ការបង្រ្កាបការបោកប្រាស់តាមអ៊ីនធើណែតមិនមែនជារឿងដែលងាយស្រួលនោះទេ ប៉ុន្តែរដ្ឋាភិបាល និងអាជ្ញាធរត្រូវតែខិតខំប្រឹងប្រែងបោសសំអាតឲ្យបាន ។
យើងដឹងថា សង្គមរបស់យើងមានសុវត្ថិភាពជាងពីមុន ចោរកម្ម អំពើឆក់ប្លន់ ថ្វីត្បិតតែវានៅមានក៏ពិតមែន ប៉ុន្តែវាពិតជាកាត់បន្ថយគួរឲ្យកត់សំគាល់។ ស្ថានភាពបែបនេះពិតជាផ្តល់នូវអំណោយផលដល់ការទាក់ទាញទេសចរបរទេស ប៉ុន្តែវាចង្រៃអ្វីកម្ពុជាត្រូវគេសំអុយឈ្មោះដោយសារតែហ្គេមអនឡាញនិងអំពើបោកប្រាស់អនឡាញ ។
ជាការពិតមកដល់ពេលនេះសុវត្ថិភាពរបស់អ្នកទេសចរ និងវិនិយោគទុនដែលស្របច្បាប់ ក៏ដូចជាអ្នកជំនាញការនានា ដូចជាមិនដែលមានរឿងអសន្តិសុខទេ ។ តែវាសំបូរក្រុមដែលពាក់ព័ន្ធនឹងសកម្មភាព ល្បែងអនឡាញ ដោយមានទាំងការលោតសម្លាប់ខ្លួន ការប្រើប្រាស់អាវុធខុសច្បាប់ ការចាប់បង្ឃាំងមនុស្ស ការបង្កគ្រោះថ្នាក់ចរាចរណ៍ ជាដើម។ នៅក្នុងចំណោមអ្នកដែលពាក់ព័ន្ធទាំងជនល្មើសនិងជនរងគ្រោះភាគច្រើន គឺជាក្រុមសង្គមងងឹតបរទេស។
ហើយរឿងមួយដែលកាន់តែខូចឈ្មោះខ្លាំងនោះ គឺក្រុមជនរងគ្រោះដែលមករកការងារធ្វើនៅកម្ពុជា ដោយចាញបោកក្រុមអ្នកអន្ទងតាមបណ្តាញអនឡាញក្រៅច្បាប់ ។ ក្រុមនេះគឺមានច្រើន ហើយក្រុមនេះ មិនបានទាក់ទងបណ្តាញផ្លូវការទេ គឺគេទាក់ទងគ្នាគេ ហើយក៏សម្រេចមក ក្រោមទិដ្ឋាការទេសចរណ៍ដល់មានបញ្ហាក៏សន្និដ្ឋានសរុបថាកម្ពុជាតាំងមូល។
ឆ្លងតាមរយៈសកម្មភាពទាំងនេះ មានការចោទប្រកាន់ដោយមតិមួយចំនួនថា កម្ពុជាគឺជាគោលដៅនៃអំពើជួញដូរមនុស្ស ប្រភពនៃឧក្រិដ្ឋកម្ម ស្របពេលដែលពលរដ្ឋកម្ពុជា និងអ្នកទេសចរនៅតែបន្តរស់នៅនិងដើរកំសាន្តដោយសុវត្ថិភាព ។
សម្រាប់ជនបរទេសណាដែលមកកម្ពុជាក្រោមហេតុផលនិងមានបណ្តាញស្របច្បាប់ពួកគេបានត្រូវគាំពារដោយច្បាប់ ហើយពួកគេភាគច្រើនគឺមានសុវត្ថិផាព និងមានសិទ្ធិសេរីភាពគ្រប់យ៉ាង ទៅណាមកណា តាមដែលគេចង់ឲ្យតែមានធនធានដើម្បីចំណាយលើសោហ៊ុយផ្សេងៗ។
នៅក្នុងស្ថានភាពបែបនេះហើយទើបមតិមួយចំនួននៅបរទេសបន្តឃើញកម្ពុជាថា ជាប្រទេសអសុវត្ថិភាព ទាំងដែលការពិតគឺផ្ទុយទាំងស្រុង ។
ដោយសារតែកម្ពុជាស្អុយឈ្មោះបង្កដោយក្រុមឧក្រិដ្ឋជនតាមអនឡាញនិងល្បែងស៊ីសងខុសច្បាប់ទាំងនេះហើយ ដែលអ្នកដែលពាក់ព័ន្ធត្រូវតែរួមសហការគ្នាបោសសំអាតប្រភេទនៃឧក្រិដ្ឋកម្មនេះនៅក្នុង ប្រទេសបន្តទៀត ។
ការបណ្តែតបណ្តោយឲ្យក្រុមទាំងនេះបន្តសកម្មភាពដដែលៗវានឹងកាន់តែធ្វើឲ្យសង្គមកម្ពុជាកាន់តែស្អុយឈ្មោះ។ សូមទាំងអស់គ្នាចូលរួមដៃគ្នាលុបបំបាត់បញ្ហាអវិជ្ជមាននេះនៅកម្ពុជា ដើម្បីយើងអាចបន្តឈរជើងនិងអភិវឌ្ឈន៍ប្រទេសជាតិកាន់តែចម្រើនលូតលាស់ថែមទៀត៕
Daily Program
