ថ្ងៃទី១១ ខែកញ្ញា ឆ្នាំ២០២៤ ប​អត្ថបទគម្ពីរ លូកា (៦,២០-២៦)អត្ថាធិប្បាយគម្ពីរដោយ៖ លោកបូជាចារ្យ រ៉ាជេត ហាសាពូទី

បងប្អូនជាទីគោរព! អត្ថបទថ្ងៃនេះតាមលូកា (៦,២០-២៦) ព្រះយេស៊ូមានព្រះបន្ទូលអំពីសុភមង្គល និង​អមង្គល។ ព្រះយេស៊ូមានព្រះបន្ទូលថា អ្នករាល់គ្នាដែលជាជនកំសត់អើយ អ្នករាល់គ្នាមានសុភង្គលហើយ ត្បិតអ្នករាល់គ្នាបានទទួលព្រះរាជ្យរបស់ព្រះជាអម្ចាស់។ អ្នករាល់គ្នាដែលកំពុងតែស្រេកឃ្លានអើយ អ្នក​រាល់គ្នាមានសុភមង្គលហើយ ត្បិតអ្នករាល់គ្នានឹងបានឆ្អែត។ ព្រះយេស៊ូមានព្រះបន្ទូលថា អ្នករាល់គ្នាដែល​កំពុងតែយំសោកអើយ អ្នករាល់គ្នានឹងបានត្រេកអរ អ្នករាល់គ្នាមានសុភមង្គលហើយ។ ចំណែក​អ្នក​រាល់​គ្នាដែលជាអ្នកមានអើយ អ្នករាល់គ្នានឹងត្រូវវេទនា ត្បិតអ្នករាល់គ្នាត្រូវបានទទួល​សម្រាលទុក​រួច​សម្រេច​ហើយ អ្នករាល់គ្នាដែលឆ្អែតនៅពេលនេះអើយ អ្នករាល់គ្នានឹងស្រេកឃ្លានជាមិនខាន។

អ្នក​កំពុង​តែ​ត្រេក​អរ​អើយ អ្នករាល់គ្នានិងត្រូវកាន់ទុក្ខ ហើយនឹងត្រូវយំសោកជាពុំខាន មានសាវ័ក​របស់​ព្រះយេស៊ូ និងបណ្តារជនយ៉ាងច្រើនកុះករនៅពេលដែលព្រះយេស៊ូមានព្រះបន្ទូលនេះ ពួក​គេ​ងឿង​ឆ្ងល់​យ៉ាង​ខ្លាំង ចុះយើងកំពុងស្តាប់នេះឆ្ងល់ទេ! ហេតុអ្វីបានជាព្រះយេស៊ូមាន​ព្រះបន្ទូល​បែបនេះ? ជា​ធម្មតា អ្ន​ក​ដែលក្រខ្សត់ អ្នកដែលកំពុងស្រេកឃ្លាន អ្នកយំសោក អ្នកកំពុង​ជួប​ប្រទះទុក្ខលំបាក គឺ​ជាមនុស្ស​សុភាព​រាបសារ និងជាមនុស្សស្មោះត្រង់។ ពួកគេចេះបន្ទាបខ្លួន ពួកគេទុកចិត្ត​លើធម៌មេត្តា​ករុណា​របស់​ព្រះយេស៊ូ ពួកគេជាមនុស្សក្រខ្សត់ ឬមនុស្សដែលកំពុងតែស្រេកឃ្លាន ឬ​យំ​សោកមែន តែអស់អ្នក​ទាំង​នោះ​ខ្លាំងពូកែខាងផ្លូវវិញ្ញាណ និងជំនឿរឹងមាំលើព្រះយេស៊ូ។

