នុងការធ្វើអំពើល្អរបស់យើងដែរ។ អាម៉ែន៕