មកដល់ថ្ងៃទី២៦ខែកញ្ញា នេះ គឺជាថ្ងៃទី៥៩ហើយ ដែលវីរកងទ័ពកម្ពុជាចំនួន ១៨រូប ត្រូវបានចាប់ខ្លួន និងដាក់ឱ្យស្ថិតក្រោមការឃុំគ្រងរបស់យោធាថៃ ដូច្នេះយើងទាំងអស់គ្នាជាប្រជាពលរដ្ឋគួរតែរួបរួបគ្នាបង្កើនការផ្សព្វផ្សាយថែមទៀត ដើម្បីឲ្យសហគមន៍អន្តរជាតិដឹងអំពីបញ្ហានេះ រហូតដល់ភាគីថៃដោះលែងពួកគេដោយសុវត្ថិភាព។
ពួកគេបានឃ្លាតចាកឆ្ងាយ និង ដាច់ការទាក់ទងពីគ្រួសារ៥៩ថ្ងៃហើយ ដូច្នេះយើងគួរតែនាំគ្នាធ្វើអ្វីៗគ្រប់យ៉ាង តាមច្បាប់ តាមជំហររបស់រាជរដ្ឋាភិបាល ដើម្បីធ្វើយ៉ាងណាឲ្យបងប្អូនវីរកងទ័ពទាំងអស់អាចវិលត្រឡប់មកជួបជុំគ្រួសារវិញប្រកបដោយសុខសុវត្ថិភាព ស្របតាមច្បាប់មនុស្សធម៌អន្តរជាតិ ហើយក៏កុំភ្លេចសុខទុក្ខក្រុមគ្រួសាររបស់ពួកគេ ជាពិសេសគឺអ្នកដែលមានជីវភាពទីទាល់លំបាក។
មកដល់ពេលនេះ រាជរដ្ឋាភិបាលកម្ពុជា បាននឹងកំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយទាំងអស់លើករណីនេះ ដើម្បីឱ្យភាគីថៃ ដោះលែងបងប្អូនទាំង១៨នាក់បាន វិលត្រលប់មកវិញឱ្យបានឆាប់រហ័សជាទីបំផុត និងដោយសុខសុវត្ថិភាព ដូច្នេះយើងទាំងអស់គ្នាជាប្រជាពលរដ្ឋគួរតែចែករំលែក និងគួរតែបង្កើនការផ្សព្វផ្សាយ ដើម្បីធ្វើយ៉ាងណាឲ្យបងប្អូនអាចវិលមកមាតុប្រទេសវិញ។
យើងទាំងអស់គ្នាដឹងថា រាជរដ្ឋាភិបាល ក្រសួងការពារជាតិ និងកងយោធពលខេមរភូមិន្ទ មិនដែលបោះបង់កងកម្លាំងរបស់យើងណាម្នាក់ចោលនោះឡើយ ទោះក្នុងកាលៈទេសៈណាក៏ដោយ ដូច្នេះយើងទាំងអស់គ្នាចាំបាច់ត្រូវតែបន្តខិតខំប្រឹងប្រែងថែមទៀត ដើម្បីឲ្យសហគមន៍អន្តរជាតិ និងបងប្អូនជនជាតិថៃដែលស្រលាញ់សន្តិភាព យល់ពីស្ថានភាពពិត យល់អំពីបំណងពិតប្រាកដរបស់កម្ពុជា ដែលស្រលាញ់សន្តិភាព និង ការអភិវឌ្ឈ។
មកដល់ពេលនេះខាងក្រសួងការពារជាតិនិងស្ថាប័ននានា គឺនៅតែបន្តផ្សព្វផ្សាយអំពីជោគវាសនារបស់បងប្អូនទាំង១៨ នាក់នៅឡើយ ដូច្នេះយើងទាំងអស់គ្នាក៏គួរតែនាំគ្នាបង្កើនការផ្សព្វផ្សាយនិងចែករំលែកសារអំពាវនាវនេះបន្តទៀត តាមគ្រប់បណ្តាញសង្គម ដែលយើងទាំងអស់គ្នាមានដើម្បីធ្វើយ៉ាងណាឲ្យសហគមន៍អន្តរជាតិដឹងកាន់តែច្បាស់ថា ពួកគេនៅតែបន្តគ្រប់គ្រងដោយភាគីថៃ។
ក្រៅពីនោះនៅក្នុងស្ថានភាពដែលស្ថានការណ៍ព្រំដែននៅតែបន្តនៅក្នុងសភាពតានតឹងនៅឡើយ យើងក៏សូមឲ្យបងប្អូននៅជួរមុខលើកកំពស់ការប្រុងប្រយ័ត្ន និង គោរពបទបញ្ជារបស់ថ្នាក់លើ ជាពិសេសគឺរាជរដ្ឋាភិបាល ដើម្បីធ្វើយ៉ាងណាធានាបាននូវយន្តការដោះស្រាយបញ្ហាដោយសន្តិវិធី ប៉ុន្តែនៅតែបន្តការពារដែនដីនិងដែនអធិបតេយ្យភាពរបស់យើងដោយរឹងមាំ ដោយឯកភាពគ្នាជាធ្លុងតែមួយ៕
Daily Program
