លោកចាវ៉ាហាកឡាល់ ណេរុ អ្នកស្ថាបនាប្រទេសឥណ្ឌា
![](/sites/default/files/styles/max_width_770px/public/2024-07/btmaanjaati_24.jpg?itok=eAmftZNz)
លោកចាវ៉ាហាកឡាល់ ណេរុ កើតនៅថ្ងៃទី ១៤ ខែវិច្ឆិកា ឆ្នាំ១៨៨៩ នៅទីក្រុងប្រាយ៉ាហ្គ្រ៉េ និង ទទួលមរណភាពនៅថ្ងៃទី២៧ ខែឧសភា ឆ្នាំ១៩៦៤ នៅទីក្រុងញូ ដេលលី។ លោកគឺជារដ្ឋ បុរសឥណ្ឌា។ លោកណេរុ គឺជាបុគ្គលនិមិត្តរូបឈានមុខម្នាក់នៃការប្រយុទ្ធដើម្បី ឯករាជ្យភាព ឥណ្ឌា និងតំណាងឲ្យគណបក្សខនហ្គ្រេស ជាតិឥណ្ឌា។ លោកណេរុ បានក្លាយជានាយករដ្ឋមន្រ្តីឥណ្ឌាពីថ្ងៃទី១៥ ខែសីហា ឆ្នាំ១៨៤៧ រហូតដល់ថ្ងៃដែលលោកទទួលមរណភាព។
លោកចាវ៉ាហាកឡាល់ ណេរុ កើតក្នុងគ្រួសារគ្រួសារព្រាហ្មហិណ្ឌូ និងមានប្រភពដើមពីតំបន់ កាស្មៀ។ លោកគឺជាកូនប្រុសរបស់លោកម៉ូទីឡាល់ ណេរុ ដែលជាមេដឹកនាំម្នាក់ដ៏សំខាន់នៃ គណបក្សខនហ្គ្រេស។ លោកណេរុ បានទទួលការសិក្សានៅលោកខាងលិច និងនៅចក្រភព អង់គ្លេស នៅសាលា ហារ៉ូ និងនៅសកលវិទ្យាល័យទ្រីនីធី ឬសកលវិទ្យាល័យ ខេមប្រ៊ីច។
នៅឆ្នាំ១៩១២ លោកណេរុ បានក្លាយជាមេធាវី។ លោកបានចុះឈ្មោះត្រឡប់មកកាន់ឥណ្ឌា ចូលគណបក្សខនហ្គ្រេស និងចូលរួមប្រយុទ្ធដើម្បីឯករាជ្យភាពឥណ្ឌា។ នៅឆ្នាំ១៩១៦ លោកបានស្គាល់លោក ម៉ូហានដាស ការ៉ាមចាន់ ហ៉្គង់ធី និងក្លាយជាសហការីម្នាក់របស់លោក ដែលជិតស្និទ្ធបំផុត។ ប៉ុន្តែការមិនស្រុះស្រួលគ្នាដ៏ជ្រាលជ្រៅ បានបែងចែកបុគ្គលទាំងពីរ។ លោកហ្គ៉ង់ធីស្ថិតនៅប្រកាន់ប្រពៃណីជាងជាមួយនឹងឆន្ទៈដើម្បីឲ្យមានស្វ័យភាពសម្រាប់ប្រជាជនឥណ្ឌា។ លោកណេរុ ជាមជ្ឈកៈជន និងមិនជឿលើសាសនាណាមួយដាច់ ស្រមៃចង់បានការកំណែទម្រង់ដ៏ជ្រាលជ្រៅ និងធ្វើសមាហរណកម្មឥណ្ឌាទៅក្នុងប្រជាជាតិនានា ដែលក្តីប្រាថ្នារបស់លោក គឺធ្វើសមាហរណកម្មឥណ្ឌាតាមគំរូឧស្សាហកម្ម និងមូលធននិយមអង់គ្លេស និងដើរផ្លូវកណ្តាលសម្រាប់ទ្រឹស្តីសង្គមនិយម។