ពួកគេមាន​ចិត្ត​ទូលំ​ទូ​លាយ ស្តាប់ និងអនុវត្តតាមព្រះបន្ទូលរបស់ព្រះអង្គ ពួកគេក្លាយទៅជាមនុស្សល្អមិន​ជិះ​ជាន់អ្នកដទៃ ពួក​គេទទួលយកការតិះដៀល ការបង្ខូចឈ្មោះទាំងអស់ដោយសារព្រះនាម​ព្រះយេស៊ូ។ ដោយ​ធ្វើដូច្នេះ​ពួកគេក្លាយជាមនុស្សក្រសត់ ឬអ្នកស្រេកឃ្លាន ឬអ្នកដែលយំសោកនៅមុខមនុស្សលោក ប៉ុន្តែពួកគេ​ក្លាយ​ជា​មនុស្សដែលមាននៅព្រះភ័ក្រ្តរបស់ព្រះអង្គ។ ជីវិតរបស់ពួកគេរស់​នៅតាម​ព្រះបន្ទូល​របស់​ព្រះអង្គ និងការបង្ហាញធម៌មេត្តាករុណាចំពោះអ្នកដទៃ។

ពួកគេសន្សំកំណប់នៅស្ថានបរមសុខសម្រាប់ពួកគេ ចំនែកអ្នក​មា​ន អ្នកឆ្អែត ឬត្រេកអរនៅពេលនេះ​គិ​ត​ថា ពួកគេជាអ្នកដែលមាន​សុភមង្គល​ហើយ​ដោយ​សារ​ទ្រព្យសម្បត្តិ និងអំណរសប្បាយដែលពួក​គេ​មាន​នៅ​ពេលនេះ ប៉ុន្តែព្រះយេស៊ូមានព្រះបន្ទូល​ទៅ​ពួកគេថា​ អ្នករាល់គ្នាត្រូវវេទនាហើយ ដោយសារ​ពួក​គេ​ជាប់​ចិត្តជាមួយទ្រព្យសម្បត្តិ និងជីវិតគេយ៉ាង​តឹ​ង​រឹង។ ពួកគេគិតតែទ្រព្យសម្បត្តិ និងការសប្បាយ​រីករាយក្នុ​ងលោកនេះ ពួកគេមិនចង់ញ​អបង់​អ្វី​សោះ​ឡើយ។ ពួកគេមិនចែករំលែងទ្រព្យសម្បត្តិ និង​របស់​របរ​អំណរសប្បាយរបស់គេជាមួយអ្នកដទៃ។

បងប្អូនជាទីស្រឡាញ់! តាមរយៈអត្ថបទថ្ងៃនេះព្រះយេស៊ូអញ្ជើញយើងទាំងអស់គ្នាស្រេកឃ្លាន​ព្រះជា​អម្ចាស់​ជាព្រះបិតារបស់យើងឱ្យយើងខំប្រឹងមករកព្រះយេស៊ូនៅក្នុងជីវិតរស់នៅសព្វថ្ងៃ។ ព្រះយេស៊ូ​អញ្ជើ​ញ​​ពួក​យើងរួមទុកជាមួយព្រះអង្គ ដោយជួបលំបាក និងទុក្ខលពាកនៅក្នុងជីវិតប្រចាំថ្ងៃ បើយើង​ជួបលំ​បាក​ឧបសគ្គ និងទុក្ខលំបាកនៅក្នុងជីវិតប្រចាំថ្ងៃយើងរួមដំណើរជាមួយព្រះយេស៊ូ ដោយសោយទុក្ខលំបា​ក​យ៉ាង​ខ្លាំងនៅក្នុងជីវិតរបស់បងប្អូនដែលជួបទុក្ខលំបាកយ៉ាងខ្លាំងដែរ។ សូមព្រះជាម្ចាស់បំភ្លឺចិត្ត​គំនិត​របស់​យើង ដើម្បីឱ្យយើងខំប្រឹងរួមដំណើរជាមួយព្រះយេស៊ូដែលសោយទុក្ខលំបាក ដើម្បីឱ្យយើងមាន​ជីវិត​រស់​នៅអស់កល្បជានិច្ចនៅស្ថានបរមសុខ។ សូមព្រះជាអម្ចាស់ប្រទានពរយើង៕