ថ្ងៃទី០៨ ខែកក្កដា ឆ្នាំ២០២៥ អត្ថបទគម្ពីរ (ម៉ាថាយ ៩,៣២-៣៨)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

អត្ថបទថ្ងៃនេះនាំឱ្យយើងនឹកដល់អំពើល្អ ពេលដែលយើងធ្វើអំពីល្អមិនស្រួលទេគឺគេតែងប្រឆាំងនិង​ទំ​​នាស់​​។ ថ្ងៃនេះព្រះយេស៊ូបំពេញបេសកកម្មពីរ គឺទីមួយព្រះអង្គបានបង្រៀនប្រជាជន នេះ​ជាលក្ខណៈ​របស់​ព្យាការីដែលព្រះអង្គកំពុងតែធ្វើ។ ព្រះអង្គតែងតែណែនាំពួកគាត់ស្គាល់​ការសង្គ្រោះរបស់​ព្រះជា​ម្ចា​ស់​ ហើយឱ្យពួកគាត់បានឃើញពីចិត្តប្រណីសន្តោសរបស់ព្រះអង្គដោយចិត្តស្រឡាញ់។

ទីពីរព្រះអង្គជួយព្យាបាលអ្នកជំងឺផ្សេងៗ នេះបញ្ជាក់ថាព្រះរាជ្យរបស់ព្រះជាម្ចាស់បានមកដល់ហើយ ព្រះ​អង្គ​មិនគ្រាន់តែនិយាយ តែព្រះអង្គបានជួយឱ្យពួកគាត់បានជាសះស្បើយ នេះជាមុខងាររបស់​ស្តេចដែល​តែង​តែបម្រើ និងជួយប្រជារាស្រ្ត ដោយព្រះអង្គបង្ហាញថាព្រះអង្គមិនគ្រាន់តែជាស្តេច ឬជាព្យការី ប៉ុន្តែ​ព្រះ​អង្គបានធ្វើកិច្ចការយ៉ាងច្បាស់ គឺជួយសង្គ្រោះមនុស្សឱ្យរួចផុតពីភាពសៅ​ម៉្មងនិង​បាប​ដែរ។

កាលពីសម័យបុរាណអ្នកមានជំងឺ គ ជាអ្នកដែលមានបាបអ្វីមួយនៅក្នុងជីវិតរបស់គេទើបនាំឱ្យគេមានជំងឺ តែពេលណាព្រះយេស៊ូព្យាបាលអ្នកជំងឺបានមានន័យថាពួកគេរួចផុសពីបាបនោះដែរ។ ដូច្នេះអ្វីដែលជា​លក្ខណៈ​​របស់ព្រះអង្គ គឺការងាររបស់ព្រះអង្គច្រើនណាស់ ហេតុដូច្នេះព្រះអង្គមានព្រះបន្ទូលនៅ​គ្រាចុង​ក្រោយ​ថា​ ស្រូវដែលត្រូវច្រូតនឹងមានច្រើនណាស់ តែអ្នកច្រូតមានតិចពេក​សុំឱ្យយើងអង្វរម្ចាស់​ស្រែចាត់​អ្នក​ច្រូតមកនៅក្នុងស្រូវរបស់ព្រះអម្ចាស់! មានន័យថាទោះបីព្រះអង្គមក​សង្គ្រោះ​ម​នុស្សលោក ទោះ​បី​ព្រះ​អង្គ​អាចធ្វើកិច្ចការអស្ចារ្យបាន តែព្រះអង្គកំពុងតែអញ្ជើញយើងជាសហការីរបស់ព្រះអង្គឲ្យចូលរួមធើ្វដែរ។

បងប្អូនយើងទាំងអស់អាចបង្ហាញព្រះរាជ្យរបស់ព្រះជាម្ចាស់បាន ជួយព្រះអង្គក្នុងការប្រកាស​ដំណឹ​ងល្អ​បាន​ នេះគឺជាជីវិតរបស់ព្រះសហគមន៍ ទោះបីយើងធ្វើកិច្ចការទាំងអស់បានល្អយ៉ាងណាក៏ដោយ។ អ​ត្ថ​​បទ​ថ្ងៃនេះក៏បានបង្ហាញថា មានការមើលងាយ និងមិនយកចិត្តទុកដាក់ ឬស្តីបន្ទោស ឬបៀតបៀន​ សម្រាប់​មនុស្សដែលធ្វើអំពើល្អ ដូច្នេះជារឿងធម្មតាសម្រាប់មនុស្សយើងឱ្យតែយើងមានឆន្ទៈ មានគោល​ដៅ​ច្បាស់លាស់ថា យើងកំពុងរស់នៅក្នុងស្ថានភាពយ៉ាងណា សូមបងប្អូនបំពេញស្ថានភាព ឬ កា​​រ​ងាររបស់បងប្អូនឲ្យបានល្អ ទោះមានអ្នកខ្លះគាំទ្រ ឬមិនគាំទ្រមិនសំខាន់តាម​កិច្ចការដែលព្រះជាម្ចាស់​ប្រគល់​​ឱ្យយើង តែសូមណែនាំគេផង និងជួយគេឲ្យក្លាយជាសហការីរបស់ព្រះយេស៊ូ ពេលនោះ​យើងក៏​ក្លាយ​​ទៅ​ជាអ្នកច្រូត​នៅក្នុងស្រែរបស់ព្រះជាម្ចាស់ដែរ។

សូមអញ្ជើញបងប្អូន យុវជន យុវនារីចូលនៅក្នុងការបម្រើរបស់ព្រះជាម្ចាស់ពេញម៉ោង ពេញលេញជាបូជា​ចារ្យ ជាបងស្រី ជាបងប្រុស ដើម្បីឱ្យព្រះសហគមន៍ខ្មែរយើងមានអ្នកបម្រើ មានអ្នកច្រូតនៅក្នុងស្រែចម្ការ គឺឱ្យប្រទេសកម្ពុជាយើងបង្កើតផលផ្លែល្អ នាំអ្នកជឿទៅថ្វាយព្រះជាម្ចាស់។ សូម​ព្រះជា​ម្ចាស់ប្រទាន​ពរ​ឱ្យ​បង​ប្អូន សូមឱ្យយុវជនយុវនារីបានទទួលការត្រាស់ហៅយ៉ាងល្អនៅក្នុងកិច្ចការយ៉ាងរបស់​ព្រះអង្គយេស៊ូ​គ្រីស្ត​​ផងដែរ។ អាម៉ែន៕