ថ្ងៃទី១៥ ខែមេសា ឆ្នាំ២០២៥អត្ថបទគម្ពីរ (យ៉ូហាន១៣,២១-៣៣.៣៦-៣៨)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

សប្តាហ៍នេះគឺជាសប្តាហ៍ដែលលោកពុកចង់ឱ្យបងប្អូនរិះគិត និងដើរជាប់​ជាមួយព្រះយេ​ស៊ូ​ដែល​​កំពុងតែទទួលសិរីរុងរឿង។ ការទទួលសិរីរុងរឿងមានន័យថាព្រះអង្គត្រូវឆ្លងទុក្ខលំបាក ដើម្បីទៅដល់ភាពជ័យជំះនៃសេចក្តីស្លាប់គឺការរស់ឡើងវិញដ៏រុងរឿង។

សប្តាហ៍នេះជាសប្តាហ៍ពិសិដ្ឋ ថ្ងៃនេះជាថ្ងៃអង្គារយើងស្តាប់ព្រះបន្ទូលអំពីពិធីជប់លៀង​ចុង​ក្រោយ ជាព្រឹត្តិការណ៍មួយដែល​កើតឡើងក្នុងនោះ​គឺយូដាសអ៊ីស្កាយ៉ូតជាសមាជិត​នៅក្នុង​ក្រុម​គ្រីស្តទូតរបស់ព្រះយេស៊ូម្នាក់ដែលសុខចិត្តលក់ព្រះយេស៊ូ។ សិស្ស​ទាំងអស់​អត់​ដឹង​ទេ​ថា​មាន​ម្នាក់ក្នុងចំណោមពួកគាត់បានប្រព្រឹត្តអំពើក្បត់។​

ពេលនោះព្រះយេស៊ូមានប្រាប់ថាសាវ័កទាំងអស់ថា ម្នាក់ដែលខ្ញុំបានជ្រលក់នំបុ័ង​នៅក្នុងស្រា​ទំ​ពាំងបាយជួរ ហើយហុចឱ្យគាត់គឺអ្នកនឹងហើយ! អ្នកទាំងអស់នោះក៏អត់ទាន់ដឹងថា គឺ​លោក​យូ​ដាសដែលជាអ្នកក្បត់ព្រះអង្គទេ។

បាទបងប្អូន! ទោះបីព្រះយេស៊ូត្រាស់ហៅមនុស្សមួយក្រុម ជាពិសេស​សម្រាប់ក្រុមគ្រីស្តទូត​តែនៅតែមានម្នាក់ដែលធ្វើឱ្យព្រះអង្គខកចិត្ត ត្បិតគេក្បត់ និងលក់ព្រះអង្គ។ ភាពឈឺចាប់នេះ ជាភាពមួយដែលបងប្អូនអាចមានបទពិសោធន៍ដែរ អ្នកដែលយើងស្រឡាញ់ក្បត់យើង អ្នក​ដែល​យើងទុកចិត្តរំលោភសេចក្តីទុកចិត្តរបស់យើង អ្នកដែលយើងចង់​ផ្ញើជីវិត​ទៅ​លើ​គេ​បែរ​ធ្វើឱ្យយើងខកចិត្តនៅក្នុងជីវិតរបស់យើង មិនខុសពីព្រះយេស៊ូដែល​កំពុងជួប​នៃ​ការ​ក្បត់​របស់​សាវ័ក​ជាទីស្រឡាញ់របស់ព្រះអង្គទេ។

ដូច្នេះសូមបងប្អូនជួបជាមួយព្រះអង្គដើម្បីឱ្យយើងមានកម្លាំងនឹងទុកចិត្តទៅលើគ្រឹះមួយដ័រឹងមាំគឺបទពិសោធន៍របស់យើងជាមួយព្រះយេស៊ូ។ ព្រះយេស៊ូយាង​មកនៅក្នុងលោកនេះ​ដើម្បី​យក​បទពិសោធន៍បែបមនុស្ស​ឱ្យយើងមានក្តីសង្ឃឹមនៅក្នុងការរស់នៅ។ ព្រះអង្គ​បង្ហាញ​ថា​ព្រះ​អង្គមកពីព្រះបិតា ឯកន្លែងដែលព្រះអង្គត្រឡប់ទៅវិញនឹងមិនមាននរណាម្នាក់ដឹងឡើយ។ សាវ័កទាំងអស់មិនដឹងថាព្រះអង្គនឹងទៅណាទេ ទោះបីខ្លះ​នៅតែគិត​ថាព្រះអង្គ​នឹងឡើង​សោយ​​រាជ្យតែផ្លូវរបស់ព្រះអង្គមិនមែនការសោយរាជ្យទេ តែជាការបូជា​ជីវិតដើម្បី​សង្គ្រោះ​មនុស្ស​លោក ហើយប្រគល់ជីវិត ទៅព្រះបិតាវិញ។

បាទបងប្អូន! ​សុំបងប្អូន​ជួយអធិដ្ឋាន​សម្រាប់អស់អ្នក​ដែលកំពុងធ្វើ​ដំណើររួម​ជាមួយ​ព្រះអង្គ​មិន​ថាត្រៀមជ្រមុជទឹក ឬគ្រីស្តបរិស័ទដែលមានជំនឿយូរហើយ និងអស់អ្នកដែលមាន ការល្បួងសម្ពាធពីសង្គមពីគំនិតលោកិយ៍ធ្វើឱ្យយើងមិនអាចទៅមុខជាមួយព្រះអង្គបានតែសម្រាប់អ្នកជឿ និងសម្រាប់គ្រីស្តបរិស័ទ​យើងឱ្យយើងរួមទុ​ក្ខជាមួយ​ព្រះ​អង្គរួមធ្វើដំណើរជា​មួយ​ព្រះអង្គ ទោះបីយើងបោះចោល​ព្រះអង្គពេលក្រោយ​ដូចសាវ័កក៏​ដោយឱ្យ​យើង​ត្រឡប់​មកវិញ​បំពេញ​បេសកម្មរបស់ព្រះអង្គ ហើយសុំឱ្យពិធីជប់លៀងដែល​ព្រះអង្គបានធ្វើនៅ​ថ្ងៃនេះជា​ឥទ្ធិ​ពល​នៃការចិញ្ចឹមជីវិតខាងផ្លូវវិញ្ញាណរបស់យើង កុំឱ្យព្រះយេស៊ូហុចនំបុ័ងឱ្យយើង។

កុំឱ្យយើងក្លាយទៅជាយូដាសអ៊ីស្កាយ៉ូតដែលក្បត់ព្រះអង្គ ហើយមិនកែប្រែចិត្តគំនិត តែសុំឱ្យ​យើ​ង​ដូចលោកសិលា ទោះបីបោះចោលព្រះអង្គ ហើយត្រឡប់ មកបំពេញជួយបម្រើ​ព្រះ​អង្គវិញ សុំឱ្យព្រះបន្ទូលថ្ងៃនេះជាកម្លាំងរបស់បងប្អូន សុំឱ្យព្រះជាម្ចាស់ប្រទានពរ​ឱ្យបង​ប្អូន​អាច​ប្រឈមនិង​ឧបសគ្គគ្រប់បញ្ហាបានដូចនៅឃ្លាចុងក្រោយរបស់ព្រះយេស៊ូនេះផងដែរ។ សូមព្រះជាម្ចាស់ប្រទានពរឱ្យអស់បងប្អូន៕ អាមែន