នៅពេលតស៊ូដើម្បីឯករាជ្យជាច្រើនដង លោកណេរុត្រូវបានចាប់ឃុំឃាំងដោយអង់គ្លេស នៅរវាងឆ្នាំ១៩២០ និង១៩៤៥ លោកបានចំណាយពេលរហូតដល់ ១០ឆ្នាំ នៅក្នុងគុក។ ប៉ុន្តែលោកគាំទ្រកិច្ចខិតខំខាងសង្រ្គាមរបស់ក្រុមសម្ព័ន្ធមិត្តនៅអំឡុងសង្រ្គាមលោក ដោយប្តូរនឹងការសន្យានូវឯករាជ្យសម្រាប់ឥណ្ឌានៅពេលចប់សង្រ្គាម។
លោកណេរុ គឺជាប្រមុខរដ្ឋាភិបាលស្តីទីដែលទទួលបន្ទុករៀបចំឯករាជ្យនៅឆ្នាំ១៩៤៦។ ក៏ដូចជាលោកហ្គ៉ងធី លោកមិនអាចបញ្ចៀសជម្លោះជាមួយអនាគតប៉ាគីស្ថាននៅឆ្នាំ១៩៤៧ បានទេ។
ក្នុងអំឡុងរយៈពេល ១៧ឆ្នាំ នៃអណត្តិរបស់ខ្លួន គណបក្សខនហ្គ្រេស បានឈ្នះឆ្នោតភ្លូកទឹកភ្លូកដីនូវការបោះឆ្នោត ៣ដង បន្តបន្ទាប់គ្នា។ លោកណេរុ បានធ្វើជាអធិបតីភាពនៃការអនុម័តរដ្ឋធម្មនុញ្ញឥណ្ឌា។ លោកណេរុ បានដាក់ចេញនូវកំណែទម្រង់ឧស្សាហកម្មដ៏ទូលំទូលាយ ប្រកាន់នយោបាយកសិកម្មតាមសង្គមនិយម និងចូលរួមក្នុងការបង្កើតចលនាមិនចូលបក្សសម្ព័ន្ធ។ លោកមានឈ្មោះល្បីល្បាញដែលជាប្រភពនៃការបង្កើតរដ្ឋឥណ្ឌាទំនើប និងផ្តាច់ចេញពីសាសនា។ គឺនៅឆ្នាំ ១៩៥៦ ដែលលោកណេរុ បានបង្កើតឲ្យឥណ្ឌាមានបដិវត្តបៃតង់ ដែលសង្រ្គោះប្រទេសឥណ្ឌាពីគ្រោះទុរភិក្ស ក្នុងនោះមានការលើកទឹកចិត្តឲ្យធ្វើកសិកម្មនៅមូលដ្ឋានផ្ទាល់។
លោកណេរុ បានសរសើរស្ញប់ស្ញែងយ៉ាងខ្លាំង សម្រាប់ប្រព័ន្ធផែនការសេដ្ឋកិច្ចប្រាំឆ្នាំ របស់សហភាពសូវៀត និងព្យាយាមដាក់ឥណ្ឌានៅក្នុងការរៀបចំស្រដៀងគ្នា។ ក្តីប្រាថ្នារបស់លោកគឺនាំមកឲ្យឥណ្ឌានូវគុណសម្បត្តិទាំងពីប្រព័ន្ធសង្គមនិយម និងមូលធននិយម ដោយបង្កើតប្រព័ន្ធសង្គមនិយមប្រជាធិបតេយ្យ។ ក៏ប៉ុន្តែរឿងនេះ បានបង្កើតនូវរដ្ឋបាលមួយដ៏ស្មុគស្មាញ យឺតយ៉ាវ និងមានអំពើពុករលួយយ៉ាងខ្លាំង។ ភាពជាប់គាំងខាងសេដ្ឋកិច្ច បានក្លាយជាមូលហេតុមួយនៃការបរាជ័យរបស់គណបក្សខនហ្គ្រេស និងការឡើងមកកាន់អំណាចរបស់គណបក្សហិណ្ឌជាតិនិយម។
Daily Program
![Livesteam thumbnail](/sites/default/files/inline-images/live-stream-thumb.jpg)